VAKATEKIVU 18
18
Sa Yalataki na Sucu i Aisake
1Sa rairai vei Epara-ama ko Jiova ena veioki mai Mamire. A dabe toka o Epara-ama ena katuba ni nona valelaca ena gauna a katakata sara kina na siga. 2Ena gauna e tacake kina, sa qai raica e tolu na tamata ni ratou tucake voleka tu e kea. A sa cici yani me tavaki iratou, ka cuva sobu ki na qele,#Ipe 13.2 3ka kaya “Kemudou saka na noqu Turaga, au kerea mo dou kakua ni lako sivita na noqu i tikotiko ka sega ni bau vakacegu mada kina; au sa tu oqo oi au me'u qaravi kemudou. 4Me'u kauta mada mai na wai me savui kina na yavamudou; ka mo dou vakacegu vakalailai ena ruku ni vunikau. 5Me'u la'ki kauta talega mai eso na kakana mo dou vakaukauwataki kina, ni bera ni dou qai tomana na nomudou i lakolako. Ni dou sa yaco mai vakaoqo ki na noqu vale, sa noqu i tavi me'u qaravi kemudou.”
E ratou sa kaya, “Sa vinaka; mo cakava ga me vaka o sa kaya.”
6A vakusakusa yani o Epara-ama ki na loma ni valelaca, ka kaya vei Sera, “Totolo, mo taura mada eso na valawa vinaka sara, ka bulia kina eso na madrai.” 7A sa cici yani o Epara-ama ki na qele ni bulumakau, ka digitaka mai e dua na luve ni bulumakau uro ka yago vinaka, ka solia vua e dua na dauveiqaravi, ka sa vakarautaka sara vakatotolo. 8Sa kauta eso na kirimu, na sucu, kei na lewe ni bulumakau, ka vakarautaka e matadratou. Ia ni ratou kana tiko, sa duri volekati iratou tu o Epara-ama e ruku ni vunikau.
9E ratou sa qai tarogi koya, “Evei o Sera na watimu?”
A sa kaya o koya, “E tiko e loma ni valelaca;”
10Sa qai kaya cake mai e dua vei iratou, “Au na lesu tale mai ka mai raici iko ena gauna vata oqo ena yabaki mai oqo, ka sa na vakasucuma kina o Sera e dua na luvemu tagane.”#Roma 9.9
Ia sa rogoca o Sera na vosa o ya mai na katuba ni valelaca e daku i Epara-ama. 11E rau sa qase sara o Epara-ama kei Sera, sa mudu talega ni tauvi Sera na kena mate vakamarama. 12A sa dredre voli ga e lomana o Sera ka kaya, “Au sa qase sara ka sa qase talega na watiqu; au na marautaka li na tiko vata?”#1Pita 3.6
13Sa qai tarogi Epara-ama na Turaga ka kaya, “A cava e dredre kina o Sera ka kaya, ‘Ena rawa li ni dua na luvequ ni'u sa rui qase.’ 14Sa dua li na ka e dredre vua na Turaga? Ena gauna vata vakaoqo ena yabaki ka tu mai au na mai sikovi iko tale, ka sa na dua tiko kina na luvei Sera e gonetagane.”#Luke 1.37
15A sa kaya o Sera ena rere, “Au a sega ni dredre,” A sauma na Turaga ka kaya, “Io, o a dredre dina.”
Nona Vakamamasu o Epara-ama me Baleti Sotoma
16E ratou sa qai cavutu na tamata ka lako yani ki na dua na vanua sa rawa me ratou rai sobu kina ki Sotoma; sa lako vata kei iratou o Epara-ama me la'ki talaci iratou yani. 17A sa kaya e lomana na Turaga, “Me'u na vunitaka li vei Epara-ama na ka au sa vakarau cakava? 18O ira na nona kawa ena yaco me matanitu levu ka qaqa, ka'u na vakalougatataka na veimatanitu kece ena vukuna. 19Au sa digitaki koya me na muria na noqu veiyalayalati ka cakava na ka vinaka kei na ka dodonu. Au na qai vakayacora na ka kece au sa yalataka.”
20A sa kaya na Turaga, “Sa rui levu na ka ca e rogo baleti Sotoma kei Komora, ka sa sivia sara ga na nodra i valavala ca. 21Au sa lako sobu mai me'u la'ki vakadinadinataka na veika au sa rogoca se sa vakakina se sega.”
22E rau sa lako yani na tamata ki Sotoma, ka rau tiko mai na Turaga vata kei Epara-ama. 23Sa qai toro yani o Epara-ama vei Jiova, ka kaya, “O ni na vakarusai ira li na yalododonu vata kei ira na i valavala ca? 24Kevaka e tiko kina e 50 na tamata yalododonu, o ni na vakarusa li na koro taucoko vata kei ira na lewe 50 na yalododonu? 25Ena sega ni rawa mo ni vakarusai ira na yalododonu vata kei ira na i valavala ca; o ni na sega sara ni cakava rawa na ka o ya. Me ra rusa vata li na yalododonu kei na i valavala ca? Ena sega li ni vakadavora vakadodonu na nona lewa o Koya sa lewai vuravura taucoko?”
26A sauma na Turaga, ka kaya, “Kevaka au raica kina e 50 na tamata yalododonu, au na sega ni vakarusa na koro ena vukudra.”
27A sa kaya tale o Epara-ama, “Mo ni vosoti au ena noqu vosa doudou tiko vei kemuni na Turaga. Au tamata wale ga ka sega vei au na dodonu me'u kaya e dua na ka. 28Ia kevaka e ratou sa lewe 45 ga na yalododonu ka sega ni 50: o ni na vakarusa li na koro taucoko ena vukudratou na lewe lima ka yali tiko o ya?”
A sa kaya na Turaga, “Au na sega ni vakarusa kevaka e kune kina e 45 na tamata yalododonu”
29A qai kaya o Epara-ama, “Vakacava kevaka e kune ga kina e lewe 40?”
“Au na sega ni vakarusa ena vukudra e 40,” sa kaya na Turaga.
30Sa qai kaya tale o Epara-ama, “Kemuni na Turaga, au kerea mo ni kakua ni cudruvi au, ka me'u vosa tale mada. Ena vakacava kevaka e kune ga kina e lewe 30?” A sauma na Turaga,
“Au na sega ni vakarusa kevaka au kunea kina e lewe 30.”
31A sa kaya tale o Epara-ama, “Kemuni na Turaga, ni vosoti au ena noqu doudou ni vosa tiko yani vei kemuni. E vakacava kevaka e kune wale ga kina e 20?”
A sa kaya na Turaga, “Au na sega ni vakarusa kevaka e kune kina e 20.”
32A sa kaya tale o Epara-ama, “Kemuni na Turaga, ni kakua ni cudruvi au, ka me'u bau vosa tale mada ga vakadua. E vakacava kevaka e mani kune wale ga kina e lewe 10?”
“Au na sega ni vakarusa kevaka e kune ga kina e lewe 10,” a sauma na Turaga. 33Ni sa oti na vosa i Epara-ama, a qai lako yani ko Jiova, ka lesu o Epara-ama ki na nona i tikotiko.
Currently Selected:
VAKATEKIVU 18: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
