LAKO YANI 23

Na Lewa Dodonu kei na Lewa Matau

1“Mo ni kakua ni dauvakauta na i tukutuku lasu. Mo ni kakua ni vukea na tamata ca ena vuku ni nomuni soli i vakadinadina lasu.#Lako 20.16; Vsoro 19.11-12; Vrua 5.20 2Mo ni kakua ni muri ira na lewe vuqa ena caka ca; ni o ni sa soli i vakadinadina ena veilewai, mo ni kakua ni tokoni ira na lewe vuqa me vakatanitaki kina na lewa matau ka dodonu, 3ka mo ni kakua talega ni totaka e dua baleta ni sa dravudravua ena gauna e veilewaitaki kina.#Vsoro 19.15

4“Ena gauna o ni sotava kina na nona bulumakau se asa na kemuni meca ni sa lako sese, mo ni kauta lesu tale vua.#Vrua 22.1-4 5Kevaka o ni raica na nona asa e dua e cati kemuni ni sa davo tu baleta ni bikai koya tu na nona i colacola bibi, mo ni veivuke ena kena vakaduri cake tale na asa; ia kakua ga ni lako sivita.

6“Mo ni kakua ni cakava e dua na ka me tarovi kina na kena soli na lewa dodonu vua na dravudravua.#Vsoro 19.15; Vrua 16.19 7Mo ni yawa tani mai na dauveibeitaki vakailasu, mo ni kakua ni vakamatei koya na tawa cala kei ira era tu ena yasana dodonu, ka ni'u na sega ni vakadonui koya sa cala. 8Mo ni kakua ni taura na i sau ni veivaqumi, ni sa vakamatabokotaka na tamata na veivaqumi me vakaseva kina na soli ni lewa dodonu vei koya sa caka dodonu.

9“Ni kakua ni vakasosataki ira na vulagi; o ni sa kila vinaka na draki ni bula e curuma na vulagi, baleta ni o ni a vulagi taumada ena vanua o Ijipita.#Lako 22.21; Vsoro 19.33-34; Vrua 24.17-18; 27.19

Na i Kavitu ni Yabaki kei na i Kavitu ni Siga

10“Ena loma ni ono na yabaki, mo ni kakaburaki kina ka tamusuka na kena vuata.#Vsoro 25.1-7 11Ia ena i kavitu ni yabaki mo ni vakaceguya kina na qele, ka laivi ira na dravudravua ena nomuni vanua me ra kana kina; ia na ka era vakavoca me kedra na manumanu kila ni veikau. Mo ni vakayacora talega vakaoqo ki na nomuni loganivaini kei na veiolive. 12E ono na siga mo ni cakava kina na nomuni cakacaka kecega, ia ena i kavitu ni siga mo ni vakacegu kina, ka vaka talega kina na nomu manumanu, na vulagi, kei ira na nomu bobula ka ra tiko kei iko.#Lako 20.9-11; 31.15; 34.21; 35.2; Vsoro 23.3; Vrua 5.13-14

13“Mo ni rogoca vinaka ka muria na veika kece sara au sa kaya vei kemuni, ka mo ni kakua ni vakabekabea na yaca ni veikalou tale eso me kakua talega ni rogo mai e gusumuni.

Na Solevu Tabu Vakayabaki e Tolu

(Lako 34.18-26; Vrua 16.1-17)

14“Ena tolu na gauna ena loma ni yabaki, mo ni na vakayacora tiko kina na veisolevu ni yabaki mo ni vakananumi au kina. 15Mo ni vakayacora na Solevu ni Madrai Sega ni Vakatubu, me vaka ka'u sa vakarota vei kemuni. Mo ni kana madrai sega ni vakatubu me vitu na siga ena kena gauna sa lokuci ena vula i Epipi, ni o ya na gauna o ni a lako tani kina mai Ijipita. Me kakua ni dua me lako mai vei au ka liga lala, baleta ni sa sega na ka e kauta mai me vakacabora vei au.#Lako 12.14-20; Vsoro 23.6-8; Tiko 28.17-25

16“Mo ni qarava na Solevu ni Tatamusuki ena gauna o ni tamusuka kina na i sevu ni veika o ni sa teivaka ki na nomuni qele.#Vsoro 23.15-21; Tiko 28.26-31; Vsoro 23.39-43 “Ni rekitaka na Solevu ni Tatamusuki ena i tekivu ni nomuni tatamusuki.

“Ni rekitaka talega na Solevu ni Kumukumuni ena kena cava na yabaki, ni o ni sa kumuna vata mai na vuata, na vua ni nomuni buno. 17Me vakatolu ena veiyabaki me ra rairai kina vei Jiova na nomudou Kalou o ira taucoko na tagane.

18“Mo ni kakua ni vakacabora na dra ni noqu i soro vata kei na dua na ka e vakatubutaki se me biu bogi na uro ni noqu solevu me yacova na mataka. 19“Mo ni kauta mai vei Jiova na nomuni Kalou na i sevu ni nomuni vuata vinaka duadua o ni sa tamusuka.#Lako 34.26; Vrua 14.21; 26.2

“Mo ni kakua ni vakabutara na luve ni me se sipi ena sucu i tinana.

Vosa ni Yalayala kei na i Vakasala

20“Au na tala na noqu agilosi me liutaki kemuni, me vakarurugi kemuni ka tuberi kemuni ena sala mo ni yacova kina na vanua ka'u sa vakarautaka vei kemuni. 21Mo ni vakarorogo ka talairawarawa kina ki na nona vosa, ni kakua ni saqati koya, baleta ni na sega ni vosota na nomuni caka cala o koya, ka sa tiko vua na yacaqu. 22Ia kevaka o ni na vakarorogo vua ka vakayacora na veika kece sa kaya, au na yaco me'u kedra meca na kemuni meca ka'u na cudruvi ira era sa cudruvi kemuni. 23Ni sa na liutaki kemuni na noqu agilosi ka na kauti kemuni yani vei ira na Amoraiti, na Itaiti na Perisaiti, na kai Kenani, na Ivaiti kei na Jepusaiti, ka'u na vakawabokotaki ira, 24Mo ni kakua ni cuva ki na nodra veikalou, se sokalou vei ira se muria na nodra i valavala, ia mo ni vakawabokotaki ira vakadua, talaraka ka vakarusa vakadua na nodra yavu ni veikalou vatu. 25Ia mo ni qaravi Jiova ga na nomuni Kalou, au na vakalougatataka na kemuni kakana kei na memuni wai, ka'u na kauta tani na mate dauveitauvi mai vei kemuni. 26Ena sega ni dua na marama me vakalutu se sega na luvena ena nomuni vanua. Au na vakabulabulataki kemuni.

27“Na kequ i rogorogo rerevaki ena liu vei kemuni, ia ka'u na vakasesei ira era sa lako mai me ra valuti kemuni, ka'u na vakavuna me ra vuki ka dro tani e matamuni o ira na kemuni meca.

28Au na tala yani na veimate ca me liu vei kemuni,#23.28 Au na… kemuni; se Au na tala na qele ni vi ena maliwa ni kemuni meca. ka me vakatalai ira tani na Aivaiti, o ira na kai Kenani, kei ira na Itaiti. 29Au na sega ni vakatalai ira tani mai vei kemuni ena loma ni dua na yabaki de lala na vanua ka ra sinai mai kina na manumanu kila ka ra qai vakacacani kemuni. 30Ia au na vakatalai ira vakailawalawa lalai mai vei kemuni, me yacova ni o ni lewe levu mo ni taukena kece na vanua. 31Au na yalana na nomuni yalayala ni vanua mai na Wasa Damudamu ka yaco ki na nodra wasawasa na kai Filisitia, mai na veikau bula ki na uciwai na Uferetisi, ia ka'u na soli ira na lewenivanua oqo vei kemuni ka o ni na vakasavi ira mai na matamuni. 32Mo ni kakua ni veiyalayalati kei ira se na nodra kalou. 33Me ra kakua ni vakaitikotiko kei kemuni ena nomuni vanua de ra na vakavuna mo ni valavala ca kina vei au, ia kevaka o ni qarava na nodra kalou ena yaco me i cori vei kemuni.

Currently Selected:

LAKO YANI 23: FNV

Highlight

Copy