Maciu 23

E Veivakasalataki o Jisu me Ra Qarauni na Daunilawa kei Ira na Farisi

(Mari 12.38-39; Luke 11.43,46; 20.45-46)

1Sa qai vosa o Jisu vei ira na lewe vuqa kei ira talega na nona tisaipeli, 2ka kaya, “Era tiko ena i tikotiko i Mosese o ira na daunilawa kei ira na Farisi. 3O koya oqo mo dou vakabauta ka cakava kina na veika kecega era tukuna vei kemudou, ia dou kakua ga ni muria na nodra i valavala, baleta ni ra sa sega ni dau cakava na veika era sa vunautaka. 4Era dau vauca na i colacola bibi ka vakataqara ena usouso ni domodra na tamata, ia era sa sega ga ni via dodoka cake mai na nodra i qaqalo me ra bau veivuke. 5Era dau cakava na nodra cakacaka kecega me ra raici ira kina o ira na tamata; era daramaka e ligadra na nodra kato ni masu ka tu kina na tiki ni Vola Tabu, ka vakabalavutaka na wa-talitali ena i tutu ni nodra i sulu.#Maciu 6.1; Vrua 6.8; Tiko 15.38 6Era dau vinakata ga na veitikina dokai ena kana magiti, kei na i tikotiko vinaka duadua ena valenilotu, 7kei na vakabula vakaveidokai ena veimakete, ka me ra vakatokai me i Vakavuvuli mai vei ira na tamata. 8Ia, me kakua ni dou vakatokai oi kemudou mo dou i Vakavuvuli: ni sa dua tikoga na nomudou i Vakavuvuli, ka dou sa veitacini kecega. 9Dou kakua talega ni vakatoka e dua me tamamudou e vuravura, ni sa tiko ga e dua na tamamudou, o koya mai lomalagi. 10Dou kakua talega ni vakatokai kemudou mo dou i liuliu, baleta ni sa duabau ga na nomudou i liuliu, o koya na Mesaia. 11Me nomudou dauveiqaravi o koya e levu duadua vei kemudou;#Maciu 20.26,27; Mari 9.35; 10.43,44; Luke 22.26 12ia o koya e vakalevulevui koya ena vakalailaitaki, kei koya e vakalailaitaki koya ena vakalevulevui.#Luke 14.11; 18.14

Vosataka Vakabibi o Jisu na Nodra Dauveivakaisini

(Mari 12.40; Luke 11.39-42,44,52; 20.47)

13“Dou na kalouca dina na daunilawa kei na Farisi! Dou tamata dauveivakaisini! Ni dou sa sogota na matanitu vakalomalagi e matadra na tamata, ka dou sa sega ni curu talega kina oi kemudou, se laivi ira era via curu me ra curu kina!

14“Dou na kalouca dina na daunilawa kei na Farisi, na dauveivakaisini! Ni dou lawakitaki ira ka kovea na nodra i yau na yada, ka dau masu balavu vakarairai: dou na totogi vakalevu cake ena vuku ni ka oqo.

15“Dou na kalouca dina na daunilawa kei na Farisi, na dauveivakaisini! Ni dou veilakoyaki e wasawasa kei na vanua mamaca mo dou vukica e dua ki na nomudou lotu, ia ni sa rawa, dou sa qai cakava me vakaruataki na nona i tutu vakagone ni eli mai vei kemudou.

16“Dou na kalouca dina, oi kemudou na dauveituberi mataboko! Dou sa dau kaya, ‘Kevaka e dua sa bubului ki na Valenisoro, e sega ni dua na ka o ya; ia, kevaka e dua sa bubului ki na koula ni Valenisoro, o ya sa qai vauci kina.’ 17Dou tamata lialia ka mataboko! A cava e bibi cake vei rau, na koula se na Valenisoro ka vakavuna me ka vakatabui kina na koula? 18Dou sa vakavulica talega, ‘Kevaka e dua sa bubului ki na i cabocabonisoro, e sega ni dua na ka o ya; ia, o koya ga ena bubului ki na i loloma ka koto kina, sa qai vauci kina.’ 19Dou sa rui mataboko! A cava e bibi cake vei rau, na i loloma se na i cabocabonisoro ka vakavuna me ka vakatabui kina na i loloma? 20O koya oqo, ni sa bubului ki na i cabocabonisoro e dua na tamata, e sa bubului kina o koya ka vakakina ki na i solisoli kecega e koto kina; 21kei koya sa bubului ki na Valenisoro, e sa bubului kina o koya ka vakakina vua na Kalou, ni sa tiko kina; 22kei koya sa bubului ki lomalagi, sa bubului ki na i tikotiko vakaturaga ni Kalou ka vakakina vua sa tikora na kena i dabedabe.#Aisea 66.1; Maciu 5.34

23“Dou na kalouca dina na daunilawa kei na Farisi! Dou tamata dauveivakaisini! Ni dou sa dau solia ga na i katini ni veimataqali co kei na kau eso, ia dou sa vakawaletaka na vakatavulici ni veika bibi ni Lawa me vaka na lewa dodonu, kei na yaloveivosoti, kei na dina. Na veika oqo e dodonu mo dou vakayacora, ka me kakua talega ni vakaweleweletaki na kena vo.#Vsoro 27.30 24Dou dauniveituberi mataboko! Dou sa biuta tani na lago mai na memudou gunu, ia dou sa tiloma ga na kameli!

25“Dou na kalouca vakaidina, oi kemudou na daunilawa kei na Farisi! Dou tamata dauveivakaisini! Dou sa dau vakasavasavataka ga na taudaku ni bilo kei na veleti, ia e loma sa sinai tu ena kocokoco kei na veivakasaurarataki. 26Na Farisi mataboko o iko! Mo vakasavasavataka mada e liu na loma ni bilo kei na veleti, ena qai savasava vakakina na taudaku!

27“Dou na kalouca dina na daunilawa kei na Farisi, na dauveivakaisini! Ni dou sa vaka na i bulubulu boro vulavula, sa rairai vinaka tu ga e taudaku, ia sa sinai tu e loma na sui ni yago mate kei na ka dukadukali kecega.#Caka 23.3 28Sa vakataki kemudou e taudaku, dou sa rairai vei ira na tamata me vaka dou tamata dina, ia e loma dou sa sinai tu ena dauveivakaisini kei na i valavala tawa dodonu.

Sa Tukuna o Jisu na Cudruvi ena Yacovi Ira

(Luke 11.47-51)

29“Dou na kalouca dina na daunilawa kei na Farisi, dou dauveivakaisini! Ni dou sa tara na kedra i bulubulu na parofita, ka vakaiukuukutaka na kedra i vakananumi na tamata yalododonu, 30ka kaya, ‘Kevaka eda a bula ena nodra gauna na noda qase, ke da a sega ni lomavata kei ira ena vakadavei ni nodra dra na parofita.’ 31Dou sa qai vakadinata ni sai kemudou ga na nodra kawa era a vakamatei ira na parofita! 32Dou ia sara yani, ka vakaotia na ka era a tekivuna na nomudou qase! 33A gata kei na luve ni gata oi kemudou! Dou na dro rawa beka vakacava mai na cudruvi mai eli?#Maciu 3.7; 12.34; Luke 3.7 34O koya oqo, dou raica, au na talai ira yani vei kemudou na parofita kei ira na tamata vuku kei ira na daunilawa; dou na vakamatea eso vei ira ka vakota ki na kauveilatai. Dou na vakanakuitataka eso ena nomudou veivalenilotu, ka vakasavi ira mai na dua na koro ki na dua tale. 35Sa yacovi kemudou kina na i sau ni nodra dra na tamata yalododonu kecega ka a vakadavei e vuravura, mai na dra i Epeli na yalododonu ka yaco ki na dra i Sakaraia na luve i Berekaia, o koya dou a labata ena tadrua ni Valenisoro kei na i cabocabo ni madrali.#Vteki 4.8; 2Vei 24.20,21 36Au sa kaya vakaidina vei kemudou, ena yaco na veika kecega oqo ki na i tabatamata oqo.

Na Nona Lomani Jerusalemi o Jisu

(Luke 13.34-35)

37“Isa, Jerusalemi, i Jerusalemi! O iko o a vakamatei ira na parofita, ka vakaviriki ira ena vatu na tamata era talai yani vei iko! Sa vakavuqa na noqu tovolea me'u vakasoqoni ira vata na luvemu, me vaka na nona vakasoqoni ira vata na luvena na tina ni toa ena ruku ni tabana, ia dou a sega ni vinakata! 38Ena ka oqo sa biu wale tu ga kina ka laladidi na nomu Valenisoro.#Jere 22.5 39Ni'u sa kaya vei iko, o na sega ni raici au tale, me yacova ni o sa kaya, ‘Sa kalougata o koya sa lako mai ena yaca ni Turaga.’ ”#Same 118.26

Currently Selected:

Maciu 23: FNVDC12

Highlight

Copy