Roma 3

1Sortu wini un abi dan fu di un na Dyu, èn sortu warti a abi fu besnei? 2A abi bun furu warti. Ini a fosi presi Gado ben gi den Dyu a boskopu fu En. 3Ma efu wantu sma no ben du san Gado taki, dan yu wani taigi mi tak' Gado no o du san En e taki? 4Kwet'kweti! Awinsi ala sma e lei, Gado no e lei. A de soleki fa a skrifi taki:

A o de fu si tak' Yu abi leti,

èn Yu o wini te den e krutu Yu. #Ps 51:6

5Ma efu a sondufasi fu wi e meki sma si moro krin tak' Gado abi leti, san un sa taki dan? Leki libisma un kan taki tak' Gado no e du sani nanga leti fu puru En atibron na un tapu. Ma un kan taki dati? 6Kwet'kweti! Bika efu Gado no e du sani nanga leti, dan fa A sa man krutu grontapu dan? 7Èn efu a leifasi fu mi e tyari kon na krin tak' Gado de fu fertrow, èn tak' sowan fasi A e kisi moro grani, dan fu sanede Gado e strafu mi leki wan sondusma? 8Dan betre yu taki: “We, efu wan ogri e tyari wan bun, kon un du ogri dan!” Son sma e gi wi a pori nen tak' na dati wi e leri. Ma a strafu san den o kisi, fiti den.

Ala sma na sondusma

9Fa a sani de dan? A tru tak' wi leki Dyu betre moro den tra sma? Kwet'kweti! Bika wi ben sori kba tak' ala sma sondu, Dyusma nanga sma di no de Dyu. 10A de soleki fa a skrifi taki:

No wan sma no bun ini Gado ai,

no wan enkri sma srefi. #Ps 14:1-3; Ps 53:2-4

11No wan sma abi ferstan,

èn no wan sma e suku Gado.

12Den alamala go waka

den eigi pasi,

èn no wan fu den no bun

fu noti moro.

No wan no de di e du bun,

no wan enkri wan.

13Den gorogoro

de leki wan opo grebi,

èn den tongo

e taki soso lei.

Den mofobuba e kiri yu

leki te wan takru sneki beti yu. #Ps 5:10; Ps 140:4

14Den mofo furu nanga fluku

èn nanga hati sani. #Ps 10:7

15Den futu e lon es'esi

fu go kiri, #Jes 59:7-8

16èn ala pe den e go

den e pori sani

èn den e libi sari na baka.

17Den no sabi san na freide,

18èn den no abi lespeki

gi Gado srefsrefi. #Ps 36:2

19Wi sabi tak' ala sani san a wèt e taki, de gi den sma di ben libi ondro a wèt. Dan no wan sma o man abi wan sani fu taki, èn heri grontapu sa kon ondro a krutu fu Gado. 20Dat' meki no wan sma e kon bun ini Gado ai nomo fu di a du san a wèt e taki. Bika a wèt e meki wi kon sabi tak' wi sondu. #Ps 143:2; Gal 2:16

Bribi e meki wi kon bun nanga Gado

21Ma now, Gado meki un kon si tak' A e meki sma kon bun ini En ai sondro a wèt. A Wèt nanga den Profeiti ben taki fu a sani disi. 22Wi e kon bun ini Gado ai te wi bribi ini Yesus Kristus. Disi e teri gi ala sma di e bribi. A no abi trobi suma yu de. #Gal 2:16 23Bika ala sma sondu èn den no abi a fosi glori fu Gado moro. 24Ma di Kristus Yesus ferlusu wi, A meki wi kon bun ini Gado ai. Na En bun-ati meki A du dati. Wi no ben abi fu du noti. 25Gado seni Yesus kon fu meki wi kon bun baka nanga En, te wi bribi tak' Yesus pai fu wi sondu nanga En brudu. Na so Gado sori tak' A e du sani tapu wan leti fasi. Bika A no e luku den sondu fu a ten di de na un baka, ma A ben hori langa pasensi. 26Ini a ten disi A e sori un baka tak' A e du sani nanga leti. So A e sori wi tak' A bun, èn tak' A e meki den sma kon bun ini En ai di e bribi ini Yesus. 27Dat' meki un no man meki bigi srefsrefi. Fu san ede? Fu di wi du san a wèt e taki? Nono, ma na fu di un bribi. 28Bika wi e bribi tak' wan sma no e kon bun ini Gado ai fu di a e du san a wèt e taki, ma fu di a e bribi. 29San un e prakseri? Un prakseri tak' Gado na a Gado fu den Dyu wawan, èn tak' A no de a Gado fu den tra folku tu? Meki mi taigi yu tak' Gado na a Gado fu den tra folku tu. 30Bika na wan Gado nomo de di e meki Dyu nanga sma di no de Dyu kon bun ini En ai te den bribi. #Deut 6:4; Gal 3:20 31Yu denki tak' a bribi disi e meki tak' a wèt no e teri moro? Kwet'kweti! Bika soso te yu e bribi, yu o man hori a wèt.

Currently Selected:

Roma 3: srn

Highlight

Copy