Maciu 28

Na Tu Cake Tale Mai na Mate

(Mari 16.1-10; Luke 24.1-12; Joni 20.1-10)

1Ni sa oti na Siga ni Vakacecegu, ka sa kida cake mai na mataka ni Siga Tabu, a sa lako yani o Maria na yalewa ni Makitala kei na Maria kadua me rau la'ki raica na i bulubulu. 2A vakasauri ni sa yaco e dua na uneune levu; a sa lako sobu mai lomalagi e dua na agilosi ni Turaga, a sa vaqiqica tani na vatu, ka mai dabe toka e delana. 3Na nona rairai mai sa vaka na tibi ni liva, ka sa vulavula me vaka na uca vulavula na nona i sulu. 4Ena vuku ni rere levu e tarai ira na yadra, era sa sautaninini ka cibati iratou me vaka ga eratou sa mate.

5Sa qai vosa na agilosi ka kaya vei rau na yalewa, “Drau kakua ni rere. Au kila ni o drau vakasaqarai Jisu tiko, o koya ka vakoti ki na kauveilatai. 6Sa sega eke o koya; o koya sa vakaturicake tale mai na mate, me vaka ga na nona vosa. Drau lako mai ka raica na yasana ka a davo koto kina. 7Drau lako vakatotolo sara yani, ka tukuna vei iratou na nona tisaipeli ni sa tucake tale mai na mate o koya, ka raica, sa liu vei kemudou o koya ki Kalili; dou na raici koya mai kea. Drau nanuma na veika ka'u sa tukuna oqo vei kemudrau.”

8E rau sa biuta sara mai na i bulubulu ka rau sa rere, ia e rau sa vakasinaiti talega ena reki, ka rau cici yani me rau la'ki tukutuku vei iratou na nona tisaipeli.

9Ia, sa qai tavaki rau mai o Jisu, ka kaya, “Me nomudrau na vakacegu.” E rau sa qai toro vua, ka tara na yavana, ka cuva ena vakarokoroko ki vua. 10A qai kaya vei rau o Jisu, “Drau kakua ni rere, drau la'ki tukuna ga vei iratou na taciqu me ratou lako ki Kalili, eratou na raici au mai kea.”

Era mai Tukutuku na Yadra

11Ni rau sa lako yani, era sa qai lako eso vei ira na yadra ki na koro ka tukuna vei ira na bete levu na veika kece ka a yaco. 12Era sa qai soqoni vata kei ira na qase ka nakita vata e dua na ka; era a solia e dua na i wase ni lavo levu vei ira na sotia, 13ka kaya, “Dou kaya vakaoqo, Era a lako mai na nona tisaipeli ena bogi ka butakoci koya ni dou moce tu. 14Ia kevaka e mani la'ki rogoca na kovana, keitou na vakaraitaka na kena dina vua, ka dou na galala mai kina.”

15Era sa mani taura na i lavo na yadra ka cakava me vaka era sa vakasalataki kina. Sa vakadewataki tikoga na i tukutuku oqo vei ira na Jiu me yacova edaidai.

Rairai Tale o Jisu Vei Iratou na Nona Tisaipeli

(Mari 16.14-18; Luke 24.36-49; Joni 20.19-23; Caka 1.6-8)

16E ratou sa qai lako ki Kalili na tisaipeli e lewe tinikadua, ki na ulunivanua ka a dusimaki iratou kina o Jisu.#Maciu 26.32; Mari 14.28 17Ni ratou sa raici koya e ratou a qai cuva sobu vua ena vakarokoroko; ia eso e ratou sa vakatitiqa ga. 18Sa qai toro voleka mai o Jisu ka tukuna vei iratou, “Sa soli mai vei au na kaukauwa kecega mai lomalagi kei vuravura. 19Ia mo dou qai lako kivei ira kece sara na tamata ena veivanua kecega, ka vakalotutaki ira me ra noqu tisaipeli; dou papitaisotaki ira ena yaca ni Tamamudou, kei na Luvena, kei na Yalo Tabu;#Caka 1.8 20ka vakavulici ira me ra talairawarawa ki na veika kecega ka'u sa vakarota vei kemudou. Ka mo dou nanuma ni'u sa tiko vata kei kemudou ena veigauna kece, me yacova na i vakataotioti kei vuravura.”

Currently Selected:

Maciu 28: FNVDC12

Highlight

Copy