VUNAU NI SORO 3
3
Na i Soro ni Veivinakati
1Kevaka e dua na tamata sa cabora e dua na madrali bulumakau me nona i soro ni veivinakati, sa dodonu me ka taucoko na bulumakau o ya ka sega na tikina e ca. 2Me qai tabaka na ulu ni manumanu e nona i madrali ena ligana, ka vakamatea ena katuba ni Vale ni Veitavaki; o ira na bete ena kawa i Eroni me ra qai kureitaka na kena dra ena tutu vava ni cabocabonisoro. 3Me qai cabora na i soro ni veivinakati vei Jiova na veika oqo: na uro sa ubia na gacagaca, kei na uro kecega sa tu ena gacagaca, 4kei na ivi ruarua, kei na tikina taleitaki ni yatena. 5O ira na bete ena kawa i Eroni me ra vakama ena dela ni cabocabonisoro oqo vata kei na i soro kama ena dela ni buka. Na i madrali e vakacabori oqo e marautaka ka boi vinaka vei Jiova.
6Kevaka sa vakacabori e dua na sipi se na me ena vuku ni i soro ni veivinakati, e rawa ni cabori na ka tagane se ka yalewa, ia me ka taucoko ga na manumanu oqori ka sega na tikina e ca. 7Kevaka sa vakacabora na lami me nona i madrali, me vakacabora o koya ena mata i Jiova. 8Me tabaka o koya na ulu ni nona i madrali ena ligana, ka vakamatea ena mata ni Vale ni Veitavaki; ia o ira na bete ena kawa i Eroni me ra kureitaka na kena dra ena tutu vava ni cabocabonisoro. 9Me qai cabora na i soro ni veivinakati vei Jiova na veika oqo: na kena uro, na tikina uro taucoko e volekata na suitu, na uro e ubia na kena gacagaca, 10na kena ivi ruarua vata kei na kena uro, kei na tikina taleitaki ni yatena. 11Me qai vakama ena dela ni cabocabonisoro na bete me i madrali laukana.
12Kevaka sa vakacabora na me, ia me vakacabori vei Jiova. 13Me tabaka na uluna ena ligana, ka vakamatea ena mata ni Vale ni Veitavaki; ia o ira na bete ena kawa i Eroni me ra kureitaka na kena dra ena tutu vava ni cabocabonisoro. 14Ia me qai cabora o koya me nona i madrali, ka me cabori ena bukawaqa vei Jiova na kena uro kece sa ubia na gacagaca, 15kei na ivi ruarua, kei na tikina taleitaki ni yatena. 16Ia me qai vakama ena dela ni cabocabonisoro na bete me madrali laukana ka me sa cabori ena bukawaqa me ka boi vinaka. Na uro kecega e sa nei Jiova.
17E tabu vua e dua na tamata e Isireli me kania na uro se na dra; na i vakaro oqo me muri ena veitabatamata kecega kei na vanua era tiko kina ka sega ni mudu.
Currently Selected:
VUNAU NI SORO 3: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
