VAKARUA 9
9
Na i Sau ni Talaidredre
(Lako 32.1-35)
1“Mo ni rogoca mada na Isireli! E daidai o ni sa na qalo kosova kina na uciwai na Joritani ka la'ki taukena na nodra vanua na veimatanitu lelevu ka kaukauwa cake mai vei kemuni, na veikoro lelevu ka cere ki lagi na kedra bai. 2Era tamata balabalavu ka kaukauwa, Oqo o ira na kawa i Anakimi, o ni dau rogoca na kedra i talanoa ni sega ni dua ena vorati ira rawa. 3Mo ni kila edaidai ni ko Jiova na nomuni Kalou ena liutaki kemuni yani me vaka e dua na bukawaqa rerevaki. Ena vakadrukai ira ka vakamalumalumutaki ira e matamuni me rawa kina ni o ni vakasavi ira ka vakarusai ira vakatotolo me vaka a yalataka ko Jiova.
4“Ni a vakasavi ira oti ko Jiova na nomuni Kalou, mo ni kakua ni kaya e lomamuni ni a kauti kemuni mai mo ni mai taukena na vanua oqo ena vuku ni nomuni vinaka. Sega, sa vakasavi ira tani na lewenivanua oqo ko Jiova baleta ga na nodra i valavala ca. 5Sa solia vei kemuni na nodra vanua ko Jiova ka segai ena vuku ni o ni sa rui vinaka ka dau caka dodonu. Ia sa na vakasavi ira tani ga o koya ni sa ca na nodra i valavala, e baleta talega ni gadreva me maroroya na nona vosa ni yalayala ka yalataka vei iratou na nomuni qase, o Eparama, Aisake kei Jekope. 6Mo ni kila ga, ni sa sega ni tu vei kemuni e dua na ka vinaka me kilikili kina vei Jiova me solia na vanua vinaka oqo me nomuni. E segai sara, ni kemuni sa rui tamata domoqa.
7“Mo ni kakua ni guilecava na nomuni a vakacudrui Jiova na nomuni Kalou ena vanua lala me tekivu mai na gauna o ni a biuti Ijipita mai kina me yacova sara na nomuni yaco mai ki ke; o ni sa dau talaidredre tikoga vua. 8Mai Ului Saineai#9.8 Saineai; se Orepi. mada ga, o ni a vakacudrui Jiova kina, ka sa cudru sara kina o koya ka voleka ni vakarusai kemuni. 9Au a lako cake ki na ulunivanua me'u la'ki kauta mai na vatu raraba e rua sa volai kina na veiyalayalati a cakava ko Jiova vata kei kemuni. Au a tiko e kea me vasagavulu na siga ka vasagavulu na bogi, ka'u sega ni bau kania se gunuva e dua na ka.#Lako 24.18 10A qai solia vei au ko Jiova na vatu raraba e rua ka vola ena nona i qaqalo, na vosa kecega, ka kaya vei kemuni mai na bukawaqa ena siga o ni a soqoni vata kina ena ruku ni ulunivanua. 11Ia ni sa oti yani na vasagavulu na siga kei na vasagavulu na bogi a qai solia vei au ko Jiova na vatu raraba e rua, sa volai kina na veiyalayalati.
12“A qai kaya vei au ko Jiova, “Mo siro sobu sara vakatotolo baleta o ira na nomu tamata, o ira o a liutaka tani mai Ijipita, era sa ca ka i valavala vakasisila. Era sa gole tani vakatotolo mai na sala au a vakarota vei ira, ka ra sa bulia e dua na matakau me nodra kalou.’
13“A sa kaya talega vei au ko Jiova, ‘Au sa kila na nodra vakadrecike na tamata oqo. 14Kua ni tarovi au, ni'u sa nakita me'u vakarusai ira me ra kakua ni nanumi tale. Au na qai vakayacori iko mo tama ni dua tale na matanitu levu ka kaukauwa cake sara mai vei ira.’
15“Au a qai vuki ka siro sobu mai na ulunivanua ka kauta sobu mai na vatu raraba e rua sa volai tu kina na veiyalayalati. A veiseyaki na yameyame ni buka mai na ulunivanua. 16Au a raica ni o ni sai valavala ca dina vei Jiova na nomuni Kalou, ni o ni a bulia e dua na i vakatakarakara ni luve ni bulumakau; ni o ni sa vakanadaku vakatotolo mai na sala a vakarota vei kemuni ko Jiova. 17Au a qai taura na vatu raraba e rua ka viritaka sobu, ka sa vorolaki e matamuni. 18Au a qai lesu tale ka vakamalumalumutaki au ena i serau i Jiova me vasagavulu na siga ka vasagavulu tale na bogi, ka sega ni kana madrai se gunu wai. Au vakayacora o ya baleta ni o ni sai valavala ca vei Jiova ka vakacudrui koya. 19Ni'u a rerevaka na cudru rerevaki i Jiova ni sa voleka sara me vakarusai kemuni, a sa yalololoma ko Jiova ka rogoci au tale.#Ipe 12.21 20E a cudruvi Eroni talega ko Jiova ka voleka ni vakarusai koya, au a qai vakamamasu ena vuku i Eroni ena gauna vata ga o ya. 21Au a qai taura na ka vakasisila o ya, na luve ni bulumakau o ni a bulia ka biuta ki na bukawaqa. Ia au a qai vorolaka vakamatailalai ka vakavurumemeataka sara me vaka na kuvu ni soso ka kaburaka ki na uciwai sa drodro sobu mai na ulunivanua.
22“O ni a vakacudruya talega na nomuni Kalou ko Jiova, ni o ni a tiko mai Tapera, mai Masa kei Kipiroci Ateva.#Tiko 11.3,34; Lako 17.7 23Ena gauna talega sa talai kemuni kina mai Katesi Banea ka vakarota mo ni la'ki taukena na vanua a solia vei kemuni, o ni a qai vorati Jiova na nomuni Kalou; o ni a sega ni vakabauti koya se talairawarawa ki na nona vosa.#Tiko 13.25—14.38; Vrua 1.21,26; Ipe 3.16 24O ni a dau vorati Jiova me vakatekivu mai na gauna a kilai kemuni kina.
25“Ena loma ni vasagavulu na siga kei na bogi, au a davo ka vakamalumalumutaki au ena mata ni Kalou ena gauna a via vakarusai kemuni kina ko Jiova. 26Au a masu ka kaya, “Kemuni Jiova, ni kakua ni vakarusai ira na nomuni tamata, o ni a sereki ira ka kauti ira tani mai Ijipita ena nomuni gumatua kei na kaukauwa levu ni ligamuni. 27Mo ni nanumi iratou na nomuni dauveiqaravi o Eparama, Aisake kei Jekope, ka kakua ni raica na nodra vakadrecike, na dukadukali kei na nodra i valavala ca na tamata oqo, 28de ra qai nanuma na kai Ijipita ni o ni sa sega ni kauti ira rawa na nomuni tamata ki na vanua o ni a yalataka vei ira. Era na kaya ni o ni a kauti ira ga ki na vanua lala mo ni vakamatei ira kina ni o ni sa rui cati ira. 29Sai ira oqo na nomuni tamata o ni a digitaka me nomuni, o ira o ni a kauti ira tani mai ena nomuni kaukauwa levu kei na ligamuni qaqa.’
Currently Selected:
VAKARUA 9: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
