IPERIU Na i Vakamacala Taumada
Na i Vakamacala Taumada
Na i Vola vei Ira na Iperiu sa volai kivei ira e dua na i lawalawa tamata vakabauta Vakarisito era a sota kaya voli vakavuqa na veivakacacani ena loma ni lotu, ka ra yacova e dua na draki ni bula vakayalo dredre sara ena nodra sa via biuta tani na vakabauta Vakarisito. A sa veivakayaloqaqataki kina o koya e vola na Iperiu vei ira oqo ena nona vakaukauwataka na nodra vakabauta ni tukuna vei ira ni sai tukutuku dina na nona vakatakilai koya mai na Kalou vei Jisu Karisito, ka sai otioti talega ni nona vakatakilai koya vakaoqo na Kalou. Ena nona vakayacora oqo, a sa vakadreta kina e tolu na ka bibi. (1) Ni sai Jisu na Luve ni Kalou, o koya sa vulica na bula ni talairawarawa vakaidina vei Tamana mai na veika rarawa sa vosota voli mai. Me vaka ni sa Luve ni Kalou, sa cecere cake kina ko Jisu vei ira na parofita ni Veiyalayalati Makawa, vei ira na agilosi, ka vakakina vei Mosese. (2) A sa vakaraitaka na Kalou ni sai Jisu ga na bete tawamudu, ka sa cecere cake o koya mai vei ira na bete ni Veiyalayalati Makawa. (3) Ena vuku i Jisu duadua ga, sa vakabulai kina na tamata vakayadua sa vakabauta mai na i valavala ca, na rere, vata kei na mate. Ia ko Jisu, me vaka ni sa Bete Levu o koya, sa solia na veivakabulai dina, na kena ka a raici vakatayaloyalo tu ga ena kena qaravi na i nodra i valavala ni sokalou na Iperiu kei na cabori ni manumanu ena vanua ni vakacaboisoro.
Mai na kena taurivaki na yacadra na tamata kilai ka rogo eso ena volaitukutuku kei Isireli (Wase 11) me i vakaraitaki ni nodra vakabauta, a sa vakamamasu kina o koya e vola na Iperiu me ra vakadeitaka tikoga na nodra vakabauta o ira kece sara era na wilika na i vola oqo. Ena wase 12, a sa vakauqeti ira me ra yalodina tikoga me yacova na i vakataotioti, io me ra raici Jisu vagumatua tikoga, ka me ra vosota talega na veika rarawa kei na veivakacacani ena yacovi ira. E tinia na i vola oqo ena veivosa ni veivakaroti kei na i vakasala eso.
Na Lewe ni Vola
A Kena i Kau: O Karisito na i vakaraitaki taucoko ni Kalou 1.1-3
Sa cecere cake ko Karisito vei ira na agilosi 1.4—2.18
Sa cecere cake ko Karisito vei Mosese kei Josua 3.1—4.13
Na cecere ni tutu vakabete i Karisito 4.14—7.28
Na cecere ni veiyalayalati i Karisito 8.1—9.28
Na cecere ni sorovaki i Karisito 10.1-39
Sa bibi ni vakabauta 11.1—12.29
Na vakalomavinakataki ni Kalou 13.1-19
Na masu ni veivakalougatataki 13.20-21
Na kena i tinitini 13.22-25
Currently Selected:
IPERIU Na i Vakamacala Taumada: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.