Marika 13

Sa Tukuna o Jisu na Rusa ni Valenisoro

(Maciu 24.1-2; Luke 21.5-6)

1Ia ni sa biuta mai na Valenisoro o Jisu, sa kaya vua e dua vei iratou na nona tisaipeli, “Na i Vakavuvuli, ni raica mada na lelevu ni vatu kei na lagilagi ni veivale oqo!”

2Sa qai kaya vua o Jisu, “O sa raica na veivale lelevu oqo? Ena sega ni vo tale eke eso na vatu me veitaqataqai tu, era na talaraki sobu kecega.”

Na Leqa kei na Veivakararawataki

(Maciu 24.3-14; Luke 21.7-19)

3Ia ni sa dabe tiko o Jisu mai na Ulunivanua ni Veiolive, ka taudonuya na Valenisoro, e ratou sa qai tarogi koya lo o Pita kei Jemesa, kei Joni kei Adriu ka ratou kaya, 4“Ni tukuna mada vei keitou ena yaco beka e naica na veika oqo, ka cava na kena i vakatakilakila ni ra sa vakarau yaco?”

5Sa kaya vei iratou o Jisu, “Dou qarauna me kakua ni dua e vakacalai kemudou. 6E lewe vuqa era na lako mai ka mai lasutaka na yacaqu ka kaya, ‘Sa i au ga o koya!’ ka ra na vakacalai ira e lewe vuqa. 7Ia ni dou sa rogoca na veivaluvaluti kei na i rogorogo ni valu, dou kakua ni kidroa; sa dodonu me yaco mada na veika oqori, ia e sa bera ga na i vakataotioti. 8Ni ra na veisaqasaqa na veivanua, ka ra veisaqasaqa na veimatanitu; ena yaco na uneune ena veivanua e vuqa, ena yaco na dausiga; ia oqo e sa qai i vakatekivu ga ni veika rarawa me vaka na nona mosi na yalewa sa taratara.

9“Ia oi kemudou, dou qarauni kemudou vinaka; ni ra na beitaki kemudou yani ki na mataveilewai eso, ka dou na vakanakuitataki ena veivalenilotu; ka dou na kau ena matadra na kovana, kei ira na tui ena vukuqu, me kena i vakadinadina vei ira.#Maciu 10.17-20; Luke 12.11,12 10Ia sa dodonu me vunautaki mada e liu na i Tukutuku Vinaka ena veivanua kecega. 11Ni ra sa vesuki kemudou mo dou lewai, dou kakua ni leqataka na ka mo dou na kaya; ia mo dou na qai kaya ga na ka kecega e soli vei kemudou ena tiki ni gauna o ya. Dou na sega ni vosa oi kemudou, ia ena vosa ga na Yalo Tabu. 12Era na dui solia na tamata na tuakadra se tacidra me vakamatei ka na solia na luvena na tamana, ka ra na vorati ira na nodra i tubutubu o ira na gone, ka soli ira me ra vakamatei. 13Era na cati kemudou na tamata kecega ena vuku ni yacaqu. Ia o koya ga e vosota me yacova na i vakataotioti ena vakabulai.#Maciu 10.22

Na ka Vakasisila e Veivakarusai

(Maciu 24.15-28; Luke 21.20-24)

14“Ia ni dou sa raica na ka vakasisila e vu ni veivakarusai ni sa tiko ena tikina tabu me vaka sa vosa kina o Taniela na parofita (me kila o koya sa wilika na ka oqo), me ra dro sara ki na veidelana o ira era tiko e Jutia;#Tani 9.27; 11.31; 12.11; 1M 1.54; 6.7 15me kakua ni vakaoti gauna tale o koya sa tiko ena dela ni nona vale, me la'ki kauta mai kina e dua na ka.#Luke 17.31 16Me kakua ni lesu o koya sa tiko ena vanua ni teitei me la'ki kauta mai na nona i sulu. 17Sa na dua na gauna ca vei ira na yalewa bukete, kei ira ka sa vakasucu gone tiko na gauna o ya! 18Ia dou masulaka me kakua mada ga ni yaco na veika o ya ena vula i liliwa. 19Ni na vakadomobula cake sara na veika rarawa ena yaco ena gauna o ya mai na veika sa sotava oti o vuravura, me tekivu mai na gauna ka a bulia kina na Kalou me yacova na gauna oqo. Ena sega talega ni yaco e muri e dua na ka me vakakina.#Tani 12.1; Vtaki 7.14 20Kevaka e qai sega ni vakalekalekataka na gauna o ya na Turaga, ena sega ni dua na tamata me vakabulai. Ia sa vakalekalekataka ga na gauna o ya o koya ena vukudra na nona tamata digitaki.

21“Ia kevaka e dua sa kaya vei kemudou, ‘Raica, sa tu oqo na Mesaia!’ se ‘Raica, o koya o ya!’ — dou kakua sara ni vakabauta. 22Ni ra na tubu mai na Mesaia vakailasu kei na parofita vakailasu, ka vakaraitaka mai na veivakatakilakila kei na veika veivakurabuitaki, me vakacalai ira kina na tamata digitaki ni Kalou, kevaka e rawa. 23Dou qarauni kemudou vinaka! Au sa tukuna rawa na veika oqo vei kemudou ni bera ni yaco mai na kena gauna.

Na Lako mai ni Luve ni Tamata

(Maciu 24.29-31; Luke 21.25-28)

24“Ia ena gauna o ya, ni sa oti na veika rarawa oqori, ena qai vakabutobutotaki na matanisiga, ka sa na sega talega ni cila na vula;#Aisea 13.10; Joeli 2.10,31; 3.15; Vtaki 6.12; Aisea 13.10; Isi 32.7 25ka ra na qeqera mai na veikalokalo mai lomalagi, ka ra na vakayavalati na veika kaukauwa ni maliwa lala.#Aisea 34.4; Vtaki 6.13; Joeli 2.10 26Era sa na qai raica na Luve ni Tamata ni sa lako mai ena o ena kaukauwa levu kei na i serau.#Tani 7.13; Vtaki 1.7 27Ena qai talai ira yani na agilosi o koya me soqoni ira vata na digitaki mai na veimatanicagi e va, mai na i yalayala kei vuravura ka yacova na i yalayala kei lomalagi.

Na Vosa Vakatautauvata Baleta na Vunilolo

(Maciu 24.32-35; Luke 21.29-33)

28“Dou vulica mada e dua na vosa vakatautauvata baleta na vunilolo: ni sa rovu mai na tabana, ka tubu mai na drauna, dou sa kila ni sa voleka na vula i katakata. 29Me vakakina, ni dou sa raica ni sa yaco na veika oqo, dou kila ni sa voleka mai o koya, io sa tu sara ga e katuba. 30Au sa kaya vakaidina vei kemudou, ena yaco mada e liu na veika kece o ya ni bera ni takali yani na i tabatamata oqo. 31Ena takali o lomalagi kei vuravura, ia na noqu vosa ena sega sara ni takali.

E Sega ni Dua e Kila na Kena Siga se na Kena Gauna

(Maciu 24.36-44)

32“Ia e sega ni dua e kila na siga o ya, se na kena gauna, era sega ni kila na agilosi mai lomalagi, se na Luvena; sa kila duadua ga o Tamaqu.#Maciu 24.36 33Dou qarauni kemudou vinaka, dou yadra tiko ka masu; ni dou sa sega ni kila na kena gauna. 34Sa vaka e dua na tamata e vakarau lako ena dua na i lakolako. Sa biuta tu mai na nona vale me ra vakatawa o ira na nona tamata, ka solia tu na cakacaka me ra dui qarava, ka sa vakaroti koya sa dauyadrava na katuba me yadrava tiko.#Luke 12.36-38 35O koya oqo mo dou yadra tiko, ni dou sega ni kila na gauna ena yaco mai kina na i taukei ni vale, ena yakavi, se ena lomaloma ni bogi, se ena tagi ni toa, se ena mataka lailai; 36de na lako vakasauri mai ka kunei kemudou ni dou moce lutu tu. 37Na ka au sa kaya vei kemudou, au sa kaya vei ira na tamata kecega, ‘Ni yadra tiko!’ ”

Currently Selected:

Marika 13: FNVDC12

Highlight

Copy