LAKO YANI 10
10
Ai Kawalu ni Totogi: Na Vodre
1A sa qai kaya vei Mosese ko Jiova, “Mo lako vua na tui; ka ni'u sa vakaukauwataka na lomana kei na lomadra na nona vakailesilesi me rawa ni'u na vakaraitaka kina vei ira na noqu cakacaka veivakurabuitaki, 2ka mo ni qai tukuna vei ira na luvemuni kei na makubumuni na noqu a vakalialiai ira na kai Ijipita ena veicakacaka mana ka'u sa vakayacora. Oi kemuni kece o ni na kila kina ni sai au ko Jiova.”
3E rau sa mani lako yani vua na tui o Mosese kei Eroni ka kaya vua, “Sa kaya vakaoqo ko Jiova, o koya na nodra Kalou na Iperiu, ‘A cava soti na kena dede mo bese tiko kina ni vakamalumalumutaki iko vei au? Laivi ira na noqu tamata me ra lako, ka me ra la'ki sokalou vei au. 4Ia kevaka o na bese tikoga ni laivi ira na noqu tamata me ra lako, au na kauti ira mai na vodre ki na nomu vanua ni mataka. 5Era na robota na dela ni vanua ka na sega ni kune rawa na qele. Era na tiloma na i vovo kece sara ni ka era a sega ni vakarusai ena uca cevata; ka ra na kania na kau kecega ena buca. 6Era na vakasinaita na nomu vale kei na nodra vale kece sara na nomu vakailesilesi kei ira kece na nomu tamata. Oqo e dua na ka vakadomobula ka ra sega ni se bau raica vakadua na tamamuni se na tukamuni.” A sa qai vuki o Mosese mai vua na tui ka lako yani.
7Era sa qai kaya vua na tui na nona vakailesilesi, “A cava soti na kena dede me mai vakatubu leqa tiko kina vei keda na tamata oqo? Laivi ira na tamata me ra lako me rawa ni ra la'ki qarava na nodra Kalou ko Jiova; o ni sega tiko li ni kila ni sa vakarusai o Ijipita?”
8Ena vuku ni ka oqo, e rau a mani vakauti lesu tale kina vua na tui o Mosese kei Eroni, ka sa kaya na tui vei rau, “Sa rawa mo ni lako oqo ka la'ki sokalou vua na nomuni Kalou ko Jiova. Ia o cei soti me na lako?”
9A sauma o Mosese ka kaya, “Keimami na lako kece, vata kei ira na luve i keimami tagane, kei ira na luve i keimami yalewa, kei ira na neimami sipi, me kei na neimami bulumakau baleta ni keimami na la'ki qarava kina e dua na solevu me vakarokorokotaki kina ko Jiova.”
10Sa qai kaya vei rau na tui, “Au sa yalataka oqo ena vuku i Jiova ni'u na sega ni vakatara mo ni kauti ira na nomuni yalewa kei ira na gone lalai! Sa qai macala vakasigalevu ni o ni sa nakita tiko e dua na i vadi duka. 11Sa segai sara! O ira ga na tagane me ra na lako ka la'ki sokalou vei Jiova kevaka sai koya oqori na ka o ni vinakata.” E rau a mani vakasavi tani o Mosese kei Eroni mai na i tikotiko ni tui.
12A qai kaya vei Mosese ko Jiova, “Dodoka yani na ligamu ki na vanua o Ijipita me ra lako mai na vodre, ka me ra mai kania na kau kecega era sa bula tu, na ka kece sara sa vakavotaka tu na uca cevata.” 13A mani dulaka yani na nona i titoko o Mosese, ki na vanua o Ijipita, ka sa vakaliwava ko Jiova e dua na cagi mai na tokalau me liwava na vanua ena siga kei na bogi taucoko o ya; ia ena mataka, a sa kauta mai na vodre na cagi tokalau. 14A sa robota na vanua kecega ka tawana na vanua taucoko o Ijipita. Sa dua na qele ni vodre vakaitamera, ka sega ni a sa bau kune vakadua e liu se me na laurai tale mai muri.#Vtaki 9.2-3 15Era a ubia na dela ni vanua taucoko ka sa buto kina na vanua; era a kania na ka kecega sa bula tu ena dela ni vanua kei na vuanikau kecega sa vakavoca tu mai na uca cevata; a sega tale ni bau vo e dua na ka drokadroka, sega na veikau, ka sega na kakana ena i teitei ena vanua taucoko o Ijipita.
16A sa qai kacivi Mosese kei Eroni vakatotolo na tui ka kaya, “Au sai valavala ca vei Jiova na nomuni Kalou, ka vaka talega kina vei kemudrau. 17Mo drau vosota mada na noqu cala oqo, ka masuta na nomuni Kalou ko Jiova me kauta tani vei au na mate ca oqo.” 18A sa biuti tui Ijipita o Mosese ka la'ki masu vei Jiova. 19A veisautaka ko Jiova na matanicagi na tokalau me vuki ki na matanicagi mai na ra; oqo e dua na cagi kaukauwa ka kauti ira yani na vodre ki na wasa damudamu; a sega tale ni dua na vodre e vo mai Ijipita. 20Ia a qai vakaukauwataka tale na lomana na tui ko Jiova, ka mani sega ni laivi ira na Isireli me ra lako.
Ai Kaciwa ni Totogi: Na Butobuto
21A qai kaya vei Mosese ko Jiova, “Dulaka cake na ligamu ki lomalagi ka me lutu mai kina na butobuto ena vanua taucoko o Ijipita; e dua na butobuto ka rawa me ra vakila.” 22A mani dodoka cake na ligana o Mosese vaka ki lomalagi ka sa yaco mai na butobuto loaloa ena vanua taucoko o Ijipita me siga tolu.#Same 105.28; Vtaki 16.10 23Era a sega ni veiraici rawa na kai Ijipita, se me ra biuta na nodra vale ena loma ni tolu na siga. Ia sa rarama tu ga na vanua kece era tiko kina na Isireli.
24A vakaroti Mosese na tui ka kaya, “Ni lako mo ni la'ki sokalou vei Jiova, me ra lako talega kei kemuni na yalewa kei ira na gone. Ia me ra biu tu ga mai na nomuni sipi, na me kei na bulumakau.”
25A qai kaya o Mosese, “Ke sa vakaoqori, ia mo ni qai vakarautaka vei keimami na manumanu me i soro kei na i soro kama me keimami la'ki vakacabora vei Jiova na neimami Kalou. 26Ke sega, keimami na kauta ga na neimami manumanu; ena sega ni dua me biu tu mai. Keimami sa dau digitaka ga vakai keimami na manumanu me vakacabori vei Jiova na neimami Kalou. Keimami na sega ni kila rawa oqo na manumanu me keimami vakacabora vei Jiova me yacova na gauna keimami sa yaco kina ki kea.”
27Ia na Kalou sa vakaukauwataka tale na lomana na tui, ka mani sega ni laivi ira kina na Isireli me ra lako. 28A sa kaya vei Mosese na tui, “Lako tani sara vakatotolo! Qarauna me'u kua tale ni raica na matamu! Ena siga daru sota kina, o sa na mate vakaidina!”
29A sa kaya o Mosese, “O ni sa vosa dina sara! O ni na sega ni raica tale vakadua na mataqu.”
Currently Selected:
LAKO YANI 10: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
