SAME 116
116
Sa Vakacaucautaka na Kalou na Tamata e Vakabulai mai na Leqa
1Au sa lomani Jiova, ni sa rogoci au,
Sa rogoca o koya na noqu masu.
2Ena vuku ni nona vagolea na daligana kivei au,
Au na masu tikoga kina vua ena noqu bula taucoko.
3E a vesuki au sara vakaukauwa o mate ena nona dali,
Sa volekati au sara na veivakararawataki ni bulubulu;
Ka a luvuci au ga na rere kei na taqaya.
4Au a qai masu vei Jiova, ka kaya,
“Au masuti kemuni, Jiova, mo ni vakabulai au mada!”
5Sa yalololoma ka yalovinaka ko Jiova;
Sa sinai ena yalololoma na noda Kalou.
6Sa dau vukei ira era malumalumu ko Jiova;
Ena gauna au leqa tu kina, sa vakabulai au o koya.
7Mo vakacegu, na yaloqu,
Baleta ni sa rui vinaka vei au ko Jiova.
8Sa vakabulai au na Turaga mai na mate,
Ka sa tarova na wai ni mataqu,
Ka qarauni au me'u kakua ni druka.
9Ena ka oqo au sa lako voli ga kina ena mata i Jiova,
Ena nodra vuravura na vakabulai.
10Au vakabauta tikoga, ka veitalia ga ni'u a kaya,
“Au sa vakararawataki sara vakalevu.” #2Kori 4.13
11Au a kaya ena kurabui kei na rere,
“Sa sega ni dua e rawa me da vakadinata.”
12Na cava li e rawa me'u na solia vei Jiova
Ena vuku ni nona yalovinaka vei au?
13Au na kauta mai e dua na i madrali liviraki vei Jiova
Me'u vakavinavinaka vua ena nona vakabulai au.
14Au na solia vua na ka au sa yalataka
Ena nodra soqo na nona tamata kecega.
15Sa ka talei e na mata i Jiova
na nodra mate na nona tamata yalodina.
16Au sa nomuni dauveiqaravi, Turaga, au sa luvena na nomuni vada dauveiqaravi.
O ni sa sereki au mai na kequ i vesu.
17Au na vakacabora vei kemuni na i madrali ni vakavinavinaka,
Ka vakacabora vei kemuni na noqu masu.
18Au na sauma kece sara vei Jiova na veika kece au
Yalataka ena nodra soqo na nona tamata kecega,
19Ena loma ni vale i Jiova,
Ena loma i Jerusalemi.
Ni vakavinavinaka vei Jiova.
Currently Selected:
SAME 116: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
