VAKARUA 11

Na Kaukauwa i Jiova

1“Mo ni lomani Jiova na nomuni Kalou ka talairawarawa tikoga ki na nona i vunau kece sara. 2Mo ni nanuma mada na veika o ni a vulica me baleti Jiova mai na ka o ni a sota kaya ni o ni a bula voli vata kei koya. Oi kemuni sara ga o ni sa kila, ka sega ni o ira na luvemuni. O ni a raica na cecere i Jiova, na nona kaukauwa, na ligana qaqa, 3kei na veicakacaka mana sa cakava vua na tui Ijipita kei na nona matanitu taucoko.#Lako 7.8—12.13 4O ni a raici Jiova ni a vaqeyavutaka na mataivalu ni Ijipita, na nodra ose kei na nodra qiqinivalu, ni a luvuci ira ena Wasa Damudamu ena gauna era a vakasavi kemuni tiko mai kina.#Lako 14.28 5O ni sa kila vinaka na ka sa vakayacora vei kemuni ko Jiova ena loma ni vanua lala ni bera ni o ni yaco mai ki na vanua oqo. 6Mo ni nanuma na ka sa cakava vei Tecani kei Epairami na luve i Iliavi ena mataqali i Rupeni. E a tadola na qele ka tilomi rau kei na nodrau dui vuvale, nodrau dauveiqaravi kei na nodrau manumanu kecega.#Tiko 16.31-32 7Io, sai kemuni sara ga o ni a raica na veika lelevu kecega oqo ni a vakayacora ko Jiova.

Na Veivakalougatataki ni Vanua Yalataki

8“Mo ni talairawarawa ki na lawa kece sara ka'u sa solia vei kemuni edaidai. Ia o ni na qai vakaukauwataki mo ni takosova rawa kina na uciwai ka lako yani mo ni la'ki taukena na vanua o ni sa vakarau curuma. 9Me na balavu kina na gauna o ni tiko kina ena vanua sa dave kina na sucu kei na oni ka a yalataka ko Jiova vei ira na nomuni qase me soli vei ira na nodra kawa. 10E sega ni tautauvata na vanua o ni vakarau la'ki tawana kei Ijipita na vanua o ni a tiko kina e liu. Ni o ni tea, mai kea na nomuni sore ni kau o ni a dau cakacaka sara vakaukauwa mo ni vakadrodroya yani na wai ki na nomuni vanua ni teitei. 11Ia na vanua o ni sa vakarau la'ki tawana, e vanua bucabuca ka veiulunivanua; na vanua sa dau vakasuasuataka ga na uca. 12Sa qarauna vinaka na vanua oqo ko Jiova na nomuni Kalou, ia na matana sa wanonova ena loma ni yabaki taucoko.

13“Ia oqo, mo ni talairawarawa ki na i vunau kece au sa solia vei kemuni edaidai; mo ni lomani Jiova na nomuni Kalou ena lomamuni taucoko kei na yalomuni taucoko.#Vsoro 26.3-5; Vrua 7.12-16; 28.1-14 14Kevaka o ni vakayacora oqo, ena qai vakatauca mai na uca ena kena gauna taudonu, o ya na uca taumada kei na uca taumuri, ka mo ni kumuna vata rawa kina na kemuni sila, na waini, kei na waiwai. 15Ena vakatubura na co ena nomuni lomanibai kecega me kedra na nomuni manumanu yava i va, ia o kemuni o ni na kana ka mamau. 16Ni qarauna mo ni kakua ni vakacalai mo ni vakanadakuya kina na Kalou ko Jiova, ka qarava na veikalou tani. 17Kevaka o ni gole tani, ena qai cudruvi kemuni ko Jiova. Ena qai tarova o koya me kakua ni tau na uca ka na sega kina ni vuataka na vuata na vanua, ka na totolo sara kina na nomuni rusa laivi mai na vanua vinaka sa solia vei kemuni ko Jiova. 18“Mo ni tugana ena lomamuni kei na yalomuni na veivakaro oqo. Mo ni bukia ena ligamuni ka vesuka me i vakatakilakila ena yadremuni. 19Mo ni vakavulica vei ira na luvemuni. Mo ni veivosakitaka ni o ni tiko e vale, ka vakakina ni o ni tiko tani; ni o ni cakacaka tiko ka vakakina ni o ni vakacegu tiko. 20Mo ni vola ena duru ni katuba ni nomuni vale kei na nomuni matamata ni lomanibai.#Vrua 6.6-9 21O ni na qai bula balavu kina kei ira na luvemuni ena vanua sa yalataka ko Jiova na nomuni Kalou me solia vei ira na nomuni qase. O ni na qai tiko vakadede e kea me vaka na dede ni tiko ni lomalagi ena dela i vuravura.

22“Kevaka o ni na vakayacora vakavinaka na noqu i vunau kecega au sa vakarota vei kemuni, ka lomani Jiova na nomuni Kalou, ka muria na nona sala kecega ka yalodina tikoga vua, 23ena qai vakasavi ira kece na veimatanitu oqo ko Jiova ena matamuni ka o ni na qai vakamalumalumutaka na veimatanitu lelevu ka kaukauwa cake mai vei kemuni. 24Na vanua kecega ena butuka na qeteqete ni yavamuni o ni na taukena. Na nomuni vanua ena tekivu sara mai na vanua lala ena ceva ka yaco sara ki na Ulunivanua o Lepanoni ena vualiku, ka na tekivu mai na uciwai na Uferetisi mai na tokalau ka yaco sara ki na ra ni Wasa Meditereni.#Josua 1.3-5 25Ena sega sara ni dua me na tarovi kemuni rawa. Ko Jiova na nomuni Kalou ena vakavuna me ra rerevaki kemuni o ira na tamata ena yasana kecega o ni lako kina ena vanua o ya, me vaka sa yalataka. 26“Raica, au sa tauca e matamuni edaidai na ka mo ni kalougata kina kei na ka mo ni rusa kina. 27Ena yaco vei kemuni na kalougata kevaka o ni talairawarawa ki na i vunau kece i Jiova na nomuni Kalou au sa solia vei kemuni edaidai. 28Ia o ni na rusa, kevaka o ni sega ni muria na i vunau kece oqo, ka vuki tani mo ni qarava na veikalou tani o ni a sega mada ni bau qarava e liu. 29Ia ni sa kauti kemuni ko Jiova ki na vanua o ni sa na la'ki taukena mo ni qai kacivaka na veivakalougatataki oqo ena dela ni Ulunivanua o Qerisimi, ka kacivaka na veivakarusai ena dela ni Ulunivanua o Ipali.#Vrua 27.11-14; Josua 8.33-35 30(O rau na ulunivanua oqo erau toka ena ra ni Uciwai na Joritani ena nodra vanua na kai Kenani ka ra tiko ena Buca o Joritani. E rau toka vaka ki na ra, ka sega soti ni yawa mai na veivunikau tabu mai More volekata na koro o Kilikali.) 31O ni sa vakarau takosova na uciwai na Joritani ka la'ki tawana na vanua sa solia vei kemuni ko Jiova na nomuni Kalou. Ia ni o ni sa taukena ka tiko kina, 32mo ni qarauna na kena muri na i vunau kece sara au sa solia vei kemuni edaidai.

Currently Selected:

VAKARUA 11: FNV

Highlight

Copy