2 KORINICA 12
12
Na Raivotu kei na i Vakatakila Eso e Yaco vei Paula
1Sa na dodonu me'u dokadokai au; dina ga ni sega ni dua na ka e kauta mai. Ia au sa na vakayacora ga me'u tukuna kina na raivotu eso kei na i vakatakila e solia mai vei au na Turaga. 2Au kila e dua na tamata lotu Vakarisito sa kau cake ki na i katolu ni lomalagi ena tinikava na yabaki sa oti. (Au sega ni kila se a yaco dina na ka oqo se a raivotu ga, e kila taudua ga na Kalou.) 3Au kila ni a kau cake na tamata koya ki Parataisi. (Au sega talega ni kila se a yaco dina na ka o ya se a raivotu ga. Sa kila taudua ga na Kalou.) 4E a rogoca mai kea na veika e sega ni rawa ni tukuna ena vosa, na veika e sega ni rawa ni vosataka na tamata. 5Na tamata koya sai koya au vakalevulevuya, ia au sega ni dokadokai au kina vakavo walega na veika e vakaraitaka na noqu malumalumu. 6Kevaka au dokadokai au e sega beka ni baleta ni'u lialia, ia e baleta ga ni'u via tukuna na ka dina. Ia au na sega ni boletaki au baleta ni'u sega ni vinakata me dua e nanuma ni'u vinaka cake mai vua, ka me raica ga na veika au sa cakava ka rogoca na ka au a kaya.
7Ia me tarovi au me'u kakua kina ni vakacerecerei au ena vuku ni veika lagilagi e vuqa au a raica, sa qai soli vei au e dua na mate mosi ka vaka me i talai i Setani me vakararawataki au, ka me tarovi au tiko me'u kakua ni dokadokai au. 8Au masulaka vakatolu na ka oqo vua na Turaga, me kau tani vei au. 9Ia sa qai kaya vei au na Turaga, “Sa rauti iko na noqu lolomasavu; ni sa dau yaco me ka taucoko na noqu kaukauwa ena vanua e tu kina na malumalumu.” Sa i koya oqo au na dau boletaka kina ena marau na noqu malumalumu, me na maroroi au tikoga kina na kaukauwa i Karisito. 10Oqo na vuna au sa marautaka kina na malumalumu, na veivakasewasewani, na veika dredre, na veivakararawataki kei na veika dredre ena vuku i Karisito; ka ni gauna au malumalumu kina au sa na qai kaukauwa.
Na Nona Kauwaitaki Ira na Kai Korinica o Paula
11Au a yaco me'u vaka na lialia! Ia sai kemuni ga o ni vakavuna. Na kena dodonu mo ni tukuni au vakavinaka, ni'u sega ni lolovira mai vei ira na i apositolo lasu o ya, ia dina ga ni'u sega ni dua na ka. 12Na i vakatakilakila ni apositolo dina au sa vakayacora ena yalovosota ena kemuni maliwa, ena cakacaka mana kei na veika veivakurabuitaki eso. 13A cava na ka o ni sa lolovira kina mai vei ira na veivavakoso lotu tale eso, ka vaka vo walega na noqu sega ni vakaogai kemuni ena dua na ka? Ni vosoti au ena noqu cala!
14Sa i koya oqo na i katolu ni gauna me'u vakarau lako yani kina vei kemuni, ka'u na sega talega ni via vakaogai kemuni. Au sega ni vinakata na nomuni lavo, ia au vinakati kemuni ga. E sega ni dodonu me ra maroroi ka na gone me baleti ira nodra i tubutubu, ia e dodonu ga me ra mamaroroi na i tubutubu me baleti ira na luvedra. 15Au taleitaka me'u vakayagataka na veika e tu vei au, ka vakayagataki au talega ena vukumuni. O ni na lomani au beka vakalailai ke'u lomani kemuni vakalevu?
16O ni na vakadinadinataka ni'u sa sega ni vakaogai kemuni ena dua na ka. Ia eso vei kemuni ena kaya ga ni'u sa dauveidabui ka daucoriti kemuni ena veika lasu. 17E rawa vakacava? Au a vakaiyau li mai vei ira ka'u a tala yani vei kemuni? 18Au a vakamasuti Taito me lako yani ka tala vata kaya yani e dua na wekada. Sa la'ki qara beka vei kemuni o Taito na ka me baleti koya ga? Sa sega beka ni tautauvata na yalo i keirau kei na i tovo ni neirau bula ni veiqaravi?
19O ni sa rairai nanuma beka ni keitou a tovolea voli ga ena veigauna kece oqo me keitou taqomaki keitou. E sega sara ni vakakina! Keitou sa vosa ga ena mata ni Kalou me vaka e vinakata na Karisito. Na veika kece sara talega keitou cakava vei kemuni na veiwekani sa vakayacori mo ni vukei kina. 20Au sa leqataka tiko de'u na yaco yani ki keri ka'u qai kunea ni o ni sa sega ni vaka na veika ka'u sa namaka tiko, ka o ni na kunei au talega ni'u sa sega ni vaka na veika o ni sa nanuma. Au sa leqataka de sa tiko ena kemuni maliwa na veivala kei na vuvu, na yalokatakata kei na nanumi koya vaka i koya, na veivakasewasewani kei na veikaseti, na dokadoka kei na kena sega ni tuvai vakavinaka tu na ka. 21Au sa ririkotaka de qai vakamalumalumutaki au na Kalou e matamuni ena gauna au lesu yani kina, ka'u na qai tagicaki ira na lewe vuqa era sa bale oti ki na ca ka sega ni veivutunitaka na veika dukadukali kei na dauyalewa kei na gagadre ca era sa vakayacora.
Currently Selected:
2 KORINICA 12: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
