MARIKA 15

Ko Jisu ena Mata i Pailato

(Maciu 27.1-2,11-14; Luke 23.1-5; Joni 18.28-38)

1Ia ni sa kida na mataka era sa qai bose vata sara o ira na matabete e cake, kei ira na qase kei ira na daunilawa kei ira kece na lewe ni Bose. Era sa qai vesuki Jisu ena sinucodo ka kauti koya tani mai kea ka soli koya vei Pailato. 2Sa qai tarogi koya o Pailato, ka kaya, “O iko li na nodra tui na Jiu?”

E a sauma vua o koya, ka kaya, “Oqori na ka o sa kaya.”

3Era sa qai beitaki koya o ira na matabete e cake ena vuqa sara na ka. 4Sa qai tarogi koya tale o Pailato, ka kaya, “E sega beka na ka o kaya rawa ena levu ni ka era sa beitaki iko tiko kina o ira oqo?”

5Ia sa sega ga ni bau sauma ko Jisu; ka sa kurabui kina o Pailato.

Sa Tauci na Lewa me Mate ko Jisu

(Maciu 27.15-26; Luke 23.13-25; Joni 18.39—19.16)

6A sa dau nona i valavala o Pailato me dau sereka e dua na kaivesu era dau kerea mai na lewenivanua me sereki ena veigauna kece ni Solevu ni Lakosivia. 7E a tiko ena valeniveivesu ena gauna o ya e dua na tamata ka yacana o Parapa, kei ira talega eso na tamata i valavala kaukauwa era a laba vata kaya ena gauna ni vakacaca. 8Era sa qai lako cake na lewe vuqa ka vakatekivu cikevi Pailato me sereka vei ira e dua na kaivesu me vaka na kena i vakarau. 9A qai sauma vei ira o koya, ka kaya, “O ni vinakata me'u sereka vei kemuni na nodra Tui na Jiu?” 10A sa kila vinaka tu o Pailato ni ra a soli Jisu yani vua na i liuliu ni matabete baleta ni ra sa vuvutaki koya.

11Ia era a qai vakauqeti ira na lewe vuqa o ira na i liuliu ni matabete me ra kerea vei Pailato me sereki Parapa ga vei ira. 12Sa qai kaya tale o Pailato vei ira, “Ia na cava ga me'u qai cakava vei koya o ni sa vakatoka me nodra Tui na Jiu?”

13Era sa qai kailavaka yani, “Vakota ki na kauveilatai!”

14Sa qai taroga tale o Pailato vei ira, “Ena vuku ni cava? Na cala cava sa cakava o koya?”

Era sa qai qoqolou vakalevu cake ga kina, ka kaya, “Vakota ki na kauveilatai!”

15Ia ni sa vinakata ga o Pailato me vakayalovinakataki ira na lewe vuqa, sa mani sereki Parapa kina vei ira. Sa qai vakanakuitataki Jisu ka soli koya yani me vakoti ki na kauveilatai.

Era sa Vakalialiai Jisu na Sotia

(Maciu 27.27-31; Joni 19.2-3)

16Era sa qai kauti Jisu na sotia ki na loma ni bai ni kovana, ka ra sa soqoni vata kina na vo ni lewe ni mataivalu o ya. 17Era sa qai vakasulumi koya ena i sulu roka lokaloka, na roka ni sulu vakatui, ka ra talia e dua na i sala wavakavotona ka ra vakatokara vua. 18Era sa qai vakatekivu me ra kidavaki koya, ka kaya, “Me bula balavu na nodra Tui na Jiu!” 19Era sa qai mokuta na uluna ena dua na kuita, ka ra vakasiviti koya, ka ra tekiduru ka cuva vua. 20Ni sa oti na nodra vakalialiai koya, era sa qai luvata laivi mai vua na i sulu lokaloka, ka vakadarama vua na nona i sulu dina. Era sa qai kauti koya me vakoti ki na kauveilatai.

Sa Vakoti ki na Kauveilatai ko Jisu

(Maciu 27.32-44; Luke 23.26-43; Joni 19.17-27)

21Ia ni ra sa lako tiko era sa sota sara kei na dua na tamata, a yacana o Saimoni. E lako tiko mai loma ni vanua o koya. E kai Kirini, ka tamadrau o Alekisada kei Rufo. Era sa qai vakasaurarataki koya me colata na kauveilatai i Jisu.#Roma 16.13 22Era sa qai kauti Jisu sara ki na vanua e vakatokai o Kolikoca (a kena i balebale na vanua ni qavokavoka). 23Era sa qai solia vua na waini ka veiwaki tu kei na mura, o ya na drega ni kau ka dau vakamalumalumutaka na momosi ni yago, ia sa bese ni gunuva o koya. 24Era sa qai vakoti koya na sotia ki na kauveilatai, ka ra vota na nona i sulu ena vakawirimadigi, me ra dui kila kina na nodra i votavota.#Same 22.18 25Sa ciwa na kaloko ena mataka ena gauna era vakoti koya kina ena kauveilatai. 26A sa volai toka e cake na ka e beitaki kina, “Na Nodra Tui Na Jiu”. 27Era sa vakota vata kaya e rua na daubutako, e dua ena yasana i matau, ka dua ena i mawi;#Same 22.18 28a sa vakayacori kina na i Vola Tabu, ni sa kaya, “Sa okati vata o koya kei ira na tamata cala.”

29Era sa kuretaka na uludra ena nodra vakalialiai koya o ira era veilakoyaki tiko e kea, ka kaya, “O iko! O iko o a via vakarusa na Valenisoro ka tara tale ena tolu na siga, 30vakabulai iko mada, ka lako sobu mai na kauveilatai!”#Same 22.7; 109.25; Mari 14.58; Joni 2.19

31Era vakalialiai koya vakakina o ira na matabete e cake kei ira na daunilawa, ka ra veikayaka vakai ira, “O koya sa dau vakabulai ira na tani, e sega mada ga ni vakabulai koya rawa! 32Me lako sobu mada mai na kauveilatai ena gauna sara ga oqo na Mesaia, na nodra Tui na Isireli, ka keimami na qai vakabauti koya.”

Erau a bau vosa vakacacataki koya talega oi rau na lewe rua sa lauvako vata kaya ena kauveilatai.

Na Mate i Jisu

(Maciu 27.45-56; Luke 23.44-49; Joni 19.28-30)

33Ni sa sigalevu tutu, sa qai butobuto na vanua taucoko ka tolu na aua na kena balavu. 34Ena tolu na kaloko ena yakavi, sa qai kaci ko Jisu ena domo levu, ka kaya, “Ilai, Ilai, lama sapakacani?” E kena i balebale, “Noqu Kalou, noqu Kalou, o ni sa biuti au ena vuku ni cava?”#Same 22.1

35Era a rogoca eso vei ira ka tucake tu e kea, ka ra kaya kina, “Raica, sa kacivi Ilaijia tiko o koya.” 36Sa qai cici e dua ka tonisua e dua na vutovuto ena wai wiwi, ka vakacobara kina e dua na gasau, ka dulaka vua me gunuva, ka kaya, “Laiva mada me da raica se na sobu mai o Ilaijia me kauti koya mai ki ra se sega.”#Same 69.21

37Sa qai kaci ena domo levu ko Jisu, mai cavuka sara yani na nona i cegu.

38A sa kasei rua na i lati ni Valenisoro, mai cake ka kauta ki ra. 39Ni sa raica na turaganivalu ka tu donui koya na i vakarau ni nona mate, sa kaya, “Sa Luve ni Kalou dina ga na tamata oqo!”#Lako 26.31-33

40Era a rai tale tu ga mai vakayawa eso na yalewa ka ratou tiko ena kedra maliwa o Salome kei Meri na yalewa ni Makitala, kei Meri na tinadrau o Jemesa lailai kei Josese.#Luke 8.2,3 41O iratou o ya, e ratou a dau muri Jisu ka qaravi koya ena gauna e se tiko voli kina mai Kalili. Era a tiko talega e kea e vuqa vei ira na yalewa ka lako vata mai kei Jisu ki Jerusalemi.

Sa Bulu ko Jisu

(Maciu 27.57-61; Luke 23.50-56; Joni 19.38-42)

42A sa yakavi mai na vanua. Ia me vaka ni siga tiko ni vakavakarau na siga o ya, o ya na siga ni se bera na Siga ni Vakacecegu; 43sa mani lako kina vakadoudou vei Pailato o Josefa na kai Arimacea, ka la'ki kerea na yago i Jisu. O Josefa oqo e lewe ni Matabose, ka tamata dokai, ka dau namaka tale tikoga na yaco mai ni Matanitu ni Kalou. 44E a kidacala o Pailato ena totolo ni mate i Jisu. Sa qai kaciva o koya na turaganivalu, ka taroga vua se sa dede na nona mate, se segai. 45Ia ni sa qai kila mai vua na turaganivalu ni sa mate dina sara ko Jisu, sa qai vakadonuya vei Josefa me kauta na yagona. 46A sa volia oti tu o Josefa e dua na i sole lineni. Sa qai la'ki kauta sobu mai ki ra na yago i Jisu, ka solega ena i sulu lineni, ka la'ki vakotora ena dua na i bulubulu ka ta ena vatu. Sa qai vaqiqica kina e dua na vatu levu me sogota na katuba ni bulubulu. 47E rau a raica tu o Meri na yalewa ni Makitala, kei Meri na tina i Josese, na vanua e vakotori kina na yago i Jisu.

Currently Selected:

MARIKA 15: FNV

Highlight

Copy