VUNAU NI SORO 19

Vakarau ni Bula Vakayalo kei na Dodonu

1Sa tukuna vei Mosese ko Jiova 2me vosa vei ira taucoko na lewenivanua e Isireli ka kaya vei ira: “Mo ni savasava, ni'u sa savasava oi au ko Jiova, na nomuni Kalou.#Vsoro 11.44-45; 1Pita 1.16 3Na tamata kecega me vakarokorokotaka na tamana kei na tinana, ka mo ni vakatabuya na noqu Siga ni Vakacecegu: Sai au, ko Jiova, na nomuni Kalou.#Lako 20.12; Vrua 5.16

4“Kakua ni golevi ira na kalou lasu, se bulia na nomuni kalou matakau mai na ka sa vakawaicalataki: Ni sai au ko Jiova na nomuni Kalou.#Vsoro 26.1; Lako 20.23; 34.17; Vrua 27.15

5“Ni o ni sa vakacabora na i soro ni veivinakati vei Jiova, mo ni vakacabora ena i valavala me na vakadonui kina. 6Me laukana ga ena siga o ni sa cabora kina, se ena mataka ka tarava; ia me vakamai ena bukawaqa na kena vo ena i katolu ni siga. 7Kevaka sa laukana e dua na tikina ena kena i katolu ni siga, sa na ka e vakasisilataki; ena sega ni vakadonui. 8Ia o ira kecega era kania era na cudruvi ena nodra caka cala, ni ra sa cakava me ka wale na ka sa tabu vei Jiova; ia na tamata o ya ena sega ni wiliki tale vakadua me noqu tamata.

9Ni o ni sa tamusuka na vuata ni nomuni vanua, mo ni kakua ni tamusuka kece sara ki na tutu ni nomuni veiwere, ka kakua ni tomika na kena i vovo ni sa oti na tatamusuki.#Vsoro 23.22; Vrua 24.19-22 10Mo ni kakua ni lesu tale ki na nomuni loganivaini mo ni la'ki vetia na i soso qerepi o ni a calata, se tomika na qerepi era sa lutu ki na qele; mo ni laiva tu yani me nodra na dravudravua kei ira na vulagi. Sai au ko Jiova, na nomuni Kalou.

11“Mo ni kakua ni butako, se cakacaka vakailasu, se vosa lasu vua e dua tale na tamata.#Lako 20.15,16; Vrua 5.19,20 12Mo ni kakua ni bubului vakailasu ena yacaqu kevaka o ni sega dina ga ni via maroroya na veiyalayalati, baleta ni vakamadualaka na yacaqu na ka oqo. Sai au ko Jiova, na nomuni Kalou.#Lako 20.7; Vrua 5.11; Maciu 5.33

13“Mo kakua ni lawakitaka na kai nomu, se butakoci koya. Mo kakua ni vesuka na kena i sau na nomu tamata cakacaka me yacova na mataka ka tarava.#Vrua 24.14-15 14Mo kakua ni vosavakacacataka e dua na tamata didivara, se biuta e dua na ka ena nona sala na mataboko me tarabe kina; ia mo rerevaki koya na nomu Kalou: Sai au, ko Jiova.#Vrua 27.18

15“Mo kakua ni vakatanitaka na lewa dodonu; mo kakua ni vakaduiduitaki ira na dravudravua mai vei ira na vakaitutu lelevu, ia mo tauca ga na lewa dodonu vua na kai nomu.#Lako 23.6-8; Vrua 16.19 16Mo kakua ni veilakoyaki voli me vaka e dua na daukakase ena kedra maliwa na kai nomu; ka mo kakua ni vakaleqa na nona bula na kai nomu: Sai au, ko Jiova.

17“Mo kakua ni cata na wekamu e lomamu. Mo vunauca vakadodonu na kai nomu, mo kakua kina ni wasea vata kei koya na nona cala.#Maciu 18.15 18Mo kakua ni via sauma lesu na ca, se yalo ca vua na wekamu: ia mo lomana na wekamu me vaka o sa lomani iko: sai au oqo ko Jiova.#Maciu 5.43; 19.19; 22.39; Mari 12.31; Luke 10.27; Roma 13.9; Kala 5.14; Jeme 2.8

19“Dou muria na noqu i vunau. Mo kakua ni laiva na nomu manumanu yava i va me la'ki vakawa vua na manumanu tani; mo kakua ni kaburaka e rua na mataqali sore ni tei ena nomu i teitei; mo kakua talega ni dara na i sulu sa caka mai na rua na mataqali i sulu.#Vrua 22.9-11

20Kevaka e dua na yalewa bobula sa musuki me watina lailai e dua na tagane, ka se bera ni sereki vakailavo me soli kina vua na galala, ia ka rau qai veimoceri kei na dua tale na tagane, erau na cudruvi. Ia erau na sega ga ni vakamatei, baleta ni sa bera ni galala mai na bobula o yalewa. 21Ia me kauta mai o tagane ka cala e dua na sipi tagane ki na katuba ni Vale ni Veitavaki me nona i madrali ni veisausaumi se i soro ni cala vei Jiova. 22Me qai sorovaki koya na bete ena kena cabori na sipi tagane me i soro ni nona caka cala e mata i Jiova; ena qai vosoti koya kina na Kalou.

23Ni o ni sa yaco ki na vanua o Kenani ka teivaka na veimataqali kau vuata kecega, mo ni okata na vuanikau kece e basika ena i matai ni tolu na yabaki me ra tawa savasava. Me kakua sara ni laukana ena loma ni gauna oqori. 24Ena i kava ni yabaki, mo ni qai vakacabora na vuanikau taucoko sara me nomuni i soro ni vakavinavinaka vei au ko Jiova na nomuni Kalou. 25Ia mo ni qai kania na vuadra ena kena i kalima ni yabaki. Ena vuku ni ka oqo ena qai vuavuai vinaka kina na vuadra vei kemuni. Ni sai au ko Jiova na nomuni Kalou.

26Mo ni kakua ni kania e dua na lewe ni manumanu sa tu kina na kena dra. Mo ni kakua talega ni vakaluveniwai se qaravi tevoro.#Vteki 9.4; Vsoro 7.26-27; 17.10-14; Vrua 12.16,23; 15.23; 18.10 27Mo ni kakua ni kotiva me mokimokiti na tutu ni vacumuni, se toroya na tutu ni kumimuni.#Vsoro 2.5; Vrua 14.1 28Mo ni kakua ni tavalaka na yagomuni me i loloku ni mate, se samuqawetaka na yagomuni: Ni sai au ko Jiova.

29“Mo ni kakua ni vakalolomataki ira na luvemuni yalewa ena nomuni soli ira yani me ra bete yalewa ni burekalou;#19.29 bete yalewa ni burekalou: Era kunei na yalewa dautagane vakaoqo (temple prostitutes) ena nodra veiburekalou na kai Kenani, ena sokalou vua na kalou ni vuavuai (fertility god). Era vakabauti ni nodra veiyacovi kei ira na bete yalewa ni burekalou e dau vakavuna me tubu bulabula ka vuavuai vinaka kina na i teitei kei na qele ni manumanu. ke o ni sa kitaka oqo, o ni na vuki tani ka qarava na veikalou tani eso ka sinai kina na vanua ena i valavala vakasisila.#Vrua 23.17 30Ni vakatabuya na noqu veisiga ni vakacecegu, ka vakarokorokotaka na noqu vale tabu: Ni sai au ko Jiova na nomuni Kalou.#Vsoro 26.2

31“Kakua ni golevi ira na dauvakatevoro se daurairai, baleta ni o ni na vakadukadukalitaki kina. Ni sai au ko Jiova na nomuni Kalou.#Vrua 18.11; 1Samu 28.3; 2Tui 23.4; Aisea 8.19

32“Mo ni nanumi ira na qase sara, ka vakarokorokotaki ira, ka rerevaka na nomuni Kalou. Ni sai au ko Jiova.

33“Ia kevaka sa tiko vulagi kei kemuni ena nomuni vanua eso na kai tani, mo ni kakua ni vakasosataki ira.#Lako 22.21; Vrua 24.17-18; 27.19 34Me ra okati na kai tani sa tiko vulagi kei kemuni me ra vakataki ira ga na i taukei ena kemuni maliwa; ia mo ni lomani ira me vaka o ni sa lomani kemuni. Mo ni nanuma ni o ni a tiko vulagi mai na vanua o Ijipita ena dua na gauna. Sai au ga ko Jiova na nomuni Kalou.

35“Kakua ni lawakitaka e dua na tamata ena kena tukuni vakailasu na balavu ni dua na ka, se na kena bibi, se na kena levu.#Vrua 25.13-16; Vbale 20.10; Isi 45.10 36Ia me vakayagataki ga vakasavasava na i vakarau dodonu ni ka, se na kena bibi, se balavu. Ni sai au ko Jiova na nomuni Kalou, o koya ka kauti kemuni tani mai na vanua o Ijipita. 37Mo ni vakabauta na noqu i vakaro kei na lawa taucoko sara. Ni sai au ko Jiova.

Currently Selected:

VUNAU NI SORO 19: FNV

Highlight

Copy