VUNAU NI SORO 5

Na Cala Eso e Gadrevi kina na i Soro ni Valavala Ca

1Kevaka sa vakaroti vua e dua me soli i vakadinadina ena mataveilewai ka qai sega ni soli i tukutuku ena vuku ni ka e raica se rogoca, ena sotava o koya na i sau ni nona caka cala.

2Kevaka e dua na tamata sa tara vakacalaka e dua na ka sa sega ni savasava me vaka na yago ni manumanu mate, sa tawa savasava o koya ena gauna vata ga sa vakadinadinataka kina na cala e kitaka ka sega ni nakita.

3Kevaka e dua sa tara vakacalaka e dua na ka tawa savasava ka vu mai na yago ni tamata, sa cala o koya ena gauna ga sa vakatakilai kina na cala e kitaka.

4Kevaka e dua na tamata sa sega ni qarauna me maroroya na nona vosa ni bubului, sa qai cala ena gauna ga sa vakatakilai kina na cala e kitaka.

5Ni sa vakadinadinataka o koya na nona cala, me qai vakatusa na nona i valavala ca, 6ka kauta yani me i soro ni nona i valavala ca vei Jiova e dua na sipi se me yalewa. Ena qai cabora na i soro na bete ena vuku ni nona i valavala ca.

7Ia kevaka e sega ni volia rawa o koya e dua na sipi se na me, me qai kauta mai o koya me i soro vei Jiova ena vuku ni nona i valavala ca e rua na ruve, se rua na luve ni soqe; e dua me i soro ni valavala ca, ka dua me i soro kama. 8Me kauta vua na bete, ka na vakacabora e liu o koya na i soro ni valavala ca. Ena muloca na domona me mate ka sega ga ni musuki laivi na uluna. 9Me qai kureitaka eso na kena dra ena yasa ni cabocabonisoro; ia na kena vo ni dra me qai sova yani ki na yavu ni cabocabonisoro me drodro yani ki tuba. Oqo na i soro me kauta tani na i valavala ca. 10Me qai cabora o koya na kena i karua me i soro kama, me vaka na kena i valavala; ia me sorovaki koya na bete ena vuku ni nona i valavala ca a cakava oti, ka sa na sega ni cudruvi kina o koya.

11Ia kevaka sa sega ni volia rawa e rua na ruve se e rua na soqe, me kauta mai o koya sai valavala ca e dua na kilokaramu na valawa digitaki me i soro ni valavala ca. Me kakua ni biuta kina na waiwai se na drega dauvakamai baleta ni sai soro ni valavala ca. 12Me qai kauta vua na bete ka na yakuta na bete eso na valawa e ligana me vakatakilakilataka na i soro vakacabori vei Jiova, ka vakama ena dela ni cabocabonisoro. Oqo na i madrali laukana sa cabori me kauta tani na i valavala ca. 13Ena ka oqo sa veisorovaki kina na bete ena vuku ni i valavala ca sa cakava e dua na tamata, me vosoti kina. Sa nona i votavota na bete na vo ni i soro, me vaka na kena i vakarau ena vuku ni madrali laukana.

Na i Soro ni Veisausaumi

14A sa solia ko Jiova vei Mosese na veivakaro eso oqo. 15Kevaka e dua na tamata e caka cala ena dela ni nona lecaika, baleta ni sega ni solia na veika sa lavaki me saumi me baleta na veika tabu ni Kalou, me na kauta mai e dua na sipi tagane se dua na me tagane me nona i madrali ni veisausaumi vei Jiova. Na kena i sau me qai vakatautaki mai na kena i vakarau sa vakadonui vakalawa. 16Me sauma lesu na sausaumi ka sega ni solia taumada, ka me vakuria tale ena ruasagavulu na pasede na nona sausaumi. Me soli oqo vua na bete me cabora kina na i soro ni valavala ca, me vosoti kina o koya sa caka cala.

17Kevaka e dua na tamata e sega ni nakita na nona voroka e dua na i vakaro i Jiova, ena cudruvi ena nona caka cala ena gauna e vakadinadinataka kina. 18Me qai kauta mai vua na bete o koya na tamata sa caka cala e dua na sipi tagane se na me tagane sa sega ni ca e dua na tikina, me nona i madrali ni veisausaumi. Na kena i sau me na vakatautaki mai na kena i vakarau sa vakadonui vakalawa. Na bete ena qai sorovaka na nona i valavala ca na tamata caka cala, me vosoti kina. 19Oqo na i madrali ni veisausaumi ena vuku ni i valavala ca sa vakayacori vei Jiova.

Currently Selected:

VUNAU NI SORO 5: FNV

Highlight

Copy