1 KORINICA 5

Na i Valavala Velavela ena Loma ni Lotu

1Sa rogo mai ni caka tiko na dauyalewa ena kemuni maliwa, na mataqali dauyalewa ka sega mada ga ni kune ena kedra maliwa na tawa-lotu; o ya ni dua vei kemuni e rau la'ki veimoceri tale tiko kei na tinana vakacabecabe!#Vrua 22.30 2E rawa vakacava mo ni se viavialevu tikoga? E sega li ni kena dodonu me rarawa na yalomuni ena vuku ni ka oqo, ka me vakatalai tani kina mai na kemuni maliwa o koya e vakayacora tiko? 3Ia oi au, e dina au tiko tani yani oqo vakayago, au sa tiko vata ga vakayalo kei kemuni, ka'u sa vakatauca oti na noqu lewa me baleta na tamata sa vakayacora na i tovo toro sobu oqo. 4Ena yaca ni Turaga ko Jisu, mo ni soqoni vata, ka me tiko kei kemuni na yaloqu vata kei na kaukauwa ni noda Turaga ko Jisu, 5mo ni qai soli koya sara na tamata oqori vei Setani me vakarusai kina na yagona, ka me na vakabulai na yalona ena siga ena lesu mai kina na noda Turaga. 6E sega ni dodonu na nomuni vakadokadokai kemuni tiko. O ni sega beka ni kila ni vakalailai walega na i vakatubu sa rawa ni tubu kina na i buli madrai taucoko?#Kala 5.9 7O koya oqo mo ni biuta tani kina na i vakatubu makawa ni valavala ca me rawa ni o ni savasava sara kina. Ena qai vaka e dua na i buli madrai vou sa sega ni vakatubutaki oi kemuni, ka'u kila ni o ni sa vaka dina o ya. Ni sa vakarau tu oqo na noda Solevu ni Lakosivia, ni sa vakacabori oti na noda lami ni Lakosivia, ko Karisito.#Lako 12.5 8Ena ka oqo, me da solevutaka kina na Lakosivia, ka segai ena madrai sa tu kina na i vakatubu makawa ni valavala ca kei na veitovo vakasisila, ia ena madrai ga sa sega ni vakatubu, na madrai ni yalosavasava kei na dina.#Lako 13.7; Vrua 16.3

9Au sa vola yani ena noqu i vola mo ni kakua ni dau vakailala vata kei ira na tamata dau veidauci. 10Sa sega ni'u vakaibalebaletaka oqo vei ira na tawa-lotu ni vuravura oqo era dau veidauci, se o ira na daukocokoco, se daubutako, se o ira na dau qarava na kalou matakau, baleta ni na yaco ga oqori kevaka o ni sa lako tani vakadua mai na vuravura oqo. 11Na i balebale ga ni noqu i vola o ya mo ni kakua ni vakailala vata kaya e dua sa kaya tiko ni sa tamata vakabauta, ia sa ia tikoga na veidauci, se daukocokoco, se dau qarava na kalou matakau, se dauveivakasewasewani, se daumateni, se daubutako. Mo kakua sara mada ga ni kana vata kei na tamata vaka o ya.

12Ena veika kece oqo, sa sega ni noqu bisinisi me'u lewai ira era sa tiko e tautuba. Ena qai lewai ira ga na Kalou. Ia e sega li ni dodonu mo ni lewai ira na lewe ni nomuni soqosoqo lotu? 13Ni sa kaya na i Vola Tabu, “Ni biuta tani mai na kemuni maliwa na tamata i tovo ca.”#Vrua 13.5; 17.7 (LXX)

Currently Selected:

1 KORINICA 5: FNV

Highlight

Copy