VAKATEKIVU 20

O Epara-ama kei Apimeleki

1Sa biuta na vanua o ya o Epara-ama ka lako yani ki na yasana vaka ki na ceva, ka la'ki vakaitikotiko ena kedrau veimama o Katesi kei Suri. Ena dua na gauna e muri ni a tiko vakavulagi mai Kira, 2sa qai kaya ni ganena o Sera na watina. Sa qai lewa o Apimeleki na tui Kira me kau yani vua o Sera.#Vteki 12.13; 26.7 3Ena kena bogi, sa rairai vei Apimeleki na Kalou ena tadra, ka kaya, “O sa na mate ena vuku ni yalewa vakawati o sa taura oqo.”

4Ia o Apimeleki sa sega ni bau veiyacovi kei Sera, ka sa kaya kina vei Jiova, “Kemuni na noqu Turaga, sa sega na noqu cala! O ni na vakamatei au beka kei ira na noqu tamata? 5O Epara-ama e kaya ni ganena o Sera, o Sera talega e kaya ni ganena o Epara-ama. Au sa cakava na ka oqo ena noqu a vakasamataka sara vakavinaka, ka'u sega kina ni cala ena dua na ka.”

6Sa qai sauma na Kalou ka kaya, “Au kila ni o sa vakasamataka vakavinaka, ia sai au ga ka'u tarovi iko mo kakua ni valavala ca vei au, ena vuku ni ka oqo au a sega kina ni laivi iko mo tarai koya. 7Ia oqo mo vakasuka tale na yalewa vua na watina. O koya e dua na parofita, ka na masulaki iko o koya, mo kakua ni mate. Ia kevaka o sega ni vakasukai koya, o na mate vakaidina; o iko kei na lewe ni nomu vuvale kece sara.”

8Ena mataka lailai ka tarava sa kacivi ira kece sara na nona dauveiqaravi o Apimeleki, ka kaya vei ira na ka kece, ka ra sa rere vakalevu. 9Sa qai kacivi Epara-ama o Apimeleki ka kaya vua, “A cava o sa cakava vei keimami? Na cala cava au a cakava vei iko mo cakava kina vei au kei na noqu matanitu na ka ca levu oqo? E sega ni dodonu me dua e cakava vei au na ka o sa cakava oqo. 10A cava o sa nanuma tiko, o sa cakava kina na ka oqo?”

11Sa qai sauma o Epara-ama ka kaya, “Au nanuma ga ni sega ni dua e rerevaka na Kalou ena vanua oqo, ia era na qai vakamatei au ena vuku ni watiqu. 12E ganequ dina ga o Sera, ni keirau sa tama vata ia e duatani ga na tinana, ka sa yaco me watiqu. 13Ena gauna sa vakavuna kina na Kalou me'u biuta na vale nei tamaqu ka lako yani ki na vanua tani, au sa kaya vua, ‘Raica, ena veivanua kece sara daru lako kina, mo na kaya ni o sa ganequ, ka mo na vakaraitaka kina na nomu yalodina vei au.’ ”

14Ena gauna a vakasukai Sera kina o Apimeleki vei Epara-ama, a solia talega vua eso na sipi, eso na bulumakau, ka vakakina eso na dauveiqaravi yalewa kei na tagane. 15A sa kaya vei Epara-ama, “Raica, na noqu vanua taucoko sa tu oqori e matamu, lewa ga na vanua o vinakata mo tiko kina” 16A sa kaya vei Sera, “Au sa solia vua na watimu e dua na udolu na tiki ni siliva me i vakadinadina vei ira kece era tiko kei iko ni sega ni dua na nomu cala, era na kila kece ni o sega ni cala ena dua na ka.”

17A sa sogota ko Jiova na ketedra na yalewa ena vuvale i Apimeleki me ra kakua ni vakaluveni ena vuku i Sera na wati Epara-ama. 18Sa qai masulaki Apimeleki o Epara-ama vua na Kalou me vakabulai koya. A sa vakabula talega na wati Apimeleki na Kalou kei ira na nona yalewa dauveiqaravi, ka me ra vakaluveni rawa tale.

Currently Selected:

VAKATEKIVU 20: FNV

Highlight

Copy