OPETAIA 1
1
Ena Cudruvi Itomi ko Jiova
1Oqo na raivotu i Opetaia.
Sa kaya vakaoqo ko Jiova ni lewevuqa
Me baleta na vanua o Itomi:
Sa tala oti na nona i talai ko Jiova
Ki na veivanua kecega;
Keimami sa rogoca
Ni sa vakaoqo na nona i tukutuku:
“Ni vakarau! Me da la'ki vala vata kei Itomi!”
2Sa kaya vakaoqo ko Jiova vei Itomi,
“Au na cakava mo malumalumu;
Era na beci iko na tamata kecega.
3Sa vakacalai iko na nomu dokadoka.
Na nomu koro turaga e koronivalu veivatu;
O sa tiko sara mai na veiulunivanua;
O sa qai kaya tale e lomamu,
‘O cei e rawa ni talaraki au sobu?’
4E dina ga ni o sa la'ki vakaitikotiko
Ena vanua cere me vaka na sova ni ikeli,
Ka sa vaka o sa tiko maliwai ira na veikalokalo,
Ia ka'u na qai talaraki iko sobu.
5“Ni ra lako mai ena bogi na daubutako,
Era na kauta ga na ka era vinakata.
Ni ra veti qerepi na tamata,
Era na dau vakavoca tu ga eso.
Ia o ira na kemu meca
Era sa vaqeyavutaki iko vakadua.
6Era sa kunea na nomuni i yau na kawa i Iso,
Ka ra sa yauta tani kece yani.
7Era sa vakacalai iko na nomu i to;
Ka ra sa vakasavi iko tani mai na nomu vanua.
O ira o ni a dau veisaututaki tu eliu
Era sa rawai iko tale.
Na nomu i tokani o ni a daukana vata eliu
Era sa cakava tale na kemu i cori;
Ka ra sa kaya, ‘Sa evei na kila-ka
Sa dau tiko vua?’”
8Sa vosa na Turaga, ka kaya,
“Ena siga ni noqu totogitaki Itomi,
Au na vakarusai ira kecega na nona tamata vuku;
Ka vaqeyavutaka vakadua na vuku
Mai na Ulunivanua o Iso.
9Era na rere na tamata ni valu ni Temani,
Ka vakamatei na sotia kece mai Itomi.
Na Vuna e Totogitaki kina o Itomi
10Ena vuku ni vakarau kaukauwa
Kei na veivakamatei vua na wekamu o Jekope,
O na luvuci sara ena madua,
Ka muduki laivi ka tawamudu.
11O a duri vakatikitiki tu ena siga o ya
Ni ra sa basu bai na meca.
O sa vakataki ira ga na kai tani
Era sa kovea na i yau nei Jerusalemi
Ka wasewasea ena kedra maliwa.
12A sega ni dodonu mo a rekitaka
Na nodra vakaleqai na wekamu mai Juta.
A sega ni dodonu mo a marautaka
Na siga ni nodra a vakarusai.
A sega ni dodonu mo a dredrevaki ira
Ena gauna ni nodra rarawa.
13A sega ni dodonu mo a curu
Ki na nodra koro na noqu tamata
Ka rekitaka na nodra vakararawataki
Ka kovea na nodra i yau
Ena siga ni nodra vakarusai.
14 #
Aisea 34.5-17; 63.1-6; Jere 49.7-22; Isi 25.12-14; 35.1-15; Emo 1.11,12; Mala 1.2-5 A sega ni dodonu mo a la'ki tu e basoga ni sala
ka sogota na sala vei ira era via dro bula.
A sega talega ni dodonu
Mo a soli ira oqo vei ira na meca
Ena siga ni nodra rarawa.”
Nodra Veilewaitaki na Veivanua
15“Oi au na Turaga, ka sa roro mai na gauna
Me'u veilewaitaki ira kina na veivanua kecega.
Ia o iko, Itomi, na ka sara ga o a cakava
Ena caka tale vei iko.
Na ka sara ga o a solia ena soli tale vei iko.
16O ira na noqu tamata
Era sa gunuva oti ena noqu delana tabu.
E dua na bilo gaga ni veitotogitaki.
Ia o ira na veivanua wavokita era na gunuva
Na bilo gaga vakalevu cake ni veitotogitaki;
Era na gunuva ka ra yali sara yani.”
Na Nodra Qaqa na Isireli
17“Ia eso ga ena Ulu i Saioni era na dro bula,
Ka yaco me vanua tabu na ulunivanua o ya.
Era na taukena na kawa i Jekope
Na vanua e dodonu me nodra.
18Na nodrau kawa o Jekope kei Josefa
Era na vaka na bukawaqa;
Era na vakarusai ira na kawa i Iso
Me vaka sa vakamai na vu ni sila.
Ena sega sara ni vo e dua na kawa i Iso;
Ni sai au ko Jiova ka'u sa tukuna oqo.
19“Era na taukeni Itomi na lewenivanua
Mai na ceva kei Juta;
Kei ira mai na mua-i-ra ni veidelana
Era na taukena na vanua o Filisitia.
O ira na Isireli era na taukena
Na vanua o Ifereimi kei Samaria;
Ka ra na taukeni Kiliati o ira na Penijamini.
20O ira na i lawalawa sotia tiko vakabobula
Mai na vualiku kei Isireli
Era na qai lesu tale mai ka rawai Fonisia
Ka yaco sara ki Sarifaci ena vualiku.
Ia o ira mai Jerusalemi ka kau vakavesu ki Satisi
Era na rawa na veikoro ni ceva kei Juta.
21O ira sa vakabulai era na cabe cake
Ki na Ulunivanua o Saioni
Me ra valuti Itomi ka lewa.
Ena qai Tui ga vakai koya ko Jiova.”
Currently Selected:
OPETAIA 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
