Maciu 21

Na Curu Vakatui ki Jerusalemi

(Mari 11.1-11; Luke 19.28-40; Joni 12.12-19)

1Ni ratou sa toro voleka ki Jerusalemi, ki Pecifaki ena Ulunivanua ni Veiolive, sa qai tala o Jisu e lewe rua na tisaipeli, 2ka kaya vei rau, “Drau lako ki na koro lailai sa donui kemudrau, ka drau na raica sara e dua na asa ni vesu tu, ka tu vata kaya na luvena; drau sereki rau ka kauti rau mai vei au. 3Kevaka e mani vosa kina vei kemudrau e dua, drau kaya, ‘E vinakati rau mai na Turaga,’ ena laivi rau sara mai kina o koya.”

4A yaco oqo me vakayacori kina na vosa sa tukuna na parofita, ni sa kaya,

5“Tukuna ki na koro o Saioni,

Raica, sa lako mai vei iko na nomu tui.

Sa yalomalua ka sa vodoka e dua na asa,

Kei na asa lailai, na luve ni asa.”#Saka 9.9

6E rau sa mani lako na tisaipeli ka cakava me vaka sa vakarota vei rau o Jisu; 7e rau sa kauta mai na asa kei na luvena, ka tevuka e deladrau na nodrau i sulu, ka sa vodo kina o Jisu. 8Era sa lewe vuqa era sa tevuka na nodra i sulu e gaunisala, ka so tale era musu tabanikau ka biuta ena gaunisala. 9Ia o ira na lewe vuqa era liu tiko kei ira era muri, era sa qai kacivaka, “Osana vua na Luve i Tevita! Me vakacaucautaki o koya sa lako mai ena yaca ni Turaga! Osana ena veiyasana cecere sara!”#Same 118.25,26

10Ia ni sa curu yani ki Jerusalemi, sa yavala kecega na lewenikoro, ka kaya, “O cei li oqo?”

11Era sa qai kaya na lewe vuqa, “Oqo o Jisu na parofita mai Nasareci e Kalili.”

Sa Curu ki Valenisoro o Jisu

(Mari 11.15-19; Luke 19.45-48; Joni 2.13-22)

12Sa qai curu o Jisu ki na Valenisoro, ka vakasavi ira kecega era veivoli tiko kina, ka vakavukica na nodra teveli na dauveisau i lavo, kei na nodra i dabedabe na volitaki ruve, 13ka kaya vei ira, “Sa volai tu, ‘Ena vakatokai na noqu vale me vale ni masu,’ ia dou sa cakava me nodra qara na daubutako.”#Aisea 56.7; Jere 7.11

14Era sa qai lako mai vua ki Valenisoro o ira na mataboko kei na lokiloki, ka sa vakabulai ira o koya. 15Ia ni ra sa raica o ira na bete levu kei ira na daunilawa na veika veivakurabuitaki e cakava tiko o koya, kei ira na gonelalai era kacikaci tiko mai Valenisoro, ka kaya, “Osana vua na Luve i Tevita,” era sa cudru sara, 16ka kaya vua, “O sa rogoca na ka era kaya tiko o ira oqo, se sega?” Sa qai kaya vei ira o Jisu, “Io, dou sa sega beka ni wilika,

‘Ena gusudra na gonelalai kei na gone dramidrami

O ni sa cakava kina na vakarokoroko me uasivi sara’?”#Same 8.2 (LXX)

17Sa qai biuti ira o koya, ka lako tani mai na koro vaka ki Pecani, ka moce kina.

Sa Lewa me Ca na Vunilolo o Jisu

(Mari 11.12-14,20-24)

18Ena mataka lailai, ni sa lesu tale tiko ki na koro o koya, sa qai viakana. 19Ni sa raica e dua na vunilolo, sa qai lako kina, ia sa sega ga ni kunea kina e dua na ka, na drauna walega. Sa qai kaya ki na vunilolo, “O na sega tale ni vua ka tawamudu!” A mai malai sara yani vakasauri na vunilolo.

20Ni ratou sa raica na tisaipeli, eratou sa kurabui sara, ka taroga, “E rawa vakacava ni malai vakasauri na vunilolo?”

21Sa sauma o Jisu ka kaya vei ira, “Au sa kaya vakaidina vei kemudou, kevaka e tu vei kemudou na vakabauta ka sega ni vakatitiqa, dou na sega ni cakava walega na ka sa yaco ena vunilolo, ia kevaka dou kaya sara talega ki na ulunivanua oqo, ‘Tacavu mai ka la'ki biuti iko ki na wasawasa,’ ena vakayacori ga.#Maciu 17.20; 1Kori 13.2 22Ka kevaka e tu vei kemudou na vakabauta, dou na rawata na ka kecega dou na kerea ena masu.”

Na Taro me Baleta na Lewa e Tu Vei Jisu

(Mari 11.27-33; Luke 20.1-8)

23Ni sa curu o koya ki Valenisoro, era sa qai lako mai vua ni sa veivakatavulici tiko, o ira na bete levu kei ira na nodra qase na tamata, ka kaya, “Ena lewa i cei o vakayacora voli kina na veika oqo, se o cei mada e solia vei iko na kaukauwa oqo?”

24Sa qai sauma o Jisu, ka kaya vei ira, “Au na tarogi kemudou talega ena dua na taro; kevaka dou sauma vei au, ka'u na qai tukuna talega vei kemudou se ena lewa i cei au vakayacora voli kina na veika oqo. 25E vu mai vei na papitaiso nei Joni? Mai lomalagi, se mai na tamata ga?” Era sa qai veivosakitaka vakai ira ka kaya, “Kevaka eda kaya, ‘E vu mai lomalagi,’ ena qai kaya o koya vei keda, ‘Na cava ga dou sa sega ni vakabauti koya kina?’

26Ia kevaka eda kaya, ‘E vu mai na tamata,’ ia eda sa rerevaki ira na lewe vuqa ka ni ra nanuma kecega ni sa parofita o Joni.” 27Era sa mani sauma kina vei Jisu, “Keimami sega ni kila.”

A qai kaya vei ira o Jisu, “Au na sega talega ni tukuna vei kemudou se ena lewa i cei ka'u sa vakayacora voli kina na veika oqo.

Na Vosa Vakatautauvata me Baleti Rau na Veitacini

28“Na cava dou nanuma ena ka oqo? Sa lewe rua na luvena tagane e dua na tamata. Sa qai lako vua na i matai o tamana ka kaya, ‘Na luvequ, mo la'ki cakacaka edaidai ki na noqu loganivaini.’ 29Sa qai sauma o koya ka kaya, ‘Au bese,’ ia sa qai veisau e muri na lomana ka mani lako. 30Sa qai lako vua na kena i karua ka vosa vakakina. Sa qai sauma o koya, ‘Au na lako saka,’ ia ka qai sega ni lako. 31O cei vei rau na lewe rua e muria na loma i tamana?”

Era sa qai kaya, “O koya e qase vei rau.”

A sa kaya kina vei ira o Jisu, “Au sa kaya vakaidina vei kemudou, era sa curu tiko e liu vei kemudou ki na matanitu ni Kalou o ira na dau kumuni i vakacavacava kei ira na dautagane. 32Ni a sa lako mai vei kemudou o Joni na Dauveipapitaisotaki ka vakaraitaka vei kemudou na sala dodonu, ka dou a sega ni vakabauti koya; ia era sa qai vakabauti koya na daukumuni i vakacavacava kei ira na dautagane. Ni dou sa raica oqo, dou a sega tale ni qai via veisautaka na nomudou nanuma, ka vakabauti koya.#Luke 3.12; 7.29,30

Na Vosa Vakatautauvata ka Baleti Ira na Dauteitei ena Loganivaini

(Mari 12.1-12; Luke 20.9-19)

33“Dou rogoca e dua tale na vosa vakatautauvata. E a tiko kina e dua na i taukei ni vale ka tea e dua na loganivaini, ka viribaita vakavolivolita, ka taya ena vatu na i keli ni wai, ka tara na vale ni vakatawa, ka lisitaka vei ira eso na dauteitei, ka qai lako yani ki na vanua tani.#Aisea 5.1,2 34Ia ni sa voleka mai na vula i matua, sa qai talai ira yani na nona tamata kivei ira na tauri qele me taura mai vei ira na nona i votavota ni qerepi. 35Ia era sa qai tauri ira na nona tamata o ira na tauri qele ka mokuta e dua, ka vakamatea e dua, ka vakavirika e dua tale. 36Sa qai talai ira tale eso na nona tamata, era lewe levu cake mai vei ira era a liu, ia era sa qai cakava talega vakakina vei ira. 37Na kena i otioti sa qai tala na luvena tagane ka kaya, ‘Era na doka na luvequ.’ 38Ia ni ra sa raica na luvena o ira na tauri qele, era sa qai kaya vakai ira, ‘Sa i koya oqo ena qai kena i taukei e muri. Mai, me da vakamatea, me da suguta na veika ena taukena!’ 39Era sa qai vesuki koya vakaukauwa, ka viritaki koya ki na taudaku ni loganivaini, ka vakamatea.

40“Ia ni sa na lako mai na i taukei ni loganivaini, na cava ena cakava o koya vei ira na tauri qele?” a taroga o Jisu.

41Era sa qai kaya vua, “Ena vakamatei ira vakaloloma sara na tamata vakasevaki oqori, ka na lisitaka na loganivaini kivei ira tale eso na dautauri qele era na dau solia lesu vua na nona i votavota ni tatamusuki ena kena gauna.”

42Sa qai kaya vei ira o Jisu, “Dou sa sega beka ni wilika na i Vola Tabu?

‘Na vatu era sa cata na dautara vale

Sa yaco oqo me tikina bibi duadua ena ka kecega.

Sa vakayacora na ka oqo na Turaga;

Sa dua dina na ka veivakurabuitaki e matada!’#Same 118.22,23

43“O koya oqo au sa kaya kina vei kemudou, ena kau tani mai vei kemudou na matanitu ni Kalou, ka me soli ki na dua na matanitu e vuataka mai na vuana. 44O koya ena tau ki na vatu oqo ena dasila vakamatailalai; ia kevaka sa lutuka na vatu oqo e dua na tamata, ena vurumemea me dravusa.”

45Ia ni ra sa rogoca o ira na bete levu kei ira na Farisi na nona vosa vakatautauvata, era sa kila ni sa vosa tiko o koya me baleti ira. 46Era sa qai via vesuki Jisu, ia era sa rerevaki ira ga na lewe vuqa, ni ra sa okati Jisu me dua na parofita.

Currently Selected:

Maciu 21: FNVDC12

Highlight

Copy