VUNAU NI SORO 20

Totogi ni Talaidredre

1A sa vosa vei Mosese ko Jiova, ka tukuna: 2“Mo kaya tale vei ira na Isireli: Kevaka sa dua vei ira se dua na kai tani sa tiko vulagi vei ira, se solia e dua vei ira na luvena vei Moloke, me vakamatei vakaidina o koya; me ra vakaviriki koya ena vatu o ira na lewenivanua. 3Ia au na cudruva na tamata o ya, ka muduki koya tani mai vei ira na kai nona; ni sa solia e dua vei ira na luvena vei Moloke, sa vakadukadukalitaka kina na noqu vale tabu ka vakacacana na yacaqu tabu. 4Ia kevaka era sa sega ni kauwaitaka na tamata o ya o ira na lewenivanua, ena vuku ni nona a solia na luvena vei Moloke, ka ra mani sega ni vakamatei koya, 5au na qai cudruva na tamata o ya, kei na nona vuvale, ka muduki koya tani, kei ira kece era muri koya me ra vaka na yalewa dautagane ni ra sa gole vei Moloke.

6Kevaka e dua na tamata sa golevi ira na daurairai kei na dauvakatevoro, au na cudruva ka sega ni wiliki koya tale me noqu tamata. 7O koya oqo mo ni vakasavasavataki kemuni kina ka mo ni savasava, ni sai au ko Jiova na nomuni Kalou. 8Ia mo ni vakabauta na noqu vunau, ka cakava; Ni sai au ko Jiova na nomuni Kalou, o koya sa vakasavasavataki kemuni.

9Sa solia ko Jiova na i vakaro eso oqo. Kevaka e dua na tamata e vosavakacacataka na tamana se tinana, e dodonu me vakamatei; ni sa baleti koya ga na nona mate.#Lako 21.17; Maciu 15.4; Mari 7.10

10Kevaka e dua na tagane sa veibutakoci kei na watina na kai nona, me rau vakamatei ruarua vakaidina, o koya na tagane sa dauyalewa, kei koya na yalewa sa dautagane.#Lako 20.14; Vsoro 18.20; Vrua 5.18 11Na tagane sa mocera e dua vei ira na wati tamana sa beci tamana, ka me rau vakamatei ruarua na tagane kei na yalewa o ya. Sa baleti rau ga na nodrau mate.#Vsoro 18.8; Vrua 22.30; 27.20 12Kevaka e dua na tagane sa mocera na wati koya na luvena tagane, me rau na vakamatei vakaidina; e rau sa veimoceri vakaveiwekani dina ka sa baleti rau ga na nodrau mate.#Vsoro 18.15 13Kevaka e dua na tagane sa mocera e dua tale na tagane, e rau sa kitaka na ka vakasisila ka me rau na vakamatei ruarua. Sa baleti rau ga na nodrau mate.#Vsoro 18.22 14Kevaka e dua na tagane sa vakawatitaka e dua na yalewa vata kei koya na tinana, e dodonu me ratou vakamai tolutolu ena bukawaqa baleta ni ratou sa vakayacora e dua na i tovo vakamadua levu; me kakua ni yaco vei kemuni na mataqali i vakarau vakaoqo.#Vsoro 18.17; Vrua 27.23 15Kevaka sa veiyacovi kei na manumanu e dua na tagane, e dodonu me vakamatei vakaidina o koya na tagane kei na manumanu.#Lako 22.19; Vsoro 18.23; Vrua 27.21 16Kevaka e dua na yalewa sa torova e dua na manumanu me veiyacovi kaya, mo ni vakamatea na yalewa ka vakakina na manumanu; sa baleti rau ga na nodrau mate.

17Kevaka e dua na tagane sa vakawatitaka na ganena, ke mani luve i tamana se luve i tinana, e dodonu me rau cudruvi ena matanalevu ka vakatalai tani mai vei ira na veiwekani. Sa moceri ganena o tagane ka sa dodonu kina me colata na i sau ni nona caka cala.#Vsoro 18.9; Vrua 27.22 18Kevaka e dua na tagane sa mocera e dua na yalewa sa yacovi koya tiko na nona matenivula, me rau vakatalai tani ruarua mai vei ira na veiwekani baleta ni rau sa voroka na lawa e vauca na dukadukali ni matenivula ni yalewa.#Vsoro 18.19

19Kevaka e dua na tagane sa mocera na taci tinana se ganei tamana, me rau cudruvi ruarua ka colata na i sau ni cala ni veiyacovi vakaveiwekani veivolekati.#Vsoro 18.12-14 20Kevaka e dua na tagane sa mocera na wati tamana lailai se na vugona, sa vakamadualaki tamana lailai se na vugona. Na tagane kei na yalewa e rau na sotava na kedrau i totogi, ka rau na sega ruarua ni vakaluveni. 21Kevaka e dua na tagane sa vakawatitaka na watina na tuakana se tacina, oqo na ka velavela: sa vakamaduataka na tuakana se na tacina o koya; ena sega na luvedrau.#Vsoro 18.16

22Mo ni muria na noqu lawa kecega kei na noqu i vakaro kecega, me kakua kina ni luaraki kemuni na vanua o Kenani, na vanua au sa kauti kemuni tiko kina. 23Kakua ni muria na nodra i valavala na tamata mai kea; au na vakasavi ira tani mo ni curuma kina na loma ni vanua. Sa velavela vei au na nodra i valavala vakasisila. 24Ia au sa yalataka oti vei kemuni mo ni taukena na vanua sautu ka bulabula oqo, au na solia vei kemuni. Ni sai au ko Jiova na nomuni Kalou; ni sai au ka tawasei kemuni tani mai vei ira na veimatanitu kecega. 25Sa kilikili kina mo ni kila na manumanu sa savasava kei na kena sa sega ni savasava. Kakua ni kania na manumanu sa sega ni savasava. Au sa tukuna ni ra sa tawa savasava, ka ra na vakadukadukalitaki kemuni kevaka o ni kania. 26Ia mo ni yalosavasava vei au ni'u sa yalosavasava oi au ko Jiova. Au sa tawasei kemuni tani mai vei ira na veimatanitu, mo ni sa noqu tamata duadua ga.

27Kevaka e dua na tagane se yalewa sa daucurumi se daurairai me na vakaviriki ena vatu me yacova na nona mate; o ira era cakava oqo e sa baleti ira ga na nodra mate.

Currently Selected:

VUNAU NI SORO 20: FNV

Highlight

Copy