ROMA 11

1Au sa qai taroga, sa biuti ira dina li na nona tamata na Kalou? E sega sara! Oi au vakataki au e dua na Isireli, au kawa i Epara-ama, ka'u lewe ni yavusa i Penijamini.#Fpai 3.5 2E segai ni se biuti ira na nona tamata na Kalou, o ira a digitaki ira mai na i vakatekivu o koya. O ni kila na tiki ni Vola Tabu sa tukuna kina o Ilaijia vua na Kalou na veika era cala kina na Isireli: 3“Kemuni na Turaga era sa vakamatei ira na nomuni parofita ka talaraka sobu na nomuni i cabocabonisoro. Oi au taudua ga au sa vo tiko ka ra sa tovolea tiko me ra vakamatei au.”#1Tui 19.10,14 4A cava sa qai sauma kina vua na Kalou? “Au sa maroroi ira tiko me ra noqu era lewe vitu na udolu na tamata ka ra sega ni qarava na kalou o Peali.”#1Tui 19.18 5E vaka talega kina ena gauna oqo: era sa vo tikoga na vo-ni-bula era lewe lailai ga, ka sa digitaki ira na Kalou ena nona lolomasavu. 6Na nona digidigi e yavutaki ena nona lolomasavu ka sega ni yavutaki ena ka era cakava. Kevaka e yavutaki na digidigi ni Kalou ena ka e cakava na tamata, sa qai sega ni wili na nona lolomasavu me lolomasavu dina.

7Sa qai vakaevei? Era a sega ni kunea na Isireli na ka era a vakasaqara tiko. Era a kunea ga o ira na i lala lailai sa digitaki ira na Kalou; era sa yaco na kena vo me ra didivara ki na veikacivi ni Kalou. 8Me vaka e kaya na i Vola Tabu, “Sa cakava na Kalou me wele na yalodra kei na nodra vakasama; me yacova mai edaidai era sa sega ga ni rai e matadra se rogo e daligadra.”#Vrua 29.4; Aisea 29.10 9Me vaka talega e kaya o Tevita,

“Me yaco me kedra i cori ka kedra dai na kedra magiti.

Me yaco me ra lutu kina ka me ra totogitaki kina.#Same 69.22,23 (LXX)

10Me boko mada ga na matadra me ra kakua ni rai rawa;

Ka me ra vakalairoro tikoga ena veigauna kece ena bibi ni nodra i colacola.”

11Au sa qai taroga tale, “Ni ra sa tarabe na Jiu, era sa bale li ka rusa sara kina vakadua? E segai sara! Ena vuku ni nodra caka cala na Jiu, sa yaco mai kina na veivakabulai vei ira na kai matanitu tani, me ra vuvutaki ira kina o ira na Jiu. 12Na nodra i valavala ca na Jiu sa kauta mai na veivakalougatataki levu ki vuravura; kei na nodra dravudravua vakayalo sa kauta mai na veivakalougatataki levu kivei ira na kai matanitu tani. Sa na qai wacava li na levu ni veivakalougatataki ena gauna sa vakacurumi talega kina na kedra i wiliwili kece na Jiu!

Na Nodra Vakabulai na Kai Matanitu Tani

13Au sa qai vosa oqo vei kemuni na kai matanitu tani: me vaka na noqu i lesilesi ni'u sai apositolo vei ira na kai matanitu tani, au sa doka vakalevu na noqu veiqaravi oqo. 14De lakolako au mani rawa ni vakavuna me ra vuvu o ira na kai noqu, ka me rawa kina ni vakabulai eso vei ira. 15Ni kevaka sa vakavuna me veivinakati tale o vuravura kei na Kalou na nodra biu tani na Jiu, ia na cava ena qai yaco kevaka era sa vakadonui talega vakakina? Ena vaka ga na bula tale mai na mate!

16Kevaka sa soli vua na Kalou na i matai ni tiki ni madrai, sa ka tabu me nona na Kalou na vo ni buli madrai; ka kevaka sa cabori vua na Kalou na wakanikau, sa ka tabu me nona talega na Kalou na tabana kece sara. 17A sa musuki laivi mai na vuni olive sa teivaki eso na tabana, ka sa semati yani kina na taba ni olive ni veikau. Oi kemuni na kai matanitu tani sa vaka na taba ni olive ni veikau oqo, ka o ni sa vakaivotavota talega ena nodra bula vakayalo qaqa na Jiu. 18O koya oqo mo kakua kina ni beci ira na taba ni olive sa musuki laivi. E rawa vakacava li mo dokadoka kina? O iko o tabana walega; ka sa sega ni bula na vuna ena vukumu, ia na vuna ga sa vakabulai iko tiko.

19Ia o na kaya tale, “Sa dina sara, ia sa musuki laivi ga na tabana dina me rawa ni'u sema kina oi au.” 20Sa dina o ya. Era sa musuki laivi mai baleta ni ra sega ni vakabauta na Kalou, ia o ni sa la'ki toka dei oi kemuni baleta ni o ni sa vakabauta. Mo kakua ni dokadoka kina, ia mo rere ga. 21Ni kevaka sa sega ni vosoti ira na Jiu na Kalou, o ira era sa vaka na taba ni olive dina; o nanuma beka me na qai vosoti iko o koya? 22E ke eda sa raica kina na yalovinaka kei na voravora ni lewa ni Kalou. Na voravora ni nona lewa vei ira era sa bale kei na nona yalovinaka vei iko kevaka o sa tudei tiko ena nona loloma; ia kevaka o na sega ni tudei tiko o na musuki tani talega. 23Ia o ira na Jiu, kevaka era na biuta tani na nodra tawa vakabauta, era na vakalesui tale mai ki na nodra i tutu e liu; ni sa rawa vua na Kalou me semati ira tale. 24Oi kemuni na kai matanitu tani sa vaka na taba ni olive ni veikau sa musuki tani mai ka sa semati ki na vuni olive sa teivaki. Era sa vaka na vuni olive sa teivaki o ira na Jiu; ka sa sega ni dua na kena dredre vua na Kalou me semati ira lesu tale na taba ni olive sa musuki tani oqo ki na vuna dina.

Na Loloma ni Kalou Vei Keda Kece

25Kemuni na veiwekani, oqo e dua na ka vuni ka'u vinakata mo ni kila, ka ni na vakabulai kemuni mai na nanuma ni o ni sa tamata vukei. Na kaukauwa ni lomadra na Jiu ena sega ni ka tudei sara; ena yacova ga ni ra sa lako kece mai vua na Kalou na i wiliwili ni kai matanitu tani ka a dodonu me ra vakabulai. 26Ia ena vakaoqo na nodra vakabulai kece na Isireli. Me vaka e kaya na i Vola Tabu,

“Ena lako mai na i Vakabula mai Saioni,

Ka na kauta laivi na ca kecega mai vei ira na kawa i Jekope.#Aisea 59.20,21 (LXX)

27Keimami na cakava vata na veiyalayalati oqo,

Ni'u sa kauta tani na nodra i valavala ca.”#Aisea 27.9 (LXX)

28Ena vuku ni nodra cata na i Tukutuku Vinaka na Jiu, era sa mani yaco kina me ra meca ni Kalou, ka sa la'ki nomuni kina na kai matanitu tani na kena vinaka. Ia ena veidigitaki ga ni Kalou era sa wekana kina na Jiu ena vukudra na nodra qase. 29Ni sa sega ni dau veisautaka na Kalou na nona vakasama vei koya sa digitaka ka vakalougatataka. 30Vei kemuni na kai matanitu tani, o ni a dau talaidredre voli vua na Kalou ena gauna e liu; ia oqo o ni sa qai ciqoma na yalololoma ni Kalou ena vuku ni nodra talaidredre na Jiu. 31Sa vaka talega kina o ira na Jiu, ena vuku ni yalololoma o ni sa qai ciqoma oqo, era sa talaidredre kina vua na Kalou ena gauna oqo, ka me rawa talega kina ni ra ciqoma oqo na yalololoma ni Kalou. 32Ni sa lewa na Kalou me ra bobula kecega na tamata ki na talaidredre, me rawa kina ni vakaraitaka o koya na nona yaloveivosoti ki na tamata yadua.

Me Vakacaucautaki na Kalou

33Sa uasivi dina na vinaka ni Kalou! Sa titobu sara na nona vuku kei na nona kila-ka! O cei ena rawa ni vakamacalataka na lomana? O cei e rawa ni kila na nona i vakarau?#Aisea 55.8 34Me vaka sa kaya na i Vola Tabu:#Aisea 40.13 (LXX)

“O cei e kila rawa na vakasama ni Turaga?

O cei ena rawa me soli i vakasala vua?

35O cei e sa bau solia vua e dua na i solisoli, ka me na qai sauma lesu tale o koya?”#Jope 41.11

36Ni sa bulia na ka kecega o koya. Era sa bula rawa tu ena nona kaukauwa, ka ra sa bula tale tu ga ena vukuna. Me ia ga vua na Kalou na veivakalagilagi ka sega ni mudu! Emeni.#1Kori 8.6

Currently Selected:

ROMA 11: FNV

Highlight

Copy