Cakacaka 5

O Ananaiasa kei Savaira

1Ia sa tiko e kea e dua na tamata, a yacana o Ananaiasa, ka watina o Savaira. E a volitaka o koya e dua na tiki ni qele, 2ia sa qai vunia e dua na i wase ni kena i sau, ka kauta na kena vo ka la'ki solia vei iratou na i apositolo. E a bau kila tale tikoga na watina na ka o ya. 3Sa qai kaya vua o Pita, “Ananaiasa, a cava o vakalaivi Setani kina me rawai iko, mo la'ki lawakitaka kina na Yalo Tabu, ka maroroya toka ga e dua na i wase ni sau ni qele? 4E sega li ni a nomu tu na qele ena gauna e se sega ni volitaki kina? Ia ni sa volitaki oti, e sega li ni a tu sara ga vei iko na lewa ni kena i lavo? A cava o qai nakita kina mo cakava e dua na ka vakaoqo? O sega ni lasutaki ira tiko na tamata, o sa lasutaka sara ga na Kalou!” 5Ia ni sa rogoca na vosa o ya o Ananaiasa, sa qai mai bale yani ka mate sara; ka sa dua tani na levu ni nodra rere o ira kecega era rogoca na ka o ya.#2. Tn 55 6Era sa qai lako yani eso na cauravou ka solega na yagona. Era sa qai colata ki tautuba ka ra la'ki buluta.

7Ni sa oti e rauta beka e tolu na aua, a sa curu yani na watina, ka sega tiko ni kila na ka e se qai yaco oti ga o ya. 8Sa qai kaya vua o Pita, “Tukuna mada mai vei au, e sai koya kece sara ga oqo na levu ni i lavo drau a volitaka kina na qele, se segai?”

A sa sauma o koya, “Io, na kena levu taucoko oqori.”

9Sa qai kaya tale vua o Pita, “A cava ‘o drau nakita vata kina mo drau vakatovolea na Yalo ni Turaga? Raica, e ratou sa tu oqori e katuba o iratou ka a la'ki buluta na watimu. E ratou na colati iko talega vakakina.” 10Sa qai mai bale vakasauri sara yani o Savaira ki na vanua e duri tu kina o Pita ka mate sara. E ratou sa qai curu yani na cauravou ka raici koya ni sa mate tu. E ratou sa qai colata ki tautuba ka la'ki buluti koya ena yasa i watina. 11A tubu vakalevu na rere ena kedra maliwa na i soqosoqo lewenilotu taucoko kei ira kecega era rogoca na ka o ya.

Na Veicakacaka Mana kei na Veika Veivakurabuitaki Eso

12A vuqa sara na cakacaka mana kei na veika veivakurabuitaki e ratou cakava na i apositolo vei ira na tamata. Era dau sosoqoni vata kece tiko na i apositolo kei ira na vakabauta ena Varada nei Solomoni. 13A sega ga ni dua vei ira e taudaku e doudou me la'ki curu vei ira na vakabauta, e dina ga ni ra dokai ira vakalevu o ira na tamata. 14Ia sa qai levu cake tikoga na tamata era vuki me ra vakabauti Jisu; e vuqa na tagane kei na yalewa. 15Ka ra sa bau la'ki kauti ira talega yani kina na tauvimate ki na veigaunisala, ka vakadavori ira ena i davodavo kei na ibe, me bau vakaruguta mada ga eso vei ira na i yaloyalo kei Pita ena gauna e lako siviti ira kina. 16Era lewe vuqa talega era lako yani ki kea mai na veikoro e vakavolivoliti Jerusalemi, ka ra kauti ira yani na tauvimate, kei ira ka vakaleqai tu mai vei ira na yalo velavela; ka ra a mani vakabulai kece sara.

E ratou sa Vakararawataki na i Apositolo

17A sa sinai sara ena vuvu na Bete Levu, kei ira kecega era dau tiko vata kaya, o ya o ira na Setoki. 18Era sa qai tauri iratou na i apositolo ka biuti iratou ki na valeniveivesu. 19Ia ena bogi o ya, sa qai dolava na katuba ni valeniveivesu e dua na agilosi ni Turaga, ka kauti iratou tani mai kina, ka kaya, 20“Dou lako, dou la'ki tu e Valenisoro ka tukuna vei ira na tamata na veika kecega baleta na bula vou oqo.” 21E ratou vakamuria na vosa o ya na i apositolo, ka ratou a lako sara ki na Valenisoro ni sa kida na mataka, ka ia kina na veivakatavulici.

Sa qai lako na Bete Levu kei ira era dau tiko vata kaya, ka ra kacivi ira vata mai na nodra qase na Jiu me caka e dua na sota ni Matabose. Era sa qai talatala ki valeniveivesu me ratou kau yani na i apositolo. 22Ia ni ratou sa yaco yani na ovisa, e ratou sa sega ni kunei iratou na i apositolo e valeniveivesu. E ratou sa mani suka tale ka la'ki tukutuku ki na Matabose, 23ka kaya, “Ni keitou yaco yani ki na valeniveivesu keitou raica ni sogo matua sara tu ga na valeniveivesu, ka ra tu e tautuba ena mata ni katuba o ira na yadra; ia ni keitou dolava yani na katuba, keitou sega sara ga ni kunea kina e dua na tamata.” 24Ia ni ra sa rogoca na veika o ya o ira na bete levu kei koya na turaganivalu ni matayadra ni valeniveivesu, era a sega ni via vakabauta ka ra vakataroga e lomadra se cava sa yaco vei ira na i apositolo. 25Sa qai lako yani e dua na tamata ka tukuna vei ira, “O iratou na tamata o ni a biuta ki na valeniveivesu e ratou sa tiko mai na Valenisoro ka vakatavulici ira tiko na tamata.” 26Sa qai lako na turaganivalu kei ira na ovisa ka ra la'ki kauti iratou ki kea. Ia era a sega ga ni cakava vakaukauwa, ni ra rerevaka de ra vakaviriki ira ena vatu o ira na tamata.

27Ia ni ratou sa yaco yani, e ratou sa qai la'ki vakaturi sara ena matadra na lewe ni Matabose. Sa qai tarogi iratou na Bete Levu, 28ka kaya, “Keimami a sega beka li ni vakaroti kemudou matua sara mo dou kakua tale ni veivakatavulici ena yaca oqo? Ia oqo, sa roboti Jerusalemi na nomudou i vakavuvuli, ka o dou sa mai via beitaka tiko vei keimami na mate ni tamata oqo!”#Maciu 27.25

29E ratou sa qai sauma o Pita kei iratou na kena vo ni apositolo, ka kaya, “Sa dodonu me keitou vakarorogo vua na Kalou, ka me keitou kakua ni vakarorogo vei ira na tamata. 30Na Kalou ni noda qase sa vakaturi Jisu cake tale mai na mate, ni oti na nomuni a vakamatei koya ena nomuni vakoti koya ki na kauveilatai. 31Sa kauti koya cake na Kalou me tiko ena ligana i matau, me i Liuliu ka i Vakabula, me solia kina na veivutuni kei na bokoci ni valavala ca vei ira na Isireli. 32Keitou sai vakadinadina ni veika oqo, ka vakakina na Yalo Tabu, o koya sa dau solia na Kalou vei ira era talairawarawa vua.”

Na i Vakasala i Kamelieli

33Ia ni ra sa rogoca na lewe ni Matabose na ka oqo, era sa cudru vakalevu sara, ka ra sa via vakamatei iratou sara ga na i apositolo. 34Sa qai tucake e dua vei ira na lewe ni Matabose, e dua na Farisi na yacana o Kamelieli, e dua na qasenivuli ni lawa era dau dokai koya na tamata kece sara. A sa qai vakarota me ratou kau mada vakalailai ki tautuba na i apositolo, 35ka qai kaya ki na Matabose o koya, “Oi kemuni na wekaqu na Isireli, mo ni qarauna na ka o ni cakava vei iratou na tamata oqo. 36Ena dua na gauna sa oti, sa tubu cake mai o Ceuta, ka dau tukuni koya voli me dua na ka; era mani muri koya kina eso na tamata ka rauta e lewe 400. Ia sa qai vakamatei o koya ka ra dui se o ira kece era a muri koya, ka sa mani mudu kina. 37Ni oti o ya, a qai tubu cake mai o Jutasa na kai Kalili, a sa yaco oqo ena gauna ni wili lewenivanua. A rawai ira talega e vuqa na tamata me ra muri koya. Ia sa mani mate talega o koya, ka ra sa mani veiseyaki o ira era a dau muri koya voli. 38Io oqo, au sa kaya vei kemuni, mo ni kakua ni vakasagai iratou na tamata oqo; ni laivi iratou mada ga. Kevaka e ka vakatamata na ka e ratou sa nakita ka cakava tiko, ena yali ga yani. 39Ia kevaka e ka mai vua na Kalou, o ni na sega ni vakarusa rawa. De lakolako ga o ni na qai kunea ni o ni veisaqasaqa tiko kei na Kalou!”#2M 7.19

Era sa mani lomavata na lewe ni Matabose me ra muria na vakasala i Kamelieli. 40Era sa qai kacivi iratou tale yani na i apositolo ka vakanakuitataki iratou, ka vakarota me ratou kakua tale ni vosa ena yaca i Jisu. Era sa qai laivi iratou me ratou lako. 41Ni ratou sa lako tani mai na Matabose o iratou na i apositolo, e ratou sa reki vakalevu, baleta ni sa okata na Kalou me ka yaga ka rokovi na nodratou vakacacani ena vuku ni yaca i Jisu. 42Ena veisiga yadua, e ratou a sega ni cegu ena kena vakatavulici kei na vunautaki ni Tukutuku Vinaka i Jisu na Mesaia ena Valenisoro kei na nodra veivale na tamata.

Currently Selected:

Cakacaka 5: FNVDC12

Highlight

Copy