1 JONI 3
3
O Ira na Luve Ni Kalou
1 #
Joni 1.12
Raica na loloma uasivi sa solia vei keda na Tamada! Sa rui cecere sara na nona loloma ni da sa vakatokai me da luve ni Kalou; eda sa vaka dina kina. Oqo na vuna sa sega ni kilai keda kina o vuravura, ni ra sa sega ga ni kila na Kalou. 2Oi kemuni na wekaqu lomani, eda sa yaco me da luve ni Kalou, ia e se sega tiko ni matata se da na vakaevei emuri. Na ka ga eda sa kila ni da na vakataki Karisito ena nona rairai mai, baleta ni da sa na raici koya kina ena matana votu. 3O koya vakayadua sa tiko vua na i nuinui oqo vei Karisito me na maroroya tiko na savasava ni Kalou, me vaka ni sa savasava na Karisito.
4O koya yadua sai valavala ca sa vakadinata ni sa basuka na lawa ni Kalou, baleta na i valavala ca sai koya na talaidredre ki na lawa. 5#Joni 1.29O ni sa kila ni a rairai mai ko Karisito me kauta laivi na i valavala ca ni tamata; a sa sega ga vua na i valavala ca. 6O koya oqo sa sega kina ni kitaka tikoga na i valavala ca o koya sa tudei tiko vei Karisito; ia o koya sa kitaka tikoga na i valavala ca sa sega vakadua ni se bau raici koya se kilai koya.
7Oi kemuni na luvequ lomani, me kakua sara ni vakacalai kemuni e dua na tamata! O koya sa caka dodonu sa tamata yalododonu, me vaka sa yalododonu ko Karisito. 8O koya sa tomana tikoga na i valavala ca sa mai vua na tevoro, baleta ni sa kitaka ga na i valavala ca na tevoro mai na i vakatekivu ni gauna. Oqo ga na vuna sa rairai mai kina na Luve ni Kalou, me vakarusa na cakacaka ni tevoro.
9Sa sega ni dua vei ira sa yaco me ra luve ni Kalou me tomana tikoga na bula ni valavala ca, ni sa tiko vei ira na i tovo ni Kalou. Me vaka ni sa Tamadra na Kalou, sa sega ni ra kitaka tikoga kina na i valavala ca. 10Sa vakatakilai vinaka ena ka oqo na kena duidui o ira na luve ni Kalou mai vei ira na luve ni tevoro: o koya sa sega ni vakayacora na ka dodonu ka sega ni lomana na wekana sa sega ni luve ni Kalou.
Me da Veilomani Vakaveiwekani
11 #
Joni 13.34
Sa i koya oqo na i tukutuku o ni a rogoca mai na i vakatekivu: me da veilomani vakaveiwekani. 12#Vteki 4.8Me da kakua ni vakataki Keni, na luve ni vunica, o koya sa labata na tacina o Epeli. A cava beka na vuna e vakamatei tacina kina? E baleta ga ni sa cala ga na veika sa cakava o koya, ia sa dodonu na veika sa cakava o tacina.
13Ni kakua ni kurabui, kemuni na wekaqu, kevaka sa cati kemuni o ira na kai vuravura. 14#Joni 5.24Eda sa kila ni da sa dewa oti mai na mate ki na bula; eda sa kila oqo baleta ni da sa dau lomani ira na wekada. O koya sa sega ni lomana na wekana sa tiko ga ena ruku ni veiliutaki ni mate. 15O ira kecega sa cata na wekadra era sa daulaba, ka o ni sa kila ni sa sega sara ni tiko e lomana na daulaba na bula tawamudu. 16Eda sa qai kila vakaoqo na i balebale ni loloma: ni sa solia ga na Karisito na nona bula ena vukuda. Sa dodonu talega vakakina me da solia na noda bula ena vukudra na wekada. 17O ira vakayadua sa tu vei ira na i yau ni vuravura oqo, ka ra sa raici ira na wekadra ni ra leqa tu, ka sega ni lomana, sa sega ni rawa ga me ra tukuna voli ni ra sa lomana na Kalou. 18Kemuni na luvequ lomani, me kakua ni ka ni vosa walega se ka ni veitalanoa na noda loloma; ia me yavutaki ga ena loloma dina sa vakaraitaki ena kena cakacakataki.
Yalodoudou ena Mata ni Kalou
19Ena ka oqo, eda sa qai kila kina ni sa tu vei keda na dina; ka sa vakataudeitaki keda talega me da yalodoudou kina ena mata ni Kalou. 20Ni kevaka sa beitaki keda na yaloda, eda sa kila ni sa uasivi cake ga na Kalou mai na yaloda, ka sa kila na veika kecega. 21O koya oqo kemuni na wekaqu lomani, ni kevaka sa sega ni vakacalai keda na yaloda, eda sa qai yalodoudou sara ena mata ni Kalou. 22Eda sa rawata mai vua na veika kece eda kerea, ni da sa muria tiko na nona i vakaro ka kitaka tiko na ka sa vinaka vua. 23#Joni 13.34; 15.12,17Na nona i vakaro ga sai koya me da sa vakabauta na Luvena ko Jisu Karisito ka veilomani tiko, me vaka sa vakarota vei keda ko Karisito. 24O ira kece sa muria tiko na i vakaro ni Kalou era sa bula ga vua na Kalou ka sa tiko vata kei ira na Kalou. Ia ena vuku ni Yalo Tabu sa solia vei keda na Kalou, eda sa kila kina ni sa bula tiko vata kei keda na Kalou.
Currently Selected:
1 JONI 3: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.