Juta 1

1 # Maciu 13.55; Mari 6.3 Mai vei Juta, na dauveiqaravi i Jisu Karisito, ka taci Jemesa —

Kivei ira era sa kacivi mai vua na Kalou, o ira era sa bula voli ena loloma ni Kalou na Tamada kei na veimaroroi i Jisu Karisito:

2Me vakalevutaki sara vei kemuni na yaloveivosoti, kei na vakacegu, kei na loloma.

O Ira na i Vakavuvuli Vakailasu

3Oi kemuni na noqu i tokani, au a tovolea taumada me'u vola yani vei kemuni na veika me baleta na veivakabulai ni Kalou sa noda kecega, ka'u sa qai vakauqeti tale me'u sa volavola ga yani kina oqo me'u vakayaloqaqataki kemuni mo ni vala tikoga ena vuku ni vakabauta sa solia na Kalou vei ira na nona tamata. 4Ni ra sa curu lo mai ka sega ni kilai eso na tamata tawa lotu, ka ra sa vakatanitaka na loloma-savu ni noda Kalou me i ubi ni nodra i valavala vakasisila, ka cakitaka na noda i Vakavuvuli ka noda Turaga e duabau ga o Jisu Karisito. Ia sa tukuna makawa sara tu na i Vola Tabu na cudru sa tau vei ira.

5 # Lako 12.51; Tiko 14.29,30 Ia e dina ga ni o ni sa kila tu na veika kece oqo, au sa gadreva ga me'u vakananumi kemuni ena veivakabulai ka vakayacora na Turaga vei ira na Isireli mai Ijipita, ia sa qai vakarusai ira ga sa sega ni vakabauta emuri. 6Ni vakasamataki ira mada na agilosi era a sega ni toka dei ga ena nodra i yalayala ni vakataulewa, ia era sa biuta ga na nodra i tikotiko dodonu: era sa vesu kecega ena sinucodo tawamudu ka tiko ena tikina butobuto e ra, ena vanua sa vesuki ira tiko kina na Kalou me yacova na siga bibi o ya me ra na cudruvi kina. 7#Vteki 19.1-24Ni vakasamataki Sotoma mada kei Komora, kei ira na veikoro lelevu era sa tiko vakavolivolita, ka ra sa ia ga na lewe ni koro na i valavala vakasisila ni veibutakoci kei na garogaro ca: era sa cudruvi ga ena bukawaqa tawamudu me i vakavuvuli vei keda kecega.

8Sa vakakina vei ira na tamata oqo ni ra sa vakadukadukalitaka na yagodra ena vuku ni rai eso era sa tadra; ni ra sa cata ga na lewa ni Kalou, ka vosavakacacataki ira na veika bula mai lomalagi. 9#Tani 10.13,21; 12.1; Vtaki 12.7; Vrua 34.6; Saka 3.2A sa sega mada ga ni vakayacora oqo o koya na agilosi liu, o Maikeli. Ena nodrau a veiletitaka tiko kei na tevoro se o cei vei rau me maroroya na yago i Mosese, a sa sega ni bau doudou o Maikeli me vosavakacacataki koya na tevoro, ia sa kaya ga, “Sa cudruvi iko na Turaga!” 10Ia o ira na tamata oqo era vosa vakacacataka na ka kecega era sega ni kila. Ia na veika era sa dau kila vakai ira ga, me vaka na nodra kilakila na manumanu kila, sai ira ga na veika oqo sa vakarusai ira tale. 11#Vteki 4.3-8; Tiko 22.1-35; Tiko 16.1-35Era na kalouca vakaidina! Era sa muria ga na sala sa lakova o Keni. Ena vuku ni i lavo, era sa soli ira yani ki na cala sa vakayacora o Pelami. Era sa talaidredre me vaka na talaidredre i Kora, ka ra sa vakarusai me vakataki Kora. 12Mai na nodra i vakarau veivakamadualaki eso, era sa vaka ga na tikitiki ni duka ena nomuni soqoni ni kana vakaveiwekani. Era sa nanumi ira ga vakataki ira. Era sa na vaka na o sa kauta yani na cagi, ia sa sega ga ni kauta mai na uca. Era sa vaka na veivunikau sa sega ni vua, ka segai mada ga ena vula ni vuavuai, io na veivunikau ka sa cavuraki taucoko na wakadra ka sa mate vakadua. 13Era sa vaka na ua cudrucudru ni wasawasa, ni sa vakaraitaki cake na nodra i valavala veivakamaduataki me vaka na vuso ni ua. Era sa vaka na veikalokalo dauveitosoyaki ka sa vakarautaka oti tu na Kalou na nodra tikina ena vanua butobuto loaloa ka tawamudu.

14 # Vteki 5.18,21-24 Ia o Inoki, o koya ka i kavitu ni tabatamata ena kawa i Atama, a sa tukuna oti talega na vosa ni parofisai me baleti ira oqo, ni sa kaya, “Raica, ena lako mai na Turaga kei na udolu vakaudolu na nona agilosi yalosavasava 15me vakatauca na lewa vei ira na tamata kecega, ka cudruvi ira sa sega ni doka na Kalou ena vuku ni nodra caka cala, ka cudruvi ira vakakina sai valavala ca ena vuku ni veivosa viavialevu ka dokadoka eso era sa tukuna me baleta na Kalou.”

16O ira oqo era sa dauvosa kudrukudru tikoga ka dauveibeitaki. Era sa dau muria ga na nodra gagadre ca; era sa dau cibitaki ira ga vakai ira ka veidabuitaki ira na tamata me ra rawata ga kina na ka era vinakata.

A i Vakasala kei na i Vakaro Eso

17Ia oqo, oi kemuni na noqu i tokani lomani, mo ni nanuma tiko na i vakaro era sa solia oti vei kemuni o iratou na i apositolo ni noda Turaga o Jisu Karisito. 18#2Pita 3.3Eratou sa kaya vakaoqo vei kemuni: “Ni sa yaco mai na i otioti ni gauna, era na rairai mai eso na tamata ka vakasewasewani kemuni, oqo o ira sa daumuria ga na nodra gagadre ca.” 19Sa i ira oqo na tamata era sa dau vakavuna na tatawasewase, ni ra sa tamata vakavuravura ka sega vei ira na Yalo Tabu. 20Ia ena vukumuni, oi kemuni na noqu i tokani lomani, mo ni tara cake tikoga vakai kemuni na nomuni vakabauta savasava ka masu tikoga ena kaukauwa ni Yalo Tabu. 21Ni maroroi kemuni ena loloma ni Kalou ka nuitaka na yaloveivosoti ni noda Turaga o Jisu Karisito ki na bula tawamudu.

22Mo ni yaloveivosoti vei ira era sa vakatitiqa; 23ni vakabulai ira tale eso ena nomuni kaliraki ira tani mai na bukawaqa; ka vakaraitaka na yaloveivosoti sa veicurumaki kei na rere vei ira eso tale; ia ni cata ga na nodra i sulu, ni sa vakadukadukalitaki ena nodra gagadre ca vakayago.

A Masu ni Veivakacaucautaki

24Ki vua sa rawata me ia na veimaroroi vei kemuni mo ni kakua ni bale, ka vakaduri kemuni e matana mo ni savasava sara ka vakasinaiti kemuni ena reki — 25ki vua na Kalou e duabau ga sa noda i Vakabula, me ia vua na vakarokoroko, na veivakalagilagi, na kaukauwa kei na lewa, ena vuku i Jisu Karisito na noda Turaga, mai na veigauna sa oti, ena gauna oqo, kei na veigauna mailiu ka tawamudu! Emeni.

Currently Selected:

Juta 1: FNVDC12

Highlight

Copy