JOSUA 2
2
Sa Talai na Yamata Vuni ki Jeriko
1Sa qai talai rau vakavuni e rua na yamata ena keba mai Sitimi o Josua, ka tukuna vei rau, “Drau la'ki vakaraica vinaka na vanua, ka vakabibi na koro o Jeriko.” Ni rau yaco yani ki Jeriko, e rau sa mani curu sara ki na nona vale e dua na yalewa dautagane, na yacana o Reapi, ka tiko kina.#Ipe 11.31; Jeme 2.25 2A sa rogoca na tui Jeriko ni ra a lako mai ena bogi eso na Isireli me ra mai vakadikeva na vanua taucoko. 3Sa qai vakauta sara e dua na i tukutuku vei Reapi: “Oi rau na tagane, ka tiko oqori ena nomu vale e rau yamata. E rau lako mai me vakadikeva na vanua taucoko! Soli rau mai!” 4Ia o Reapi ni sa vunitaki rau oti, sa tukuna, “Io! E lewe rua na tagane, e rau sa lako mai vei au, ia au sega ga ni kila se rau lako mai vei. 5E rau sa lako oti eke, ni sa karobo sobu na vanua, donuya na gauna sa dau sogo kina na matamata levu ni koro. Sega ga ni macala vei au na yasana e rau gole kina. Ni cici muri rau. Kevaka o ni vakatotolo e rawa ni o ni toboki rau.” 6(Oi rau na yamata ni Isireli, e rau a tiko ga ena delavuvu ni vale, ena vanua ga sa vunitaki rau kina o Reapi) 7Era sa qai biuta na koro o ira na tamata ni tui, ka sa sogo sara na matamata levu. Era sa vakasaqaqara me yaco sara yani ki na bati ni uciwai na Joritani.
8Ni bera ga ni rau davo sobu ka moce na yamata ni Isireli, a lako cake yani o Reapi, 9ka tukuna vei rau, “Au kila ni sa solia vei kemuni ko Jiova na vanua oqo. Era sa domobulataki kemuni o ira kece na lewenivanua oqo. 10Keimami sa rogoca na i valavala ni nomuni lako ena vanua mamaca ena loma ni Wasa Damudamu sa cakava ena vukumuni ko Jiova, ena gauna o ni a lako tani kina mai Ijipita. Keimami sa rogoca talega na nomuni vakamatei Sioni kei Oki, na nodra tui na Amoraiti ena tokalau ni Joritani.#Lako 14.21; Tiko 21.21-35 11Ia ni keimami a rogoca, sa tarai keimami na rere; ka sa duatani na neimami taqaya ena vukumuni. Ko Jiova na nomuni Kalou sa Kalou ni lomalagi e cake kei na vuravura talega e ra. 12Mo drau yalataka mada ena vuku i Jiova ni o drau na cakava ki na noqu matavuvale me vaka na noqu vinaka oqo vei kemudrau. Drau solia e dua na i vakatakilakila me'u vakadinati kemudrau kina, 13ni na maroroi na bula nei tamaqu kei tinaqu, nei ganequ, taciqu kei na dui wekadratou! Me kakua sara ni keitou vakamatei!”
14E rau sa qai tukuna na yamata, “Keirau bolea me keirau mate ena vukumudou! Kevaka o na sega ni tukuna vua e dua na veika keirau sa mai vakacakava, keirau yalataka ni keimami na caka vinaka vei iko ena gauna sa solia kina vei keimami na vanua oqo ko Jiova.”
15Sa qai tukuci rau sobu mai katubaleka ena dua na dali, ka ni vale nei Reapi e toka e yasa ni lalaga ni bainikoro. 16Sa tukuna tale vei rau o Reapi, “Drau muria na sala ena vanua veidelana mo drau calati ira kina na tamata ni tui. Vunitaki kemudrau mai kea me siga tolu, ka qai tomana tale na nomudrau i lakolako ni drau raici ira na tamata ni tui ni ra lesu tale mai.”
17Rau sa qai tukuna vua o rau na yamata, “Keirau na nanuma toka na vosa ni yalayala o sa vakavuna me keirau cakava. 18Oqo na ka mo cakava. Ni keimami sa toso mai me valuta na nomuni vanua, vesuka sara na wa damudamu oqo, ki na katubaleka o a tukuci keirau sobu mai kina. Kauti iratou mai, na tamamu kei na tinamu, o iratou na ganemu kei na vuvale kece nei tamamu, ka vakasoqoni iratou e loma ni nomu vale. 19Kevaka e dua vei kemudou sa curu ki tautuba ni vale, na nona mate ena bale ga vua, keirau na sega ni beitaki kina. Kevaka e dua e vakaleqai na nona bula, ena loma ni nomu vale, na nona mate ena bale vei keirau. 20Ia kevaka o vakaraitaka vua e dua na veika keirau sa cakava, sa na sereki mai na vosa ni yalayala keirau cakava vei iko.” 21Sa qai tukuna o Reapi, “Io, me yaco ga me vaka na nomudrau vosa.” Ni sa vakatalai rau yani sa taura cake na wa damudamu ka vesuka ki na katubaleka.
22Ni rau lako yani na yamata, e rau sa gole sara vaka ki na veidelana ka vunitaki rau kina. Era vakasaqarai rau ena veiyasana kecega o ya me siga tolu, ka ra lesu tale ki Jeriko, ni ra sa sega ni kunei rau. 23E rau sa qai siro mai na veidelana na yamata, a rau takosova na uciwai na Joritani me rau lesu tale vei Josua. A rau sa qai tukuna vua na veika kece sa yaco, 24ka tukuna, “Sa dei na yalo i keirau ni sa solia vei keda ko Jiova na vanua taucoko. Era sa domobulataki keda o ira kecega na tamata.
Currently Selected:
JOSUA 2: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
