LAKO YANI 6
6
Vakadeitaki na Nodra Sereki na Isireli
1A sa qai kaya vei Mosese ko Jiova “Oqo mo na raica na ka au na cakava vua na tui. Sa dina, ena liga kaukauwa ena laivi ira kina o koya me ra lako. Ia mai na liga kaukauwa talega ena vakatalai ira tani kina mai na nona vanua.”
2A sa qai vosa tale vei Mosese na Kalou ka kaya vua, “Sai au ko Jiova.#Vteki 17.1; 28.3; 35.11; Lako 3.13-15 3Au a sa rairai oti vei Epara-ama, kei Aisake, kei Jekope, ka ratou sa kilai au ga ena yaca, na Kalou Kaukauwa;#6.3 Vakaiperiu El-Shaddai ia ka'u a sega ni vakatakilai au vei iratou ena yacaqu tabu, ko Jiova.#6.3 Vakaiperiu YHWH 4Au a tauyavutaka talega na noqu veiyalayalati vata kei iratou, me'u solia vei iratou na vanua o Kenani, na vanua ka ra a tiko vulagi kina. 5Au a rogoca talega na nodra vutugu na Isireli ena vuku ni nodra veivakabobulataki na kai Ijipita, ia ka'u sa nanuma kina na noqu veiyalayalati. 6O koya oqo mo kaya kina vei ira na Isireli, ‘Sai au ko Jiova, ka'u na sereki kemuni mai na nodra veivakabobulataki na Ijipita ka vagalalataki kemuni mai na i vesu oqo. Au na vakabulai kemuni mai na ligaqu sa dauveivueti ka sa dodo tu yani kei na i totogi bibi me tau vei ira. 7Au na ciqomi kemuni mo ni sa noqu tamata, ia ka'u na nomuni Kalou. O ni na qai kila ni sai au ko Jiova, o koya ka sereki kemuni mai na nodra veivakabobulataki na kai Ijipita. 8Au na kauti kemuni ki na vanua ka'u a bubului kina me'u solia vei Epara-ama, Aisake kei Jekope; au na solia vei kemuni mo ni taukena. Sai au ko Jiova.’ ” 9A sa tukuna na vosa oqo vei ira na Isireli o Mosese; ia era a sega ni via rogoci Mosese ni a mavoa na lomadra ena vuku ni nodra vakabobulataki.
10A sa qai vosa vei Mosese ko Jiova, 11“Mo lako ka la'ki kaya vei tui Ijipita me sereki ira na Isireli me ra biuta na nona vanua.”
12Ia sa vosa o Mosese ka vaka, “O ira mada ga na Isireli era sa sega ni via rogoci au; ena qai rawa vakacava me rogoci au na tui, ka ni'u sa rui dravudravua vakalevu ena vosa oi au?”
13A sa vosa vei Mosese kei Eroni ko Jiova ka kaya vei rau: “Mo drau la'ki tukuna vei ira na Isireli kei na tui Ijipita ni'u sa vakaroti kemudrau mo drau vagalalataki ira na Isireli mai na vanua o Ijipita.”
Na i Vola ni Kawa i Mosese kei Eroni
14Sa koto oqo e ra o ira na i liuliu ni nodra veivuvale yadua: o ira na tagane ka tamadra o Rupeni, na ulumatua i Isireli: o Inoke, o Palu, o Esironi, kei Kamai; oqo o ira ena vuvale i Rupeni. 15O ira na luve i Simione: o Jimueli, o Jamini, o Oati, o Jakini, o Soari, kei Saula, o koya ka tinana na yalewa ni Kenani; oqo o ira na vuvale i Simione. 16A tarava mai na luve i Livai me vaka na nodra kawa: o Kerisoni,#6.16 E volai talega ena yaca Kerisomi; raica na 2.22 Koaca kei Mirari. Ia sa bula voli o Livai me 137 na yabaki.#Tiko 3.17-20; 26.57-58; 1Vei 6.16-19 17O ira na luve i Kerisoni:#6.17 E tautauvata kei na Kerisomi; raica na 2.22 o Lipini kei Semeai, mai na nodrau dui matavuvale. 18Na luve i Koaca: o Emirami, o Isari, o Epironi kei Usieli, ia na dede ni bula nei Koaca sa 133 na yabaki. 19O rau na luve i Mirari: o Mali kei Musi. Sa o ira oqo na yavusa i Livai me vaka na i tuvatuva ni nodra kawa. 20O Emirami sa vakawatitaki Jokapeti na ganei tamana, ka rau a sucu mai kina o Eroni kei Mosese; ia na dede ni bula nei Emirami sa 137 na yabaki. 21O ira na luve i Isari: o Kora, o Nefeki kei Sikiri. 22O ira na luve i Usieli: o Misaeli, o Elisapani, kei Siciri.
23O Eroni e rau a veiwatini kei Ilisepa, na luve i Amenatave ka ganei Nasoni, ka luvedrau o Netapi, Apaiu, Iliesa kei Icama. 24O ira na luve i Kora: o Asiri, o Ilikana kei Epiasafi: sai ira oqo na vuvale i Kora. 25Na luve i Eroni ulumatua o Iliesa sa vakawatitaka e dua vei iratou na luve i Putieli yalewa, ka luvena kina o Finiasi. Sai ira oqori na turaga ni yavusa i Livai kei na nodra dui matavuvale.
26Sai rau o Eroni kei Mosese na lewe rua ka kaya kina ko Jiova, “Drau la'ki liutaki ira tani mai na Isireli mai na vanua o Ijipita.” 27Sai rau ga oqo na turaga ka tukuna vua na tui Ijipita me sereki ira na Isireli.
Na i Vakaro i Jiova vei Mosese kei Eroni
28Ena siga ka a vosa kina vei Mosese ko Jiova mai na vanua o Ijipita, a sa kaya, 29“Sai au ko Jiova; mo kaya vua na tui Ijipita na veika kece sara ka'u sa tukuna vei iko.”
30A sa kaya ga o Mosese, “O ni sa kila vinaka ni'u sa sega sara ni tamata dauvosa,#6.30 Vakaiperiu ni sa sega ni cilivi na tebe ni gusuqu ena qai rogoci au vakacava na tui?”
Currently Selected:
LAKO YANI 6: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
