Maciu 26

Na Bukiveretaki nei Jisu

(Mari 14.1-2; Luke 22.1-2; Joni 11.45-53)

1Ni sa tukuna oti na veika kecega oqo o Jisu, sa qai kaya vei iratou na nona tisaipeli, 2“Sa vo ga e rua na siga, me vaka dou sa kila, me sa yaco kina na Solevu ni Lakosivia, ka sa na soli yani na Luve ni Tamata me lauvako ki na kauveilatai.”#Lako 12.1-27

3Era sa qai soqoni vata na bete levu kei ira na nodra qase na tamata ki na vale nei Kaiava na Bete Levu, 4ka ra bukiveretaki Jisu me ra vesuka ka vakamatea. 5Ia, era sa kaya, “Me kakua ga ena gauna ni solevu, de ra na vakatubu ca kina na tamata.”

Lumuti mai Pecani o Jisu

(Mari 14.3-9; Joni 12.1-8)

6A sa tiko mai Pecani o Jisu ena vale i Saimoni, na tamata tauvi vukavuka. 7Ni sa kana tiko o Jisu, sa qai lako mai vua e dua na yalewa ka kauta voli mai e dua na tavaya totoka sa sinai ena waiwai sau levu, ka livia e uluna.#Luke 7.37,38 8Ni ratou sa raica oqo na nona tisaipeli, e ratou sa cudru sara kina. Eratou sa taroga, “A cava e vakamaumautaki kina vakaoqo? 9Sa rawa me volitaki na waiwai oqo ena dua na i lavo levu sara, ka me qai soli vei ira na dravudravua!”

10A sa kila o Jisu na veika eratou tukuna tiko, ka sa kaya kina vei iratou, “Na cava dou sa vakasosataki koya kina na yalewa oqo? Sa cakava vei au o koya e dua na cakacaka vinaka. 11Era na dau tiko vata ga kei kemudou ena veigauna kece o ira na dravudravua, ia dou na sega ni tiko vakadua kei au.#Vrua 15.11 12Ni sa livia na yalewa oqo na waiwai ki yagoqu, sa vakarautaki au kina ki na noqu bulu. 13Au sa kaya vakaidina vei kemudou, ena veivanua kecega ena vunautaki kina na i Tukutuku Vinaka oqo ena vuravura taucoko, ena tukuni kina na veika sa vakayacora na yalewa oqo, me kena i divi.”

Vakadonuya o Jutasa me Bukiveretaki Jisu

(Mari 14.10-11; Luke 22.3-6)

14E dua vei ira na lewe tinikarua, e vakatokai o Jutasa Isikarioti, sa lako vei ira na bete levu, 15ka kaya, “Na cava dou na solia vei au, kevaka au na soli Jisu yani vei kemudou?” Era sa mani wilika ka solia vua e tolusagavulu na tiki ni siliva.#Saka 11.12 16Sa tekivu sara mai na gauna o ya o Jutasa me sa vakasaqara e dua na gauna e rawarawa me soli koya kina.

Kania o Jisu na Kakana ni Lakosivia kei Iratou na Nona Tisaipeli

(Mari 14.12-21; Luke 22.7-14,21-23; Joni 13.21-30)

17Ena i matai ni siga ni Solevu ni Madrai Sega ni Vakatubu, e ratou sa lako mai vei Jisu o iratou na nona tisaipeli, ka kaya vua, “E vei o ni vinakata me keitou la'ki vakarautaka mo ni kania kina na kakana ni Lakosivia?”

18Sa qai kaya o Jisu, “Dou lako ki na koro levu, ki vua e dua na tamata, ka kaya vua, ‘Sa kaya vakaoqo na i Vakavuvuli, Sa yaco mai na noqu gauna; au na qarava vata kei iratou na noqu tisaipeli na Lakosivia ena nomu vale.’ ”

19E ratou sa cakava na tisaipeli na veika sa vakarota vei iratou o Jisu, ka ratou vakarautaka kina na kakana ni Lakosivia.

20Ni sa yakavi mai, sa tiko sara kei iratou na lewe tinikarua me ra kana. 21Ni ra sa kana tiko, sa qai kaya, “Au sa kaya vakaidina vei kemudou, e dua vei kemudou ena soli au yani.”

22Ia, e ratou sa rarawa sara kina na tisaipeli, ka dui kaya yadudua yani vua, “Turaga, oi au li?”

23Sa qai sauma o Jisu ka kaya, “O koya ga sa tonia na kena madrai ki na loma ni bilo vata kei au ena soli au yani.#Same 41.9 24Sa lako tikoga na Luve ni Tamata me vaka sa volai tu ena vukuna; ia, sa kalouca na tamata sa soli koya yani na Luve ni Tamata! E vinaka cake vua na tamata o ya me a kua ga ni se sucu mai!”

25Sa qai vosa o Jutasa, o koya ka bukiveretaki koya ka kaya, “Sa sega dina ga ni o au oqori, Vakavuvuli?”

Sa qai sauma o Jisu, “Oqori na ka o sa kaya.”

Na i Vakayakavi ni Turaga

(Mari 14.22-26; Luke 22.14-20; 1Kori 11.23-25)

26Ni ratou sa kana tiko, sa qai taura na madrai o Jisu, ka vakalougatataka, ka dovia, ka solia vei iratou na tisaipeli, ka kaya, “Dou taura, ka kania; oqo na yagoqu.”

27A sa qai taura na bilo, ia ni sa vakavinavinaka oti sa qai solia vei iratou, ka kaya, “Dou gunu kece kina; 28ni sai koya oqo na noqu dra ni veiyalayalati vou, sa liviraki ena vukudra e lewe vuqa, me bokoci kina na i valavala ca.#Lako 24.8; Jere 31.31-34 29Au sa kaya vei kemudou, au na sega tale vakadua ni gunuva na waini oqo me yacova sara na siga au na gunuva kina vata kei kemudou na waini vou ena matanitu nei Tamaqu.”

30Ni ratou sa lagata oti e dua na sere, e ratou sa qai lako yani ki na Ulunivanua ni Veiolive.

Sa Tukuna Rawa o Jisu ni na Cakitaki Koya o Pita

(Mari 14.27-31; Luke 22.31-34; Joni 13.36-38)

31Sa qai kaya vei iratou o Jisu, “Dou na tarabe kecega ena vukuqu ena bogi edaidai, ni sa volai tu, ‘Au na vakamatea na i vakatawanisipi ka ra na dui veiseyaki na qele ni sipi.’#Saka 13.7 32Ia ni'u sa na vakaturi cake tale, au sa na liu vei kemudou ki Kalili.”#Maciu 28.16

33Sa qai vosa o Pita ka kaya vua, “Kevaka era tarabe kece ena vukumuni, au na sega ga ni tarabe oi au.”

34Sa qai kaya vua o Jisu, “Au sa kaya vakaidina vei iko, ena bogi ga edaidai, ni bera ni tagi na toa, o sa na cakitaki au vakatolu.”

35Sa qai kaya vua o Pita, “Kevaka sara ga e daru sa na mate vata, au na sega ni cakitaki kemuni.”

E ratou sa tukuna na vosa vata ga o ya o iratou na vo ni tisaipeli.

Sa Masu mai Kecisemani o Jisu

(Mari 14.32-42; Luke 22.39-46)

36Sa qai lako mai o Jisu vata kei iratou ki na vanua e vakatokai o Kecisemani, ka sa mani kaya vei iratou na nona tisaipeli, “Dou tiko ga eke, me'u la'ki masu mada ki kea.” 37Sa qai kauti Pita kei rau na luve i Sepeti, ka sa yacovi koya mai na rarawa kei na yaluma. 38Sa qai kaya vei iratou, “Sa rui rarawa vakalevu na yaloqu, me vaka au sa na mate; dou toka eke, ka me datou yadra vata tiko.”

39A sa lako yani vakalailai ki liu, a sa cuva sobu vakatoboicu me masu, ka sa kaya, “I Tamaqu, kevaka e rawa, ia mo ni kauta tani vei au na bilo ni rarawa oqo! Ia me kakua ga ni vaka na lomaqu; ia, me vaka ga na lomamuni.”

40Sa qai lesu tale vei iratou na tisaipeli ka raici iratou ni ratou sa moce tu, sa qai kaya vei Pita, “Oi, sa sega ni rawa me datou yadra vata tiko ena dua ga na aua? 41Dou yadra tiko ka masu, mo dou kakua kina ni tacori ena veitemaki. E dina ga sa gu na yalo, ia na yago sa malumalumu.”

42Sa lako tale yani ka masu, ka kaya, “I Tamaqu, kevaka sa sega ni kau tani rawa na bilo oqo, ka me'u gunuva ga, me sa yaco ga na lomamuni.” 43Sa qai lako tale mai, ka raica ni ratou sa moce tu ni sa bibi ga na matadratou.

44A biuti ratou tale o Jisu, a sa lako yani, ka la'ki masu ena i katolu ni gauna, ka sa cavuta na veivosa vata ga sa cavuta e liu. 45Sa qai lako mai vei iratou na tisaipeli, ka kaya vei iratou, “Dou sa moce ga ka vakacegu tiko? Raica, sa voleka sara na kena gauna, me soli yani na Luve ni Tamata ki na ligadra na tamata i valavala ca. 46Dou tucake, me datou sa lako. Raica, sa tu oqo na tamata me na soli au yani!”

Sa Vesuki o Jisu

(Mari 14.43-50; Luke 22.47-53; Joni 18.3-12)

47Ni se vosa tikoga o Jisu, a sa yaco yani o Jutasa, e dua vei iratou na lewe tinikarua. A lako vata yani kei koya e dua na i lala levu era vakaiyaragi ena i seleiwau kei na i wau, ka ra sa talai mai vei ira na bete levu kei ira na nodra qase na tamata. 48E a solia oti tu o koya sa soli koya yani na i vakatakilakila oqo vei ira, “O koya ga ka'u na reguca sai koya na tamata dou sa vinakata. Dou vesuki koya!”

49A sa lako vakadodonu vei Jisu o Jutasa, ka kaya, “Vakavuvuli, me nomuni na vakacegu,” ka sa reguci koya.

50Sa qai kaya vua o Jisu, “Noqu i tokani, o sa lako mai ena vuku ni cava?”

Era sa qai lako mai ka vesuki koya. 51Ia, sa qai ucuna na nona i seleiwau e dua vei iratou ka tiko voli kei Jisu, a sa taya laivi na daliga i koya na nona tamata na Bete Levu. 52Sa qai kaya vua o Jisu, “Ciqimaka lesu tale na nomu i seleiwau ki na kena taga, ni o ira kecega era tauri i seleiwau era na mate ena i seleiwau. 53O nanuma beka ni sega ni rawa me'u kerei Tamaqu, ka na solia sara mai vei au o koya e sivia e tinikarua na mataivalu agilosi? 54Ena qai vakayacori vakacava na i Vola Tabu, ka tukuna na kena yaco ga me vakaoqo?”

55Sa qai kaya o Jisu vei ira na lewe vuqa ena tiki ni gauna o ya, “Dou lakova tiko li mai oqo e dua na daubutako, ni dou vakaiseleiwau ka vakaiwau tu mai ka mai vesuki au? Au a dau tikoga ena veisiga sa oti mai na Valenisoro, ka'u veivakatavulici tiko ka dou a sega ni vesuki au.#Luke 19.47; 21.37 56Ia, sa yaco na veika kecega oqo me vakayacori kina na nodra i vola na parofita.”

E ratou sa qai biuti koya kecega na tisaipeli, ka dro.

O Jisu ena Mata ni Matabose e Cake

(Mari 14.53-65; Luke 22.54-55,63-71; Joni 18.13-14,19-24)

57Ia o ira sa vesuki Jisu era sa qai kauti koya yani vei Kaiava na Bete Levu ena vanua era sa soqoni vata kina na daunilawa kei ira na qase. 58A sa muri koya vakayawa tikoga yani o Pita me yaco sara ki na lomanibai ni Bete Levu, ka curu ka dabe vata kei ira na yadra me raica sara na kena i tinitini. 59Era sa qai vakasaqara o ira na bete levu kei ira kece na lewe ni matabose e cake e dua na ka me ra beitaki Jisu kina, me mate kina o koya; 60ia era sa sega ga ni kunea e dua na ka, e dina ga ni ra sa lewe vuqa era a lako yani me ra beitaki koya vakailasu. Oti o ya e rau sa qai lako mai e lewe rua, 61ka rau kaya, “O koya oqo sa kaya, ‘Au rawa ni vakarusa na Valenisoro ni Kalou, ka tara vou tale ena tolu ga na siga.’ ”#Joni 2.19

62Sa qai tucake na Bete Levu ka kaya, “Sa sega beka na ka mo kaya mai? Na cava mada e rau sa mai beitaki iko kina oi rau oqo?” 63Sa galu tu ga o Jisu. Sa qai kaya vua na Bete Levu, “Ena yaca ni Kalou bula au sa vakarota vei iko mo tukuna mai vei keimami se o iko na Mesaia na Luve ni Kalou bula, se segai.”

64Sa qai kaya vua o Jisu, “Oqori na ka o sa kaya mai. Ia au sa kaya vei kemudou kecega oqo: me tekivu mai na gauna oqo ka lako yani, dou na raica na Luve ni Tamata ni sa dabe tiko ena liga i matau i Koya sa Kaukauwa, ka sa lako tiko mai ena dela ni veio ni lomalagi.”#Tani 7.13

65Ena ka oqo, sa qai dresulaka kina na nona i sulu na Bete Levu ka kaya, “Sa vosavakacacataka na Kalou! Sa sega ni gadrevi me so tale mai na i vakadinadina! O ni se qai rogoca ga oqo na nona vosavakacacataka na Kalou!#Vsoro 24.16 66A cava na nomuni nanuma?”

Era sa sauma mai ka kaya, “Sa cala o koya ka sa dodonu me mate.”

67Era sa qai kasivita na matana ka vaculaki koya, ka so era sabici koya,#Aisea 50.6 68ka kaya, “Parofisai mada vei keimami, Mesaia! O cei e sabici iko?”

Sa Cakitaki Jisu o Pita

(Mari 14.66-72; Luke 22.56-62; Joni 18.15-18,25-27)

69E dabe tiko yani ena rara ni lomanibai o Pita. Sa qai lako mai vua e dua na vada ka kaya, “O iko talega o dau tiko vata kei Jisu na kai Kalili.”

70Ia sa qai cakitaka o koya e matadra kecega, ka kaya, “Au sega ni kila se na cava o tukuna tiko.” 71Ni sa lako yani vaka ki na matamata, sa qai raici koya mai e dua tale na vada, ka kaya sara vei ira era tiko kina, “O koya oqo e rau dau tiko vata kei Jisu na kai Nasareci.”

72A sa cakitaka tale o Pita na ka oqo, ka bubului sara kina, ka vaka, “Au sa sega ni kilai koya na tamata oqori!”

73E sega ni dede, era sa lako mai o ira era tu voleka ka kaya vei Pita, “Sa i iko dina ga e dua vei ira, ni sa tukuni iko ga na nomu i vosavosa!”

74Sa qai kaya o Pita, “Au sa bubului oqo ni'u sa tukuna na ka dina! Me qai totogitaki au na Kalou kevaka au vosa lasu. Au sa sega ni kila na tamata oqori!”

Ena gauna vata oqori, sa qai tagi na toa, 75ka sa qai nanuma mai o Pita na vosa i Jisu ki vua, “Ni se bera ni tagi na toa, o na tukuna vakatolu ni o sa sega ni kilai au.” Sa qai curu yani ki tautuba ka tagi vakalevu sara.

Currently Selected:

Maciu 26: FNVDC12

Highlight

Copy