VAKATEKIVU 15

Na Veiyalayalati ni Kalou kei Eparama

1Ni oti o ya, a qai vosa vei Eparama ko Jiova ena dua na raivotu ka kaya, “I Eparama, mo kakua ni rere. Au na taqomaki iko mai na veika ca ka'u na vakalevutaka na kemu i sau.”

2A sauma o Eparama, “Kemuni na Turaga na noqu Kalou, a cava ena qai kena yaga vei au na veika o ni solia vei au me kequ i sau, ni sa sega na luvequ? O koya ga me na qai taukena sai Iliesa na kai Tamasiko. 3O ni sa sega ni solia vei au e dua na luvequ, ia ena qai taukena na veika kece e tu vei au e dua na noqu bobula.”

4A sa rogoca o Eparama ni sa vosa tale mai vua ko Jiova, “Ena sega ni taukena na veika sa tu vei iko na bobula oqori; na luvemu dina ga ena yaco me taukena.” 5A sa kauti koya ki tautuba ko Jiova, ka kaya vua, “Rai cake mada i lomalagi ka tovolea mo wilika na levu ni kalokalo; ena vakakina na kedra lewe levu na nomu kawa.”#Roma 4.18; Ipe 11.12

6A sa vakabauti Jiova o Eparama, ka sai koya oqo na vuna sa marautaki koya kina ko Jiova ka ciqomi koya.#Roma 4.3; Kala 3.6; Jeme 2.23

7A sa qai kaya vua na Kalou, “Sai au ko Jiova, o koya ka kauti iko tani mai Uri ena vanua o Papilonia, ka me'u solia vei iko na vanua oqo mo taukena.”

8Ia a kaya o Eparama, “Kemuni Jiova na Kalou dokai, au na kila rawa beka vakacava ni'u sa na taukena?”

9A sa kaya ko Jiova, “Kauta mai e dua na bulumakau yalewa yabaki tolu, dua na me yalewa yabaki tolu, ka dua na sipi tagane yabaki tolu, dua talega na soqe, ka dua na ruve.” 10A kauti ira mai na manumanu oqo o Eparama vua na Kalou, ka musumusulaka vakaveimama, ka tuva me ra veibasai na veimama: ia sa sega ni musuka na manumanu vuka. 11Era a vuka sobu mai na manumanu ki na yagodra na manumanu mate. A vakasavi ira tani o Eparama.

12Ni kala sobu na matanisiga, a tarai Eparama e dua na via moce levu, ka yacovi koya talega e dua na rere levu.#Jope 4.13,14 13Sa qai kaya vua ko Jiova, “Era na tiko vulagi na nomu kawa ena vanua tani; ena yaco me ra bobula ka vakararawataki me 400 na yabaki.#Lako 1.1-14; Caka 7.6 14Ia au na vakatauca na i totogi ki na matanitu ena cakava vei ira na ka oqo.#Lako 12.40-41; Caka 7.7 15Ia o iko, o na bula balavu, ka o na mate ena vakacegu, ka buluti. 16Ena yacova mada na i kava ni tabatamata ni bera ni ra qai lesu tale mai eke na nomu kawa, baleta ni'u na sega ni vakatalai ira tani na kai Amoraiti me yacova na gauna sa rui ca vakalevu kina na nodra i valavala, ka sa dodonu kina me ra totogitaki.”

17Ia ni dromu na siga ka sa buto mai na vanua, e a basika vakasauri mai e dua na kuro katakata sa kubou tiko kei na dua na cina caudre, ka rau lako sivia na veitiki ni manumanu o ya. 18Ni oti o ya, a qai vakayacora ko Jiova ena vanua o ya na nona veiyalayalati kei Eparama, ka kaya, “Au sa yalataka ni'u na solia na vanua taucoko oqo vei ira na nomu kawa, me tekivu mai na uciwai ena i yalayala kei Ijipita me yacova na uciwai levu o Uferetisi,#Caka 7.5 19ka vakakina na nodra vanua na Kenaiti, na Kenisaiti, 20na Itaiti, na Perisaiti, na Refaimi, 21na Amoraiti, na kai Kenani, na Kakesaiti, kei na Jepusaiti.”

Currently Selected:

VAKATEKIVU 15: FNV

Highlight

Copy