LAKO YANI 4

Solia na Kalou na Cakacaka Mana vei Mosese

1A sa vosa o Mosese ka kaya vei Jiova, “Ena vakaevei kevaka era na sega ni vakabauti au se rogoci au. A cava me'u cakava kevaka era sa tukuna ni sa sega ni rairai vei au oi kemuni Jiova?”

2A sa tarogi koya ko Jiova, “Na cava o taura tu oqori e ligamu?”

A sauma yani o koya, “Na i titoko.”

3A sa qai kaya tale, “Viritaka ki na qele.” A sa viritaka na i titoko ki na qele, ka sa vuki me gata, ka sa dro tani mai kina o Mosese. 4A sa kaya vei Mosese ko Jiova, “Dodoka na ligamu ka taura na buina.” A sa dodoka na ligana ka taura na bui ni gata ka sa vuki tale me i titoko e ligana. 5Sa qai kaya ko Jiova, “Ia oqori me ra vakabauta kina ni sa talai iko yani ko Jiova, na Kalou ni nodra qase, na Kalou i Epara-ama, Aisake, kei Jekope, o koya sa rairai vei iko.”

6A sa vosa tale vua na Kalou ka kaya, “Mo daramaka na ligamu ki na loma ni nomu kote.” A sa daramaka na ligana ki na loma ni nona kote. Ia ni sa ucuna tani mai na ligana, sa yaco me vukavuka ka vulavula me vaka na uca vulavula. 7Ia sa kaya tale na Kalou, “Mo daramaka lesu tale na ligamu ki na loma ni nomu kote.” A sa daramaka lesu tale na ligana ki na loma ni nona kote. Ia ena gauna sa ucuna tani mai kina, sa yaco me savasava tale mai na vukavuka ka a tu vua e liu. 8Ia kevaka era na sega ni vakabauti iko ka vakarorogo vei iko ena i matai ni vakatakilakila, era na qai vakabauta na kena i karua. 9Ia kevaka era sa na sega ni vakabauta na i vakatakilakila e rua oqori ka rogoci iko, mo qai lako ka takiva mai eso na wai ena uciwai na Naile ka sova ki na qele, ka na vuki me dra na wai ni uciwai ka drodrova na vanua mamaca.

10Ia sa kaya o Mosese vei Jiova, “Me kakua saka, noqu Turaga, mo ni kakua mada ni talai au. Au rui sakasaka vakalevu ena vosa, mai na veigauna sa oti me yacova na gauna oqo. Au sega ni daunivosa vinaka, ka'u rui berabera ka tatao vakalevu.”

11A sa kaya vua ko Jiova, “O cei sa bulia na gusu ni tamata? O cei sa vakavuna me didivara se me galu na tamata? O cei e vakavuna me mata rai se me mataboko? Ia sai au ga, ko Jiova. 12Ia mo lako ga! Au na vukei iko mo vosa, ka'u na tukuna talega vei iko na veivosa mo cavuta.”

13Ia sa kaya ga o Mosese, “Ni yalovinaka na noqu Turaga, mo ni tala e dua tani tale na tamata.”

14A sa qai waqa mai na cudru i Jiova vei Mosese ka kaya vua, “A cava o sa nanuma ena vuku i Eroni na tuakamu, na Livai? Au kila ni dauvosa matata o koya; ia oqo sa lako tiko mai o koya me mai tavaki iko ka na marau ni raici iko. 15Mo qai vosa vua ka tukuna vua na veika kece ka'u sa kaya vei iko. Au na vukei kemudrau ruarua mo drau vosa, ka'u na tukuna vei kemudrau ruarua na veika mo drau cakava. 16Ena nomu daunivosa o koya ka na vosa vei ira na tamata ena vukumu. O na qai vaka na Kalou o iko, ni o sa tukuna vua na vosa me kaya. 17Mo kauta tiko yani na i titoko oqo, ka mo vakayacora kina na veicakacaka mana.”

Lesu ki Ijipita o Mosese

18A sa lesu o Mosese ki vua na vugona o Jacoro ka kaya, “Ni yalo vinaka ni laivi au me'u lako vei ira na kai noqu ki Ijipita, me'u la'ki raici ira se ra sa bula vinaka tiko se sega.” A sa kaya o Jacoro vei Mosese, “Mo lako ena vakacegu.”

19A sa kaya vei Mosese, “Mo lesu tale ki Ijipita ka ni ra sa mate kece o ira era a via vakamatei iko.” 20A sa kauta na watina kei rau na luvena o Mosese, a sa vakavodoki iratou ena asa, ka lako yani ki na vanua o Ijipita. Ia sa kauta voli o Mosese na i titoko ni Kalou.

21A sa qai kaya vei Mosese ko Jiova, “Ni o sa yaco ki Ijipita, raica mo vakayacora e matana na tui na cakacaka veivakurabuitaki kece ka'u sa solia vei iko na kaukauwa mo cakava vakakina. Ia ka'u na vakaukauwataka na lomana na tui, me kakua kina ni laivi ira na tamata me ra lako. 22Ia mo qai kaya vua na tui ni sa tukuna vakaoqo ko Jiova, ‘O Isireli na noqu ulumatua. 23Au a sa kaya vei iko mo laiva na luvequ me lako yani, ka sokalou vei au, ia o sa qai bese ga. Oqo na gauna au sa na vakamatea kina na nomu ulumatua tagane.’ ”#Lako 12.29

24Ia ni ra keba voli ena dua na tikina ena nodra i lakolako i Ijipita, a sa sotavi Mosese#4.24 Se luve i Mosese tagane; Vakaiperiu koya ko Jiova ka saga me vakamatei koya. 25Ia o Sipora na watina, a sa taura e dua na tiki ni vatu gagata ka cilivi rau kina na luvena tagane, ka taura na vusona me tara na yava i Mosese,#4.25-26 yava: Na vakayagataki ni “yava” oqo era nanuma eso ni vosa vakaibalebale ni yagonatabu na tagane. ka sa kaya, “Sa dina sara ni o sa watiqu vakadra vei au.” 26A sa qai laivi Mosese kina na Kalou. Sa qai kaya tale o Sipora, “O sa watiqu vakadra ena vuku ni veicilivi.”

27Sa qai kaya vei Eroni ko Jiova, “Mo lako ki na loma ni vanua lala ka tavaki Mosese kina.” A sa lako yani o Eroni ka tavaki Mosese ena ulunivanua tabu ni Kalou, ka reguci koya. 28Sa qai kaya vei Eroni o Mosese na vosa taucoko sa tukuna vua ko Jiova ka talai koya yani kina; a sa tukuna talega na i vakatakilakila eso sa vakarota vua ko Jiova me vakayacora. 29A sa lako yani kina o Mosese kei Eroni ka vakasoqoni ira vata na nodra qase kece na Isireli. 30Sa qai tukuna taucoko o Eroni na vosa i Jiova ka tukuna vua o Mosese, ka cakava kece talega na veivakatakilakila e matadra na tamata. 31Era sa vakabauta na tamata, ia ni ra sa rogoca ni sa kauwaitaka na nodra tagi ko Jiova ka sa raica na nodra vakaloloma, era sa cuva sobu ena vakarokoroko ka sokalou.

Currently Selected:

LAKO YANI 4: FNV

Highlight

Copy