1 TIMOCI 3
3
O Ira na Veiliutaki ena i Soqosoqo Lotu
1Oqo e dua na vosa dina: Kevaka e dua sa gadreva me veiqaravi vakaveiliutaki ena loma ni lotu, sa gadreva o koya na cakacaka uasivi ka vakaturaga. 2#Taito 1.6-9O koya sa veiliutaki ena loma ni lotu me tawa cala, me dua ga na watina, me tamata mamakutu, me yalomatua, me i tovo vinaka, me tamata vakasama vinaka, me dauvakacegui ira na tamata ena nona vale, me matau sara ena cakacaka ni veivakavulici; 3o koya me kua ni daumateni se i tovo kaukauwa, ia me yalomalua ga ka yalomalumalumu; me kakua ni dau kocova na i lavo; 4me rawa ni lewa vakavinaka na nona matavuvale ka tuberi ira na luvena me ra rogoca na nona vosa ena vakarokoroko. 5Ni kevaka e dua na tamata sa sega ni lewa rawa vakavinaka na nona matavuvale, ena qai la'ki lewa rawa li vakaevei o koya na i soqosoqo lotu ni Kalou? 6O koya me matua sara ena vakabauta, de qai viavialevu ka tini ena cudruvi me vakataki koya na tevoro. 7E dodonu me tamata dokai mai vei ira na tamata ena taudaku ni lotu, me kakua kina ni vakamadualaki ka coriti ena dai ni tevoro.
O Ira na Dauveivuke Eso ena Soqosoqo Lotu
8O ira talega na dauveivuke ena soqosoqo lotu sa dodonu me ra tamata i tovo vinaka ka yalodina. Me ra kua ni dau veivakaisini ena vosa; me ra kua ni gunuva vakasivia na waini se kocova na i lavo. 9Ena lewa-e-loma e savasava, me ra taura matua na dina titobu ni vakabauta. 10E dodonu me ra vakatovolei mada e liu, ka me qai vakadonui me ra veiqaravi kevaka sa rawati na veika e lavaki vei ira. 11Na watidra talega me ra i tovo vinaka ka me ra kakua ni daukakase; me ra yalomalumalumu ga ka yalodina ena ka kecega. 12O koya na dauveivuke ena soqosoqo lotu e dodonu me dua ga na watina, ka lewai ira vinaka na luvena kei na nona matavuvale. 13O ira na dauveivuke era qarava vinaka na nodra i tavi era na vakairogorogo sara ka dokai vakalevu ena vuku ni nodra vakabauti Karisito Jisu.
Na i Tukutuku Vuni ni Noda Lotu
14E noqu vola tiko na i vola oqo vei iko, au nuitaka me'u na lako totolo yani ka sotavi iko. 15Ia kevaka au mani bera yani, o sa na kila rawa tiko o iko na ka e dodonu me ra vakaitovotaki ira kina na tamata ena vuvale ni Kalou, oqori na i soqosoqo lotu ni Kalou bula, na duru kei na yavu ni vakavuvuli dina. 16Sa sega ni qai vakatitiqataka rawa e dua na kena cecere na i tukutuku vuni ni noda lotu:
Sa rairai vakatamata na Kalou,
Sa kena i vakadinadina na Yalo Tabu,
Ka ra sa raici koya na agilosi.
Sa vunautaki o koya vei ira na veimatanitu,
Ka sa vakabauti e vuravura taucoko,
Sa kau cake ena lagilagi ki lomalagi.
Currently Selected:
1 TIMOCI 3: FNV
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.