Luke 16

Na Dauniyau Lawaki

1Sa qai kaya talega o Jisu vei iratou na nona tisaipeli, “E a tiko voli e dua na tamata vutuniyau kei na nona dauveiqaravi ka cakacaka vakadauniyau e rukuna. Sa qai beitaki vua na nona dauniyau ni sa vakayalia tiko na nona i yau. 2Sa qai kacivi koya ka kaya vua, ‘A cava au sa mai rogoca oqo me baleti iko? Solia mai e dua na i tukutuku ni nomu qarava na i yau, ni sa sega ni rawa mo dauniyau tikoga.’ 3Sa qai vakananuma e lomana na dauniyau ka kaya, ‘Na cava beka me'u cakava ni sa vakarau kauta tani vei au na noqu turaga na cakacaka vakadauniyau? Au sega soti ni kaukauwa me'u rawata na cukicuki, ka'u rui madua ena kerekere wavoki. 4Io, au sa qai kila na ka me'u cakava! Ena gauna au sa vakacegui kina mai na noqu cakacaka, era na sureti au vakaidina na noqu i tokani ki na nodra veivale.’

5“Sa qai kacivi ira yadudua mai na tamata era dinau tu vua na nona turaga. A sa taroga vua na kena i matai, ‘E vica na nomu dinau vua na noqu turaga?’ 6A sa kaya o koya, ‘E dua na drau na i vakarau waiwai.’ Sa qai kaya vua na dauniyau, ‘Sa i koya oqo na nomu i vola ni dinau, ia mo dabe sobu ka vola ga me limasagavulu.’ 7Sa qai taroga e dua tale, ka kaya, ‘E vica na nomu dinau o iko?’ Sa kaya o koya, ‘E dua na drau na i vakarau sila.’ Sa qai kaya vua na dauniyau, ‘Taura na nomu i vola ni dinau ka vola kina me walusagavulu ga.’

8“Ena ka oqo, a sa vakacaucautaki koya kina na dauniyau lawaki oqo na nona turaga ena nona vakayacora na cakacaka qaseqase oqo me rawa ni tiko vinaka kina; ni ra sa qaseqase vakalevu cake na gone ni vuravura oqo ena veika e baleti ira mai vei ira na gone ni rarama.”

9A sa kaya o Jisu, “Au sa tukuna kina vakaoqo vei kemudou: dou vakayagataka na i yau sa rawati mai na veisala qaseqase eso mo dou rawata kina na nomudou i tokani. Ia ni sa oti oqo, dou na kidavaki ki na i tikotiko tawamudu.#Tb 4.9-11 10O koya sa dina ena ka lailai, ena dina talega ena ka levu; ia o koya sa sega ni dodonu ena ka lailai, ena sega ni dodonu talega ena ka levu. 11Ia kevaka dou sa sega ni dina ena i yau vakavuravura, o cei ena nuitaki kemudou ena i yau dina? 12Kevaka talega dou sa sega ni dina ena ka e nona e dua tani, o cei ena solia vei kemudou na ka e nomudou?

13“E sega ni dua na tamata e qarava rawa e rua na turaga; ni na cata e dua ka lomani koya ka dua; se ni na soli koya sara vua e dua ka beci koya ka dua. Dou na sega ni qaravi rau vata rawa na Kalou kei na i yau.”#Maciu 6.24

Na Veivosa Eso nei Jisu

(Maciu 11.12-13; 5.31-32; Mari 10.11-12)

14Ia ni ra sa rogoca na veika kecega oqo na Farisi, era sa qai vakalialiai koya, ka ni ra sa dau domona na i lavo. 15Sa qai kaya vei ira o Jisu, “Sa i kemuni o ni dau vakadonui kemuni e matadra na tamata, ia sa kila na Kalou na lomamuni; ni veika sa nanumi ni rui bibi vakalevu vei ira na tamata sa tawayaga sara ena mata ni Kalou.

16“Na Lawa i Mosese kei na nodra volavola na parofita era sa vakamuri tiko mai me yacova na lako mai nei Joni na Dauveipapitaisotaki; ia mai na gauna o ya, sa qai tekivu me vunautaki kina na i Tukutuku Vinaka ni Matanitu ni Kalou, ka ra sa vakauqeti vakaukauwa sara na tamata kecega me ra curu kina.#Maciu 11.12,13 17Ia sa rawarawa cake me takali laivi o lomalagi kei vuravura ka rui dredre na kena sega ni muri e dua na tiki ni Lawa lailai sara.#Maciu 5.18

18“Na tagane yadua sa biuta na watina ka la'ki vakawati kei na dua tale na yalewa sa dauyalewa o koya; kei na tagane sa vakawatitaka na yalewa veibiu sa dauyalewa talega o koya.#Maciu 5.32; 1Kori 7.10,11

Na Tamata Vutuniyau kei Lasarusa

19“E a tiko e dua na tamata vutuniyau, ka dau vakaisulu ena i sulu lokaloka kei na lineni malumu, ka dau kana ka marau vakalevu tu ga ena veisiga. 20E a tiko talega e kea e dua na tamata dravudravua ena nona matavuvale. A yacana o Lasarusa, ka robota tu na yagona na vidikoso. 21Sa dau garova o Lasarusa me vakani ena meme ni kakana e lutu mai na teveli ni tamata vutuniyau. Era sa dau lako talega mai na koli ka vakadramica na nona vidikoso.

22“Sa mani mate na tamata dravudravua ka ra sa kauta na agilosi ki na lomasere i Epara-ama. Sa qai mate talega na tamata vutuniyau ka bulu. 23A sa tacake mai Etesi ni sa vakararawataki tu ka raici Epara-ama sara tu vakayawa, kei Lasarusa ni koto e lomaserena. 24A sa kaci ka kaya, ‘I Tamaqu Epara-ama! Ni yalololoma mai vei au, ka talai Lasarusa mada mai me la'ki tonia na nona i qaqalo ena wai ka mai vakabatabatataka na yamequ, baleta ni sa ka levu na noqu vakararawataki ena yameyame ni buka oqo!’

25“Ia sa kaya ga o Epara-ama, ‘Na luvequ, nanuma lesu mada na gauna o se bula voli kina ni a soli me nomu na veika vinaka kecega, ka sa ciqoma ga o Lasarusa na veika ca kecega. Ia oqo, sa kune vakacegu tiko eke o koya, ia o iko sa vakararawataki. 26A kena i kuri, sa tu oqo ena kedaru maliwa e dua na i keli titobu sara, ka sa sega kina ni rawa vua e dua me takoso mai na yasana oqo kivei iko, se me takoso e dua mai na yasana oqori ki ke.’ 27Sa qai kaya na tamata vutuniyau, ‘Ia au sa masuti kemuni, tamaqu Epara-ama, mo talai koya ki na vale nei tamaqu, 28ni ratou lewe lima tiko na taciqu, me rawa ni la'ki vakasalataki iratou, de ratou na qai lako talega mai ki na vanua ni veivakararawataki oqo.’

29“Ia sa qai kaya vua o Epara-ama, ‘Sa tu vei iratou o Mosese kei ira na parofita. Me ratou qai rogoci ira ga.’ 30A sauma na tamata vutuniyau ka kaya, ‘E sega, tamaqu Epara-ama, kevaka ga e dua mai vei ira na mate e lako vei iratou, e ratou na qai veivutuni.’ 31Ia sa kaya o Epara-ama, ‘Kevaka e ratou na sega ni vakarorogo vei Mosese kei ira na parofita, ena sega talega ni rawai na lomadratou ka veitalia ga kevaka e mani tucake tale mai na mate e dua na tamata.’ ”

Currently Selected:

Luke 16: FNVDC12

Highlight

Copy