Vakatekivu 49

Na i Otioti ni Vosa i Jekope

1Sa qai kacivi iratou mai na luvena tagane o Jekope ka kaya, “Dou soqoni mada mai ka me'u kaya vei kemudou na ka ena yaco vei kemudou ena veigauna mai muri.

2“Dou soqoni vata mai ka rogoca na luve i Jekope; mo dou mai rogoci Jekope na tamamudou.

3“Rupeni, na noqu ulumatua, sai iko na noqu kaukauwa.

Sai iko na i matai ni luvequ ni'u a qai tamata bula,

na luvequ vakairogorogo ka kaukauwa duadua vei ira na luvequ tagane.

4O sa sega ni tarovi rawa me vaka na waluvu,

ia o na sega sara ni tamata uasivi duadua,

Baleta ni o sa mocera e dua na wati tamamu;

ka vakadukadukalitaka kina na i davodavo i tamamu.

5“O Simione kei Livai erau veitacini.

E rau sa vakayagataka na nodrau i yaragi me vakayacori kina na i valavala kakauwa.

6Au na sega ni curu ki na nodrau veivosaki vuni;

Au na sega ni wili ena nodrau bose,

Baleta ni rau vakamate tamata ena dela ni nodrau cudru,

ka rau vakaleqai ira na bulumakau ena dela ni nodrau yalo ca.

7Me totogitaki na nodrau cudru baleta ni sa rui rerevaki,

Me vakakina na nodrau yalo ca baleta ni sa rui veivakalolomataki.

Au na vakatalabusesetaki rau ena vanua o Isireli,

Au na veibiuyaki rau ena kedra maliwa na lewenivanua.

8“O iko Juta, era na vakacaucautaki iko na tuakamu.

O na vesuki ira na nomu meca ena usouso ni domodra;

Era na cuva vei iko na luve i tamamu.

9Sa vaka na laione o Juta,#Tiko 24.9; Vtaki 5.5

Sa vakamatea na kena meca ka suka lesu ki na nona i vunivuni,

Sa vakadodo ka davo sobu.

Sa sega ni dua e via vakasagai koya.

10O Juta ena taura na i titoko tabu ni veiliutaki,

O ira na nona kawa era na dauveiliutaki tikoga.

Era na dauvakacerecerei koya na veimatanitu e vuqa,

Ka cuva sobu ena vakarokoroko e matana.

11Sa vesuka na nona asa ki na vunivaini,

Ki na vunivaini vinaka sara.

Sa savata na nona i sulu ena waini

Kei na nona kote ena dra ni qerepi;

12Na matana sa wadradra mai na waini,

na batina sa vulavula ena gunu sucu.#49.12 Na matana… sucu; se Na matana sa butobuto cake mai na waini, na batina sa vulavula cake mai na sucu.

13“O Sevuloni ena tiko e baravi;

Na nona matasawa ena yaco

Me nodra i kelekele ni waqa talei na waqa lelevu.

Na nona i yalayala

Ena yaco sara vaka ki Saitoni.

14“O Isakari e dua na asa kaukauwa,

Sa davo koto ena kedra maliwa na bai ni sipi.

15Ia sa raica na kena vinaka na vanua ni vakacegu,

Ka sa rui totoka na vanua.

Sa qai cuva sobu me colata na nona i colacola,

Ka sa yaco kina me bobula

sa vakaukauwataki me cakacaka kaukauwa.

16“O Tani ena liutaki ira na nona tamata.

Era na vakataki ira na veimataqali tale eso e Isireli.

17O Tani ena vaka na gata e bati ni gaunisala,

E dua na gata bati gaga ena yasa ni sala,

Sa katia na bukubuku ni yava ni ose,

Me lutu kina ki ra o koya sa vodoka tiko.

18“Au sa waraka na nomuni veivakabulai, i Jiova.

19“O Kata ena ravuti mai vua e dua na i lala daubutako,

Ia ena ravuti ira lesu o koya ka vakasavi ira.

20“Na vanua i Aseri ena vuataka na kakana vinaka ka bulabula.

Ena vakarautaka na kakana e ganita na tui.

21“O Navitalai sa vaka na dia ka sa tasere,

Ka sa vakasucuma na vosa vinaka.

22“O Iosefo sa vaka e dua na kau vuavuai vinaka,

Sa koto na kau dauvua ena bati ni wai tovure;

Ka sa salava yani na bai vatu na tabana.

23Era sa ravuti koya vakaca na dauvavana;

era vanai koya ka sagai koya.

24Ia sa tudei ga ka kaukauwa na nona dakaititi,

Ka sa vakaukauwataki na tabana,

Mai vua na Kalou Qaqa i Jekope,

Mai vua na i Vakatawa, na Uluvatu i Isireli.

25Sai koya na Kalou i tamamu sa vukei iko,

Na Kalou Qaqa sa vakalougatataki iko,

Kei na veivakalougatataki mai na lomalagi e cake,

Kei na wai titobu mai na ruku ni qele,

Na veivakalougataki mai na levu ni manumanu kei ira na gone na i solisoli,

26Na veivakalougatataki ni sila kei na senikau,

Na veivakalougatataki ni veiulunivanua kilai,

Na veika talei mai na veidelana tudei.

Na veivakalougatataki kece oqo

me tau ki na ulu i Iosefo,

Ena vacuvacu ni matana

sa digitaki mai vei ira na tuakana.

27“O Penijamini sa vaka na olifa daukata.

Ka sa dauveivakamatei

ena mataka kei na yakavi.”

28Sai ira oqo na tinikarua na mataqali i Jekope, kei na ka sa kaya na tamadra vei ira me vosa vakalougatataki ira kina ni ra sa vakarau veitalatala vakadua.

Na Mate kei na Bulu nei Jekope

29Sa qai vakaroti iratou o Jekope ka kaya, “Au sa qai vakarau toki yani vei ira na wekaqu; dou qai la'ki buluti au vata kei ira na tamaqu ena qara vatu ka tiko ena vanua i Efironi na Itaiti, 30mai Makipila ena tokalau kei Mamire ena vanua o Kenani. E a volia kina o Epara-ama na qara vatu kei na vanua o ya vei Efironi na Itaiti me i bulubulu.#Vteki 23.3-20 31O ya na vanua era sa buluti Epara-ama kina kei Sera na watina; o ya na vanua era sa buluti Aisake kina kei Repeka na watina; o ya na vanua au sa buluti Lia kina.#Vteki 25.9-10; 35.29 32Na vanua kei na qara vatu ka tiko kina, e sa voli vei ira na Itaiti.” 33Ia ni vakaroti ira oti na luvena o Jekope, sa qai lokia cake na yavana ki na i mocemoce ka mai ciba yani; ka sa toki yani vei ira na wekana ki na i bulubulu.#Caka 7.15

Currently Selected:

Vakatekivu 49: FNVDC12

Highlight

Copy