Ruci 4
4
Na Vakawati nei Poasa kei Ruci
1A qai lako o Poasa ki na vanua ni soqo ena matamata ni koro ka la'ki tiko sobu kina. Ena gauna vata talega o ya a yaco mai kina na weka i Ilimeleki voleka duadua, o koya ka kaya tiko o Poasa. A qai kaya sara vakaoqo vua o Poasa, “Mo lako mai na wekaqu ka mai dabe eke.” A mai lako sara yani o koya ka dabe sobu. 2Sa qai kacivi iratou na lewe tini na qase ni koro o ya o Poasa ka kaya, “Dou mai dabe mada eke.” Ni ratou sa dabe sobu, 3sa qai vosa sara vua na weka i Ilimeleki voleka duadua o Poasa ka vaka, “Ia me vaka ni sa lesu mai na vanua o Moapi o Neomai, a sa vinakata me volitaka e dua na tiki ni vanua ka nei Ilimeleki na wekadrau. 4A sa lomaqu kina me'u vakaraitaka taumada vei iko. Ia kevaka o vinakata mo taura, mo volia e matadratou na qase sa dabe tiko oqo; ia mo tukuna talega vei au kevaka o sega ni via volia, me vaka ni sa nomu vakailiu na dodonu ni veivoli ka qai muri oi au.”
A sa kaya na wekana, “Au sa na volia na tiki ni vanua o ya.”
5A qai kaya tale o Poasa, “Sa vinaka, ia ena siga o volia kina na tiki ni vanua mai vei Neomai, sa okati vata kina na nomu voli Ruci na yalewa ni Moapi me rawa kina ni tiko ga na lewa ni tiki ni vanua oqo ena matavuvale i koya ka sa mate.”
6A sauma na wekana ka kaya, “Kevaka sa vaka oqori, ia au sa na sega ni volia tale kina na tiki ni vanua o ya, baleta ni ratou na sega ni vakaivotavota kina na luvequ. Mo volia ga o iko na ka sa dodonu me'u volia. Au sa na sega ni volia.”
7Sa dau vakaoqo ga na kena i vakarau e Isireli ena gauna e liu me i vakatakilakila ni sa vakadeitaki na veivoli kei na veisau, o ya me luvata na nona i vava o koya e volivolitaki ka solia vei koya e veivoli. A veika oqo e vakadinadinataki kina ena kedra maliwa na Isireli ni sa vakataudeitaki na veivoli.#Vrua 25.9
8Ena ka oqo, a sa luvata kina na nona i vava na tamata o ya ka solia vei Poasa ena gauna sa kaya kina, “Mo volia ga me nomu.” 9Sa qai kaya o Poasa vei ira na qase kei ira kecega na tamata, “O ni sai vakadinadina kece sara edaidai ni'u sa volia mai vei Neomai na veika kece sa taukena o Ilimeleki kei rau na luvena o Kilioni kei Maloni. 10Au sa voli Ruci talega na yalewa ni Moapi ka yada i Maloni, me watiqu; me bula tikoga kina na yaca i koya sa mate ena nona i votavota, me kakua kina ni yali na yacana ena kedra maliwa na wekana kei na matamata ni nona koro. O ni sai vakadinadina kina ena siga oqo.”#Vrua 25.5-6
11Era a qai kaya o ira kece ka ra tiko e kea, “Io, keimami sa kena i vakadinadina. Me vakayacora mada o Jiova vua na watimu me tautauvata kei rau o Rejeli kei Lia, oi rau na yalewa ka rau a vakatubu kawa vakalevu vei Jekope. Ia mo yaco o iko mo tamata vutuniyau e Efiraca ka rogo na yacamu e Peceliema.#Vteki 29.31 12Me tautauvata kaya mada ga na kawa i Feresi, na luvedrau o Juta kei Tema o ira na nomu kawa ena solia vei iko o Jiova mai vua na yalewa oqo.”#Vteki 38.27-30
O Poasa kei na Nona Kawa
13A sa kauti Ruci o Poasa ki na nona vale me watina. A sa vakalougatataki koya o Jiova, a sa kunekune, ka sa vakasucuma e dua na luvena tagane. 14Era a qai kaya vei Neomai o ira na yalewa, “Me vakavinavinakataki mada ga o Jiova ni a solia vei iko edaidai na nomu kawa. Me na rogo levu na yacana na gone oqo e Isireli! 15Me solia mada ga vei iko na gone oqo na bula vou, ka me na yaco me nomu i tokani ni o sa qase mai; ni sa vakasucuma na vugomu o koya ka dau lomani iko, ka uasivi cake mai na le vitu na luvemu tagane.” 16A sa kauta na gone o Neomai, a sa roqota ki lomaserena, ka susugi koya.
17Era a qai vakayacani koya na yalewa ni Peceliema, era sa kaya, “Sa sucu e dua na luve i Neomai tagane!”
Era a vakatoka me yacana o Opeti; ka sa yaco me tama i Jese, na tama i Tevita.
18Ia oqo na kawa i Feresi: e luve i Feresi o Esironi: 19Na luve i Esironi o Rami ka luve i Rami o Amenatave. 20Na luve i Amenatave o Nasoni ka luve i Nasoni o Salimoni. 21Na luve i Salimoni o Poasa ka luve i Poasa o Opeti. 22Na luve i Opeti o Jese ka luve i Jese o Tevita.
Currently Selected:
Ruci 4: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.
