JONA 2
2
Na Masu i Jona
1A sa masu o Jona vei Jiova na nona Kalou mai na loma ni kete ni ika, ka kaya,
2“I Jiova, au sa kaci yani vei kemuni
Ena dela ni noqu rarawa,
Ka o ni sa sauma na noqu kaci.
Mai bulu, na vuravura ni mate
Au sa masuta na nomuni veivuke
Ka o ni sa rogoci au mai.
3O ni a biuti au ki na wasa liwa titobu,
Ki na boto ni sauloa,
Ki na vanua sa voliti au kina na wai,
Ka sa viviraki au na nomuni biau lelevu.
4Au sa nanuma wale ga
De'u sa tawasei tani mai na matamuni
Ka sega ni raica tale na nomuni vale tabu.
5Sa ubi au na wai ka'u voleka ni luvu;
Sa ubi au vakadua na wasawasa,
Ka viviraka na uluqu na lumi ni waitui.
6Au sa lutu dromu sara ki na vu ni veiulunivanua,
Ena vanua sa sogolati vakadua na kena matamata.
Ia oi kemuni Jiova, na noqu Kalou
O ni sa vueti au bula tale mai na rusa.
7Ni'u vakila ni sa seyavu yani na noqu bula,
Ia ka'u sa qai masuti kemuni, i Jiova,
Ka o ni sa rogoci au mai na nomuni vale tabu.
8O ira sa dauqarava na veimatakau tawayaga
Era sa biuta tani na nodra yalodina vei kemuni.
9Ia oi au, ka'u na seretaki kemuni ga;
Ka'u na vakacaboisoro vei kemuni,
Ka cakava na ka au sa yalataka.
Sa vu ga mai vei Jiova na veivakabulai!
10A sa qai vakarota na ika ko Jiova me luaraki Jona ki matasawa, a sa yaco me vakakina.
Currently Selected:
JONA 2: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
