VUNAU NI SORO 10

Na i Valavala Ca i Netapi kei Epaiu

1O rau o Netapi kei Epaiu na luve i Eroni sa kauta yani na nodrau dui miqa ni ka boi vinaka, ka biuta kina na qilaiso katakata, ka wakia vata kei na ka boi vinaka, ka vakacabora vei Jiova. Ia na bukawaqa ni nodrau vakacaboisoro sa tawa savasava, baleta ni a sega ni vakarota ko Jiova me rau cabora. 2E vakasauri na nona tala yani na nona bukawaqa ko Jiova, ka vakamai rau, ka rau a mate ena mata i Jiova. 3A sa qai kaya vei Eroni o Mosese, “Oqo na ka a vosataka ko Jiova, ni a kaya, ‘Au na vakaraitaki au ni'u sa savasava vei ira era sa toro voleka vei au; ka'u na vakatakila na noqu lagilagi vei ira na noqu tamata.’ ”#10.3 ka'u na vakatakila na noqu lagilagi vei ira na noqu tamata; se ka me ra vakarokorokotaki au na noqu tamata. A sa galu ga o Eroni.

4O Mosese e qai kacivi rau o Misaeli kei Ilisavani, na luve i Usieli, na tama i Eroni lailai, ka kaya vei rau, “Drau lako mai ka laveta tani yani na yagodrau na wekamudrau mai na mata ni vale tabu ka la'ki biuta ena taudaku ni i tikotiko.” 5E rau a lako yani, ka taura na nodrau i sulu na mate ka kauti rau yani ki na taudaku ni i tikotiko me vaka a kaya o Mosese.

6Sa qai vosa o Mosese vei Eroni kei rau talega na luvena o Iliesa kei Icama, ka kaya, “Dou kakua ni laiva na drau ni ulumudou me veituyaki ka sega ni seruti, se dresulaka na nomudou i sulu, me vakatakilai kina na nomudou rarawa. Kevaka dou cakava oqo, dou na mate, ka na yaco talega na cudru ni Kalou ki na lewenivanua kece. Ia o ira kecega na wekamudou na Isireli era na vakatarai me ra tagicaka na mate oqo sa vu mai na kama e vakavuna ko Jiova. 7Dou kakua ni biuta na katuba ni Vale ni Veitavaki de dou mate, baleta ni dou sa vakatabui ena waiwai ni veilumuti nei Jiova.” E ratou a muria vakakina na vosa i Mosese. 8A sa vosa vei Eroni ko Jiova ka kaya, 9“Dou kakua ni gunuva na waini se dua na gunu kaukauwa ni veivakamatenitaki, vei iko se o iratou na luvemu ni dou sa curu ki na Vale ni Veitavaki, de dou mate. Oqo me i vakarau tawa mudu vei ira kece na nomudou kawa. 10Dou vakatakilakilataka na ka e tabu mai na ka e sega ni tabu, kei na ka e sega ni savasava mai na ka e savasava. 11Dou vakavulici ira na Isireli ena vunau kecega au sa solia vei kemudou mai na gusu i Mosese.”

12A sa kaya o Mosese vei Eroni, kei rau na luvena sa vo, o Iliesa kei Icama, “Dou taura na i madrali laukana sa vo ena ka sa cabo ena bukawaqa vei Jiova, ka kania ni sa sega ni vakatubutaki. Dou kania oqo ena yasa ni i cabocabonisoro, ni sa ka tabu sara.#Vsoro 6.14-18 13Dou kania ena dua na tikina tabu, baleta ni oqo sa kemudou i votavota kei rau na luvemu mai na i madrali sa cabo ena bukawaqa vei Jiova. Sa vakaroti au ena veika oqo ko Jiova. 14Ia na serena sa laveti cake kei na sagana sa cabori, dou kania ena dua na tikina savasava; o iko kei rau na luvemu tagane kei iratou na luvemu yalewa; ni sa soli me kemudou i votavota, kei iratou na luvemu, mai na nodra i madrali ni i soro ni veivinakati na Isireli.#Vsoro 7.30-34 15Me ra kauta mai na sagana kei na serena ena gauna sa vakacabori kina na kena uro me i madrali laukana vei Jiova. Na veitikina oqo sa nomudou i wasewase kei ira na luvemudou me tawa mudu me vaka sa vakarota ko Jiova.”

16A taro o Mosese me baleta na me, ka i soro ni valavala ca, ka qai kila e muri ni sa vakamai oti. Sa tubu cake na nona rarawataki rau o Iliesa kei Icama, o rau na luve i Eroni tagane sa vo, ka kaya. 17“Na cava na vuna o drau sega kina ni kania na i soro ni valavala ca ena tikina tabu? Sa kakana tabu sara oqo, ka sa solia ko Jiova oqo vei kemudou me rawa kina ni vosoti na nodra i valavala ca na lewenivanua, me ra sorovaki kina ena mata i Jiova.#Vsoro 6.24-26 18Me vaka ni a sega ni kau yani na kena dra ki na tikina e loma sara ni vale tabu, e dodonu mo dou a kania ga e kea na i madrali, me vaka au a vakarota.” 19A sauma o Eroni, “Kevaka beka au a kania na i soro ni valavala ca edaidai, ena vinaka li ena mata i Jiova? Raica, era sa cabora na tamata edaidai na nodra i soro ni valavala ca kei na i soro kama, ia na veika dredre ka vakadomobula sa yacovi au ga.” 20Ia ni rogoca oqo o Mosese, a sa yalovakacegu kina.

Currently Selected:

VUNAU NI SORO 10: FNV

Highlight

Copy