LAKO YANI 12
12
Na Lakosivia
1A sa kaya vei Mosese kei Eroni ko Jiova ena vanua o Ijipita:#Vsoro 23.5; Tiko 9.1-5; 28.16; Vrua 16.1-2 2“Na vula oqo me i matai ni vula ni yabaki vei kemuni. 3Mo tukuna vei ira kece sara na yavusa i Isireli oqo: Ena i katini ni siga ni vula oqo, me ra qai digitaka na tamata yadua e dua na lami se dua na luve ni me, ena vuku ni nona vuvale, me dua na manumanu ena veivuvale yadua. 4Ia kevaka e ratou lewe lailai e dua na vuvale, ka ratou sega ni rawa ni kania na manumanu taucoko, me ratou qai wasea vata kei na vuvale e ratou tiko veitikivi. Mo ni wilika na levu ni tamata me ra kania na manumanu o ya me vaka na ka ena rawa ni kania e dua na tamata. 5Mo ni qai digitaka na sipi se na me, ia e dodonu me yabaki dua ka me ka tagane sa sega ni ca e dua na tikina. 6Me ra maroroi tiko oqo me yacova na i katinikava ni siga ni vula, me ra qai vakamatea kina na yavusa taucoko i Isireli ena kena yakavi. 7Me ra qai taura eso na kena dra ka boroya kina na duru kei na ulu ni katuba ni vale sa laukana kina na manumanu. 8Ena bogi o ya, me tavu na lewe ni manumanu ena buka ka me laukana vata kei na madrai sega ni vakatubu kei na co gaga. 9Me kua ni laukana droka, se me saqa, ia me tavu taucoko vata kei na uluna, na yavana kei na kena gacagaca. 10Mo ni kakua ni vakavoca e dua na tikina me yacova na mataka; kevaka e vo e dua na tikina, ia me vakamai. 11Me vakaoqo na nomudou kania: Me vesu na nomudou i sulu ena tolomudou, mo dou vakaivava, ka taura na i titoko ena ligamudou; ia dou kania sara vakatotolo. Sai koya oqo na Solevu ni Lakosivia me vakarokorokotaki Jiova.
12“Ena bogi o ya au na lako voli ena loma ni vanua o Ijipita ka vakamatea na ulumatua tagane kece sara ni matanitu oqo, na tamata kei na manumanu; io ka'u na cudruvi ira kece talega na kalou ni Ijipita. Sai au ko Jiova. 13Na dra me na i vakatakilakila me vakaraitaka na vale o ni tiko kina. Ni'u sa na raica na dra, au na qai lako siviti kemuni ka na qai sega ni yacovi kemuni kina e dua na leqa ni'u sa na ravuta na vanua o Ijipita. 14Na siga oqo mo ni na dau vakananuma; mo ni qarava kina na solevu vakalotu vei Jiova. Mo ni dau vakayacora tiko na solevu oqo ena veitabagauna ka tawa mudu.”#Lako 23.15; 34.18; Vsoro 23.6-8; Tiko 28.17-25; Vrua 16.3-8
Na Solevu ni Madrai Sega ni Vakatubu
15A sa kaya ko Jiova, “Me na vitu na siga mo dou kania tiko kina na madrai sa sega ni vakatubu. Ena i matai ni siga, mo dou kauta laivi na vakatubu kece mai na nomudou veivale, ia kevaka e dua sa kana madrai vakatubu mai na i matai ki na i kavitu ni siga, ena sega tale ni qai okati me noqu tamata o koya. 16Ena i matai ni siga kei na i kavitu ni siga, mo dou dausota kina ka qarava na nomudou sokalou. Me kakua ni caka e dua na cakacaka ena siga oqo, ia me vakarautaki ga na kakana me baleti kemuni yadua. 17Dou na dau vakayacora na Solevu ni Madrai Sega ni Vakatubu baleta na siga oqori au a kauti ira tani mai kina na nomudou veiyavusa mai na vanua o Ijipita. Mo ni dau maroroya na siga oqo ena nomuni veitabatamata kece sara ka tawa mudu. 18Mo ni kana madrai sega ni vakatubu mai na yakavi ni ka 14 ni siga ni matai ni vula ki na yakavi ni ka 21 ni siga. 19Me vitu na siga me kakua sara ni kune kina na i vakatubu ena nomuni veivale. Ia kevaka e dua e kana madrai vakatubu sa na tawasei tani mai na yavusa i Isireli, se vulagi se i taukei. 20Mo ni kakua sara ni kana madrai vakatubu; mo ni kana madrai sega ni vakatubu ena nomuni veivale kece sara.”
Na i Matai ni Lakosivia
21Sa qai kacivi ira kece mai na nodra qase na Isireli o Mosese ka mai kaya vei ira, “Ni lako ka la'ki digia mai e dua na lami se luve ni me ka mai vakamatea na lami ni lakosivia. 22Ni qai taura e dua na i vau isopi, ka tonia ena dra e loma ni beseni, ka boroya na dra ki na duru ruarua kei na ulunikatuba. Me kakua sara ni dua vei kemuni me lako tani mai na nona vale me yacova na mataka lailai.”
23Ena gauna ena lako voli kina ko Jiova ena vanua o Ijipita me vakamatei ira na kai Ijipita, ena qai raica na dra ena ulunikatuba kei na kena duru ruarua, ka sega ni vakatara kina vua na Agilosi ni Mate me curu ki na nomudou veivale me veivakamatei.#Ipe 11.28 24Mo ni dau vakayacora na veivakaro oqo me i vakaro tawa mudu vei kemuni kei ira na luvemuni. 25Ia ena gauna o ni na yaco kina ki na vanua ena solia vei kemuni ko Jiova me vaka a yalataka, mo ni qai dau la'ki vakayacora tiko na i vakarau vakalotu oqo. 26Ena gauna era na tarogi kemuni kina na luvemuni, ‘A cava na i balebale ni vakarau vakalotu oqo?’ 27Mo ni qai kaya, ‘Oqo na i soro ni Lakosivia me vakarokorokotaki kina ko Jiova, baleta ni a lako sivita ko Jiova na nodra veivale na Isireli mai Ijipita ena gauna a vakamatei ira kina na kai Ijipita ka vakabulai ira na Isireli.”
Era a cuva sobu na tamata me ra sokalou.
28Era a lako na Isireli ka vakayacora; era sa vakayacora na ka a vakarota vei Mosese kei Eroni ko Jiova.
Na Nodra Vakamatei na Ulumatua
29Ena lomaloma ni bogi, sa qai ravuti ira kece sara na ulumatua ena vanua o Ijipita ko Jiova, me tekivu mai vua na ulumatua ni tui, o koya ena dabe ena i dabedabe vakatui, me yaco sara ki na ulumatua ni kaivesu e sogo tiko ena rumu butobuto, kei na ulumatua kecega ni manumanu.#Lako 4.22-23
30Ena bogi o ya, a sa vakayadrati cake na tui, o ira na nona vakailesilesi kei ira kece na kai Ijipita. A sa yaco na veitagicaki levu e Ijipita baleta ni sa sega sara ni dua na vale e Ijipita me a sega kina ni dua na ulumatua tagane me mate. 31Ena bogi vata o ya, a sa kacivi Mosese kei Eroni kina na tui, ka kaya vei rau, “Drau lako, o kemudrau kei ira na Isireli! Ni lako tani mai na noqu vanua; ni lako ka la'ki sokalou vei Jiova, me vaka na nomuni kerekere. 32Ni kauta na nomuni sipi, na me, kei na bulumakau ka lako yani. Ni qai masulaka me'u bau kalougata talega oi au!”
Na Lako Yani: Mai Ramisese ki Sakoca
33Era a vakatotolotaki ira na Isireli na kai Ijipita me ra biuta na nodra vanua; ka kaya, “Kevaka o ni na sega ni lako, keimami na mate taucoko.”
34Era sa qai tawana na tamata na kedra madrai droka sega ni vakatubu ki na sedre ni vavavi, ka ologa ena i sulu, ka dreketa yani.
35Era a cakava na Isireli na ka sa kaya o Mosese, ka sa kerea mai vei ira na kai Ijipita na i ukuuku siliva, na i ukuuku koula kei na i sulu.#Lako 3.21-22
36A sa vakayacora ko Jiova me ra rokovi ira na Isireli o ira na kai Ijipita ka me ra solia vei ira na veika era kerea. E a vakaoqo na nodra kauta yani na Isireli na nodra i yau na kai Ijipita.
Biuti Ijipita o Ira na Isireli
37Era a biuti Ramisese na Isireli ka lako ki Sakoca. Sa rauta ni ra lewe 600,000 na tagane era sa taubale, ka ra sega ni wili kina na yalewa kei na gone. 38A lako vata talega kei ira e dua na i wase levu ni tamata duikaikai, kei na vuqa sara na sipi, na me, kei na bulumakau. 39Era a vavia eso na madrai sega ni vakatubu mai na madrai droka era a kauta mai Ijipita. A sega ni dua na gauna me ra bau vakarautaka kina na kedra kakana.
40Na balavu ni gauna era tiko kina na Isireli mai Ijipita e 430 na yabaki.#Vteki 15.13; Kala 3.17 41Ena siga a mai cava kina na 430 na yabaki, era a biuti Ijipita mai kina na lewe ni veiyavusa taucoko sara i Jiova. 42Ena kena bogi, a sa yadravi ira matua kina na Isireli ko Jiova me kauti ira tani mai Ijipita; oqo talega na bogi me na vagolei vei Jiova ka me dau nanumi ena veitabagauna kecega me bogi ni nodra veiyadravaki na Isireli.
Vakaro Eso me Baleta na Solevu ni Lakosivia
43A sa kaya vei Mosese kei Eroni ko Jiova, “Sai koya oqo na i vakaro me baleta na Solevu ni Lakosivia; me kakua sara ni dua na kai tani me kana kina, 44ia na bobula sa voli ena i lavo sa rawa me kana kina kevaka sa cilivi oti. 45Me kakua ni dua na vulagi se tamata cakacaka saumi me kana kina. 46Me na laukana ga ena loma ni vale; me kakua ni kau e dua na tikina ki tautuba, ka me kakua ni ramusu e dua na suina.#Tiko 9.12; Joni 19.36 47Na yavusa taucoko o Isireli me vakayacora na solevu oqo. 48Kevaka e dua na vulagi sa tiko kei kemuni e viakana ena Solevu ni Lakosivia, me ra qai cilivi kece sara na tagane ena nona vale; ka sa na qai rawa me kana ena Solevu ni Lakosivia me vaka e dua sa sucu vakaitaukei e Isireli. Ia me kakua sara ni dua na tamata tawa cili me kana kina. 49Sa dua ga na lawa sa vauci kina na i taukei kei na vulagi sa tiko kei kemuni. 50Era a vakayacora kecega na Isireli ka cakava na ka sa vakarota ko Jiova vei rau o Mosese kei Eroni. 51Ena siga o ya, a sa kauti ira tani na Isireli mai Ijipita ko Jiova.
Currently Selected:
LAKO YANI 12: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
