EFESO 4

Na Duavata ni Yago

1O koya oqo, me vaka ni'u sa vesuki tu ena vuku ni Turaga, au sa kerei kemuni kina vakabibi mo ni vakaitovotaki kemuni ena i valavala sa kilikili kei na i tutu o ni sa kacivi kina. 2#Kolo 3.12,13Mo ni dau yalomalumalumu sara, ka yalomalua, ka dauvosota vakadede. Dusimaka na nomuni loloma ena nomuni dauveiciqomi vakai kemuni. 3Ni gumatua sara mo ni maroroya na duavata sa solia na Yalo Tabu ena vuku ni veivinakati kei na tiko vakacegu sa vauci kemuni vata. 4Sa duabau ga na yago ka sa duabau ga na Yalo Tabu, me vaka ga ni sa kacivi kemuni na Kalou ki na i nuinui e duabau ga. 5Sa duabau ga na Turaga, sa duabau ga na vakabauta, sa duabau ga na papitaiso; 6sa dua bau talega na Kalou na Tamada kecega. Sa i koya na noda Turaga kecega na tamata; sa curuma na ka kecega ka tiko ena lomada kecega.

7Ia sa soli vei keda yadua e yadua na i solisoli me vaka na dui kena i vakarau sa solia ko Karisito. 8#Same 68.18Me vaka sa kaya na i Vola Tabu:

“Ni sa lako cake o koya ki na tikina cecere sara,

A sa kauti ira yani e lewe vuqa era sa vesuki tu;

Ka sa solia na veisolisoli vei ira na tamata.”

9A cava beka na i balebale ni kena kainaki vakaoqo, “Sa lako cake o koya”? E kena i balebale o ya ni a lako sobu taumada mai eliu ki na boto ni vuravura sara e ra. 10O koya ga ka lako sobu mai sai koya ga ka sa lako cake tale, me sivita na lomalagi cecere sara, ka me tawana taucoko kina o koya na vuravura kei na lomalagi. 11Sa i koya sa “solia na veisolisoli vei ira na tamata,” ka sa lesi ira eso me ra i apositolo, eso me ra parofita, eso me ra dauveivakalotutaki, eso me ra i vakatawa, ka so me ra dauveivakatavulici. 12A sa vakayacora oqo o koya me ra vakarautaki ira kina na tamata lotu me ra cakava na veiqaravi ni lotu Vakarisito, ka me tarai cake kina na yago i Karisito. 13Me da na yacova kece sara kina na duavata ena noda vakabauta kei na noda kila na Luve ni Kalou; me da yaco me da tamata yalomatua ka ucuya na i vakarau taucoko i Karisito. 14Eda sa na sega tale tiko ni vakakina na gone e veikauyaki ena ua kei na cagi kecega ni veivakavuvuli, ena i vadi qaseqase era bulia na tamata me ka ni veivakacalai. 15Ia me da vosataka ga na ka dina ena yalololoma, eda na qai tubu cake kina ena ka kecega vei Karisito, o koya na uluda. 16#Kolo 2.19Sa sema vata vua na yago kecega ka vauca vata na yago ena kena veisema. Ia ni ra sa cakava vinaka na veitiki ni yago na dui nodra i tavi, sa tubucake na yago taucoko, ka tara cake ena loloma.

Na Bula Vou ena Vuku i Karisito

17O koya oqo ka'u sa kaya kina ena yaca ni Turaga, ka vakarota matua sara mo ni kakua ni qai bula tale tiko me vakataki ira na tawa lotu ena nodra vakanananu tawayaga. 18Ni sa vakabutobutotaki na nodra vakasama ka sa sega ni veidonui vata kei na bula ni Kalou ena vuku ni nodra lecaika kei na yalokaukauwa. 19Sa yali na nodra kila na madua, ka ra sa soli ira ki na i valavala vakasisila ka sega ni tarovi ira rawa, ka cakava na veika kecega e tawa savasava.

20Ia sa sega ni o koya oqori na ka o ni a vulica me baleti Karisito. 21O ni sa rogoca dina na ka baleti koya; ia me vaka o ni sa tamata lotu Vakarisito, ka ni a vakatavulici ena ka dina sa tu vei Jisu. 22#Kolo 3.9Mo ni biuta tani na nomuni i tovo ni bula eliu, na nomuni i tovo ni bula makawa vata kei na kena gagadre e dau veitemaki ka dauveivakarusai. 23Me vakavoui sara na lomamuni kei na nomuni vakasama. 24Mo ni vakaisulu ena nomuni i tovo vou, sa caka me veiucui kei na Kalou ena yalododonu kei na yalosavasava.

25 # Saka 8.16 Sa rauta mada na lasulasu! Oi kemuni yadua e dodonu mo ni vosa dina sara ena kemuni maliwa, baleta ni da veitiki ni yago vata kecega nei Karisito. 26#Same 4.4 (LXX)Kevaka o ni sa cudru, ia me kakua ni vakavu i valavala ca vei kemuni. Ni kakua ni cudru tiko me yacova ni la'ki dromu na siga. 27Ni kua sara ni solia e dua na gauna me cakacaka kina na tevoro. 28O ira era butako tiko me ra sa muduka na butabutako, ia me ra vaqaqara cakacaka ga me rawa ni ra bula kina vakataki ira ka vukei ira talega na dravudravua. 29Ni kakua ni vakayagataka na veivosa eso ka dau veivakamavoataki, ia na vosa vinaka ga me vukea na kena vakatoroicaketaki na nodra bula me vaka na veika era gadreva, ka me yaga talega oqo vei ira era sa rogoci kemuni. 30Ni qai kakua ni vakararawataka na Yalo Tabu ni Kalou; ni sa vakatakilakilataka na Yalo Tabu ki lomamuni ni sa taukeni kemuni na Kalou, ka sa dregata e lomamuni ni na yaco dina mai na siga ni bula me ia kina na veivakabulai ni Kalou. 31Ni biuta tani kece sara na yalokatakata, na cudru, kei na yalo ca. Sa kua so na veikaraci, na veivosataki vakalialia, kei na yalo ni veicacati kecega. 32#Kolo 3.13Ia mo ni veilomani ga, ni veinanumi ka veivosoti vakai kemuni me vaka sa vosoti kemuni na Kalou ena vuku i Karisito.

Currently Selected:

EFESO 4: FNV

Highlight

Copy