Luke 19

O Jisu kei Sakiusa

1A sa lako sara ki Jeriko o Jisu ka sa curuma yani na loma ni koro. 2E a tiko kina e dua na tamata o Sakiusa na yacana; o koya e dua na nodra i liuliu na daukumuni i vakacavacava, ka sa tamata vutuniyau sara. 3A tovolea voli o koya me raica se vaka tu evei na i rairai kei Jisu, ia sa mani sega ni raici koya rawa ena vukudra na lewe vuqa, ni sa tamata lekaleka. 4Sa qai cici ki liu o koya ka kabata e dua na vunilolo me raici Jisu kina, ka ni na lako volekata yani o koya. 5Ia ni sa yacova yani na vanua o ya o Jisu, sa qai raici koya cake ka tukuna vua, “Mo siro sobu mai vakatotolo, i Sakiusa, baleta ni'u na tiko ena nomu vale edaidai.”

6A siro sara vakatotolo ki ra o Sakiusa ka la'ki kidavaki koya ena marau. 7Era sa tekivu me ra vosa kudrukudru na tamata kecega era raica oqo, ka kaya, “Na tamata oqo sa lako ki na vale ni tamata i valavala ca me la'ki nona vulagi!”

8Sa qai tu cake o Sakiusa ka kaya vua na Turaga, “Ni rogoca saka mada oqo! Au na solia na veimama ni noqu i yau vei ira na dravudravua, ia kevaka au a lawakitaka e dua, au na sauma lesu vakava vua na veika ka'u a taura.”

9Sa qai kaya vua o Jisu, “Sa yaco edaidai na bula ki na vale oqo, ni sa dua talega na luve i Epara-ama o koya oqo. 10Ni sa lako mai na Luve ni Tamata me vakasaqara ka vakabula na ka sa yali.”#Maciu 18.11

Na Vosa Vakatautauvata me Baleta na Paodi

(Maciu 25.14-30)

11Ia ni ra sa rogoca tiko na veika o ya o ira na tamata, sa qai tukuna o Jisu e dua na vosa vakatautauvata. Sa voleka sara tiko ni yaco ki Jerusalemi o koya, ka ra sa nanuma na tamata ni sa vakarau basika vakasauri ena gauna o ya na matanitu ni Kalou. 12O ya na vuna sa mani kaya kina o koya, “E a lako e dua na turaga ki na dua na vanua yawa me la'ki buli kina me tui, ka me qai lesu tale mai. 13Sa qai kacivi iratou e lewe tini na nona tamata, ka solia vei iratou yadudua e tau yadua na i lavo koula, ka kaya, ‘Dou caka bisinisi ena i lavo oqo me yacova na noqu lesu mai.’ 14Ia era a cati koya na nona lewe ni koro, ka ra a tala e dua na mata me muri koya, ka la'ki kaya, ‘Keimami sa sega ni vinakata me lewai keimami na tamata oqo.’

15“Ia ni sa buli oti me tui, a sa qai lesu tale mai. Sa qai vakarota me ratou kacivi yani vua na nona tamata ka a soli i lavo vei iratou; me kila kina se cava e ratou sa dui rawata mai na nodratou veivoli. 16Sa qai lako yani na i matai ni tamata, ka kaya, ‘Turaga, au sa rawata e tini tale na i lavo koula mai na kena o ni a solia vei au.’ 17Sa qai kaya vua o koya, ‘Vinaka vakalevu! O iko na tamata vinaka ka gugumatua! Ni o sa yalodina ena ka lailai sara, au sa lesi iko mo lewa e tini na koro.’ 18Sa qai lako yani na i karua ni tamata, ka kaya, ‘Turaga, au sa rawata e lima tale na i lavo koula mai na kena o ni a solia vei au.’ 19Sa qai kaya vua o koya, ‘O iko talega, au sa lesi iko mo lewa e lima na koro.’

20“Sa qai lako tale yani e dua, ka kaya, ‘Turaga, oqo na nomuni i lavo koula; ka'u a vunia tani toka ga ena dua na i tavoi. 21Sa dua na ka na noqu rerevaki kemuni, baleta ni o ni sa rui tamata dredre. O ni sa dau taura na ka e sega ni nomuni ka tamusuka na ka o ni a sega ni kaburaka.’ 22Sa qai kaya vua o koya, ‘Tamata ca! Au na lewai iko ena vuku ni nomu vosa! O sa kila ni'u tamata dredre, ka dau la'ki taura na ka au a sega ni biuta koto, ka tamusuka na ka au a sega ni kaburaka. 23Na cava ga o a sega ni biuta kina na noqu i lavo ki na baqe, me rawa ni'u qai taura lesu kina kei na kena tubu ni'u sa lesu mai?’

24“Sa qai kaya o koya vei ira na tu voleka e kea, ‘Dou taura mai na i lavo koula e tiko vua ka solia vei koya e tu vua e tini.’ 25Era sa qai kaya vua, ‘Turaga sa tu rawa tu vua e tini na i lavo koula!’ 26‘Au sa kaya vei kemudou, o koya yadua sa tu vua na ka, ena qai soli vakalevu tale yani vua; ia o koya e sega ni tu vua na ka, ena kau tani talega mai vua na ka e sa bau toka rawa vua.#Maciu 13.12; Mari 4.25; Luke 8.18 27Ia me baleti ira na noqu meca oqo ka ra sega ni vinakata me'u lewai ira, kauti ira mai ki ke, ka vakamatei ira e mataqu!’ ”#Maciu 25.14-30

Na Curu Vakatui ki Jerusalemi

(Maciu 21.1-11; Mari 11.1-11; Joni 12.12-19)

28Ia ni sa cavuta oti na veika oqo o Jisu, sa mai lako sara yani ena nona i lakolako ki Jerusalemi, ka ra mai muri koya yani na kena vo. 29Ni sa toro voleka ki Pecifaki kei Pecani, ena delana sa vakatokai na Ulunivanua ni Veiolive, sa tala e lewe rua vei iratou na tisaipeli, 30ka kaya, “Drau lako ki na koro o ya; ni drau sa curu kina, drau na raica e dua na luve ni asa ni vesu tu, ka sa sega ni bau vodoki mada e liu, drau sereka ka kauta mai ki ke. 31Kevaka e tarogi kemudrau e dua ka kaya, ‘Na cava drau sereka tiko kina?’ mo drau na kaya, ‘E vinakata na Turaga.’ ”

32E rau sa mani lako sara oi rau ka a talai ka kunea me vaka ga sa tukuna vei rau o koya. 33Ia ni rau sa sereka tiko na luve ni asa, e ratou a qai kaya vei rau o iratou na kena i taukei, “Na cava drau sereka kina na luve ni asa?”

34E rau sa qai kaya, “E vinakata mai na Turaga.” 35E rau sa mani kauta vei Jisu, ka rau tevuka na nodrau i sulu ena daku ni luve ni asa, ka vakavodoki Jisu kina. 36Ia ni sa toso tiko yani ki liu o koya, era sa qai tevuka na nodra i sulu ena gaunisala o ira na tamata.

37Ia ni sa toro voleka yani ki Jerusalemi, ka yacova yani sa sala sa sirova sobu na Ulunivanua ni Veiolive, era sa tekivu me ra reki na i lala tisaipeli levu o ya ka vakacaucautaka na Kalou ena domo levu, ena vuku ni cakacaka mana kecega era sa raica oti. 38Era sa kaya, “Me vakalougatataka na Kalou na tui sa lako mai ena yaca ni Turaga! Sa yaco na tiko sautu mai lomalagi kei na vakarokoroko ena yasana cecere sara!”#Same 118.26

39Era sa qai kaya vua eso na Farisi ka ra tiko ena kedra maliwa na lewe vuqa, “Na i Vakavuvuli, tarovi iratou mada na nomuni tisaipeli.”

40Sa qai sauma o koya, ka kaya, “Au sa tukuna vei kemuni, kevaka era tiko lo o ira oqo, era na qoqolou mai na veivatu!”

Sa Tagicaki Jerusalemi o Jisu

41Ia ni sa toro voleka sara yani o Jisu, ka raica na koro, sa qai tagicaka, 42ka kaya, “Isa, ke o kila wale mada ga edaidai na veika ena vuna na nomu vakacegu! Ia oqo era sa vunitaki e matamu. 43Ni na yaco mai vei iko na gauna era na viribaiti iko kina na nomu meca, ka vakavolivoliti iko, ka sogoti iko ena veiyasana kecega, 44ka talaraki iko ki ra; o iko kei ira na luvemu era tiko vei iko, ka ra na sega ni laiva me vo vei iko na veivatu era veitaqataqai tu, baleta ni o a sega ni kila na gauna sa mai sikovi iko kina na Kalou me vakabulai iko!”

Sa Lako ki na Valenisoro o Jisu

(Maciu 21.12-17; Mari 11.15-19; Joni 2.13-22)

45Sa qai curu ki na Valenisoro o Jisu ka vakatekivu vakasavi ira tani era veivoli tiko kina, 46ka kaya vei ira, “Sa volai tu, ena i Vola Tabu ni kaya na Kalou, ‘A noqu vale ena vakatokai me vale ni masu!’ Ia o ni sa cakava me nodra qara na daubutako.”#Aisea 56.7; Jere 7.11

47A sa veivakatavulici voli o Jisu ena Valenisoro ena veisiga. Era sa qai saga tiko o ira na bete levu, kei ira na daunilawa, kei ira na nodra qase na tamata me ra vakamatei koya,#Luke 21.37 48ia era a sega ga ni kunea rawa e dua na sala me ra cakava kina, baleta ni ra sa vinakata kecega na tamata me ra rogoci koya.

Currently Selected:

Luke 19: FNVDC12

Highlight

Copy