Lucas 10

Jesu kwian setenta y dos gai kagale gdaboke mo kaire kaire Chube gerua trage kwian nga ulitage ole

1Iti Jesu kwian na setenta y dos gau kagale gdaboke mo kaire kaire mo ngeru ngage unage ulita baini Jesu be joge ngwadi. 2Kwian e ulita mo litu Jesudi gire Jesu gerudu ama ole:

—Cha kle ba kage Chube gerua trage kwian ole salengwli kwian bligda ngamalla mauña kle kwian bligda jwannga kage kare. Bligda chke noare joge dabe gire bligda mauña kwian bligda jwannga kage bligda jwen. Ene kaire kwian tanre me Chube gerua uñe, ama kle Chube gerua manade ngwange, ama bligda jogeba dabe kare, cha kle ba kage Chube gerua dbe amage. Kwian ngle kle Chube gerua manade ngwange, kwian geru dbanga bedreare, ba gerudale Chube ole ba takalin mo chudaboanga nglege, ene Chube be kwian na kage ba chudaboi Chube gerua dbe.

3Jesu gerudu ene kwian setenta y dos ole gire Jesu gerudu dare ama ole:

—Cha kle ba ulita kage Chube gerua trage kwian ole, joga ta giti kwianske. Cha kle ba kage, kwian ta me no ama me no cha gerua ulia ole be age ba dollale, ama ta ba gbakalin boi daga ngwale, ba be chage kwian eneske salengwli bda oveja soli chage gude tirareske kare. 4Ba joge Chube gerua dbe ba me teru dbe mo ole llagli, ba jogedale kole. Ba me igi dbe mo alin lle gigagda, ba me gde teru dbangwa dbe, ba zapato dbe modi alin, ba me chege jagenga gdate jonkare gbi kade kwiange. 5U bai kairege ba joge chke, ba gbi kadadale no kwian ulitage kle toi u ege, ba gerudale ama ulita ole: “Cha takalin Chube age no ba ulita alin, ene ba ulita ta dbe suga no.” 6Ba gbi kade no ene kwiange gire kwian jainnga ta no giti ba kalen gwajondoida kwian ba gai ngwange no, kwian ene alin Chube be age no. Agwa ba gbi kade kwiange gire kwian me jainnga ba kalen ta no giti me ba gai ngwange no, kwian ene alin Chube mi age no, Chube be age no ba alin allabi, ngwale ba gbi kade kwian enege, ama mi ba keruchuge gerule Chube giti. 7Una ulitage baini kaire ba joge chke ngwadi, ba u gbaitre alin gai toingwa, ba chegedale toi u e amañage, ba me joge chage uge nganake nganake. Bligda ketabe bage ba gute, ba kle cha gerua dbe kwiange ñanale Chube be kwian e ta gbe bligda kete bage, e salengwli igi ketakle lle boangage lle boi ñanale. 8Ba be joge chke una baige kaire ba gabe ngwange bligda ole, ba bligda e ulita gutadale kwian kete bage kare. 9Una bai kairege ba joge chke ngwadi ba kwian oga dodadale, kaire ba gerudale kwian ulita una ege ole: “Chube be age kwian ulita alin chuia kle kodi, ba mo ta blitadale Chube ole ama gai mo Chugagwallale.” 10Una baini kaire ba joge chke ngwadige kwian me ba gai ngwange no, ba me tallade, ba jogedale siere una ege, ba gerudale kwian ulita una ege ole: 11“Dbi mnuña ba unallage kwedu cha serage, cha dbi mnuña e skiennga trate cha serage ba ulita dollale ba me cha gau ngwange no gdale, ene be suge bage ba chege jiske tanre Chube gwa giti me cha gai ngwange no gdale Chube gerua giti. Cha takalin chke uñale bage Chube be age kwian ulita alin chuia kle kodi.” Ba gerudale ene ulita kwian una emu ole gire ba mo linge siere una ege. 12Cha gerule ba ulita ole, chui be chke gire Chube be ji gbe kwian una ege alin bai me ba gau ngwange no me tadu Chube gerua keruchugakalin, kwian ene alin Chube be ji gbe ma mno Chube ji gbu kwian agenga me no ulita alin una Sodomamuge unsuialin tangle. 13Kaire Chube be ji gbe tirare kwian una Corazínmu alin kwian una Betsaidamu alin, una Corazínge una Betsaidage cha lle daga ngwale no tanre dodadu Chube kiralla giti, kwian tanre toinga una boke ege gwagedu chadi age no ene amaske agwa ama me mo ta blitu Chube ole joge siere ama kle age me no Chube dollalege. E kare ene lle daga ngwale no jo dodabale una Sidónge una Tiroge kwian una boke emu gwa giti, gire ene kwian tanre una emu sbali mo ta blitu Chube ole, ene kwian e ulita ñometra juda me no tku modi ta olire ole kaire mnugda batu mo jegwale, ene ama mo kaite ta olire ole agedu me no ngerule giti. 14Agwa lle daga ngwale no me jo dodabale Chube kiralla giti una Sidónge una Tiroge lle daga ngwale no jo dodabale una Corazínge una Betsaidage kare, malen chui bdaglige Chube be ji gbe kwian agenga me no alin ulita chuia, chui ege Chube be kwian una Corazínmu kwian una Betsaidamu gbe ji chuge ma jabale kwian una Tiromuge kwian una Sidónmuge. 15Kaire kwian una Capernaumge jiske tanre, ama kle tañachuge ama ulita ma no kwian una na ulitage ene bdagli ama be joge toi no Chube ole nga ngaña giti. E me ene dale. Bdagli Chube be ji gbe tirare kwian una Capernaummu alin, kwian e kagabe ji chuge tirare ngwadi nga dbigu giti.

16Jesu gerudu ene kwian setenta y dos ole kwian me Chube gerua gai giti, gire Jesu gerudu dare kwian setenta y dos ulita ole:

—Nege cha kle ba kage Chube gerua trage kwian na ole, kwian bai ba gai ngwange no ba keruchuge no, kwian ene me kle ba alin allabi gai ngwange no keruchuge no, kaire ama kle cha gai ngwange no cha keruchuge no agali kare ba giti. Kwian me ba gai ngwange no me ba gerua Chube giti gai ulia, e salengwli ama me kle cha agali gai ngwange no kare e salengwli ama me kle cha agali gerua gai ulia kare. Kwian me cha gerua gai ulia, e salengwli ama me kle Chube cha kaganga agali gerua gai ulia kare. Gire nege cha gerule ba ulita ole, joga Chube gerua trage kwian ulita ole una kaire kairege.

Jesu gerudu ene kwian setenta y dos ole, gire kwian ulita jo gdaboke modi kaire kaire, ama ulita chagedu Chube gerua dbe kwian nage Jesu gerudu kare.

17Chui jo tangle gire kwian e ulita Jesu nu kagabage lle boadale bidegu Jesu kagu kare, ama chiunini nga suga noare oledi, chkuni Jesu kle ngwadi gire gerudu Jesu ole:

—Cha Chugagwalla, ba kiralla giti cha dolla kagu siere kwian jwligebangage, dolla agedu cha gerudu kare.

18Jesu gerudu:

—Ba kledu dolla kage siere kwiange, ba gerudu dolla ole gire sugeti cha gwagedu dolla ulita chugagwalla kada Satanádi, Satanás kira jonga ulita, cha kirachku Satanádi ulita blike salengwli nga ko chrachienga dba blike kare. 19Cha kiralla giti ba ñage kirachke dolladi, ba ñage skite jorisi giti jebda giti lle e me ba lendege. Cha kiralla giti ba ñage kirachke dolla ulitadi diali, dolla me ñage age me no ba ole. 20Ba ñage kirachke dolla ulitadi, agwa e giti ba me nga dbe suga no, ma no ba nga dbadale suga no mo kalla giti kle degaba nga ngaña giti Chube kle ngwadi.

21Jesu kle gerule ene kwian setenta y dos ole gire Jesudi nga suga noare Chube Oña kirallaske, Jesu gerudu Chube ole: “Cha Ñenua, ba nga ngaña giti nga dba ai giti ulita Chugagwalla, nga suga noare chadi ba giti, ba noare ulita. Kwian me geru molen ama ta ba gerua gakalin ulia blike salengwli kirogwa geru gai blike kare, noare ba kwian ene ta gbu, ene amage ba gerua sugedu. Agwa kwian geru molen geru jun tanre lle ulita giti, kwian enege ba gerua me sugedu, ba gerua chegu ogabada kare amage. Chadi nga suga noare ba giti, ba kle kwian ta gbe ba takalinge kare, e no cha Ñenua.”

22Jesu gerudu ene Chube ole gire gerudu dare kwian setenta y dos ole:

—Chube cha Ñenua ama mo kiralla mo talla ulita ketu chage. Cha Chube Kirolla, ulia ni kwian gdaite cha talla uñe trate, cha Ñenua alin allabi cha talla uñe trate. Kaire agwe ni kwian gdaite cha Ñenua talla uñe trate, cha alin allabi cha Ñenua talla uñe trate. Kwian baige cha takalin chke uñale cha Ñenua mine, cha kwian ene ta gbe, ene cha giti ama ñage cha Ñenua talla uñe trate.

23-24Jesu gerudu ene kwian setenta y dos ole gire Jesu gerudu kwian geru jwannga amage gdataboko giti gdaboke ole sugekare kwian na ulitage, Jesu gerudu:

—Cha gerule ba ulita ole, Chube kle age no no ba ulita alin malen ba ulita nga dbadale suga no. Cha kle aini baske age tanre no ba gwa giti Chube kiralla giti, ba ulita mo gwagwa giti kle gwage Chube kle agedi. Kwian Chube gerua ketanga unsuialin kaire kwian chugagwalla kweri unsuialin, kwian ene ngle tadu gwagekalin Chube kle agedi ba ulita kle gwagedi nege kare, agwa e suiale kwian e ulita me ñadu gwage ba ulita nege tangle kle gwage Chube kle agedige. Kaire kwian e ulita tadu geru keruchugakalin ba kle geru keruchuge nege kare cha giti, agwa ama me ñadu geru ai kare keruchuge —Jesu gerudu ene kwian geru jwannga amage ulita ole.

Jesu geru kete kwian daba tkanga tangle Moisés chadalla gitige kwian nga Samariamu agedu no kwian lentigeba jabale alin giti

25Chui gbaite kwian daba tkanga tangle Moisés chadalla giti gdaite jo Jesu kle ngwadi ama ta mo chugakalin Jesu ole, kwian e chku Jesudi geru kadu Jesuge:

—Ba kwian tkanga tangle geruge, cha geru kade bage, ¿cha llema boadale gire cha ñage toi diali chui tangle Chube ole nga ngaña giti?

26Jesu gerudu:

—¿Moisés chadalla kle degaba gerule mine e giti? ¿Chada e suge mine bage?

27Kwian daba tkanga tangle Moisés chadalla giti jaindunga:

—Moisés chadalla gerule:

“Ba nodale ba Chugagwalla kweri Chube ole, ba mo ta dbadale no trate ulita ama ole, ba tañachugadale diali mo tale ama giti, ba mo ta gbadale kiraske lle boi ama alin ama takalin kare, ba mo chuga gbale no Chube alin ole.”

Kaire Moisés chadalla gerule:

“Mo ta dbadale no daba na ulita ole salengwli ba no mo ole naskuni kare.”

28Jesu gerudu:

—Ba jaindunga geru uliage. Ba age ene ba ñage toi diali chui tangle Chube ole nga ngaña giti.

29Kwian daba tkanga tangle Moisés chadalla giti me tadukalin Jesu ama gbe jiske malen ama geru kadu Jesuge:

—¿Kwian bai ole cha mo ta dbadale no?

30Jesu jaindunga:

—Cha geru ai kete bage: Kwian onbre gdaite chagedu una Jerusalén jonlla kare joge una Jericó ngnagu, ama kwian israelita, kle chage jonkare gire ama tendu skwe boanga gweale ngwange, skwe boanga onbre batu tanre onbre kwara ngwale alin tkudadba, skwe boanga lle junnga ulita ama ngeru, ñometra onbre kle chage dbe modi skwe boanga junnga kigedu ole onbre ngeru, skwe boanga onbre chugu ngwadi jonke lendegaba jabale. 31Boidu ene gire kwian israelita gerunga Chube ole daba alin gdaite jo jon amaña kare, ama gwagedu onbre lentigeba jabaledi me onbre lentigeba jabale talladu, ama nga bliu giti jo tangle. 32Bigwa kwian israelita gerunga Chube ole daba alin chudaboanga gdaite chagedu jon amaña kare, ama gwagedu onbre lentigeba jabaledi me onbre lentigeba jabale talladu, ama nga bliu giti jo tangle. 33Bigwa onbre gdaite nga Samariamu jo jon amaña kare, onbre e gwagedu onbre lentigeba jabaledi jonke, ama taidu dage onbre ege. 34Ama jo chke onbre lentigeba jabaledi ama onbre e dodadu, drega gligu gdege kadakle vino giti, gdege na lle kin kare gbu dregage, ama onbre lentigeba jabale drega gatuda drega luguda onbre lentigeba dodadu ulita. Gire onbre nga Samariamu onbre e gbu mo jalla giti gire du, ama u jinadu onbre lentigeba jabale manale ngwadi, u skwendu gire ama onbre lentigeba manadu u ege chuiete. 35Nagbietege onbre nga Samariamu be joge dare gire ama igi jun kwaboke modige ketu kwian u mauñage, ama gerudu u mauña ole: “Ba onbre ai manade no, ama be jiske ngle bage ba ama manade ñanale, cha be chieni gire cha be igi ama manade ñana kete ulita bage.” Onbre nga Samariamu gerudu ene gire ama jo dare.

36Jesu gerudu ene ulita kwian daba tkanga tangle Moisés chadalla giti ole gire Jesu geru kadu amage:

—¿Ba tañachuge mine, onbre gdamai bai mo ta du no daba lentigeba jabale ole?

37Kwian daba tkanga tangle Moisés chadalla giti jaindunga Jesu kalen:

—Gdaitre alin allabi taidu dage onbre lentigeba jabalege agedu no ulita onbre e alin, onbre nga Samariamu mo ta du no daba ole.

Gire Jesu gerudu:

—Ba mo ta gbadale age kaire onbre nga Samariamu agedu kare, ba agedale no daba ulita alin diali.

Jesu joge chke Marta kaire María ullage

38Jesu chagedu dare kwian geru jwannga gdataboko giti gdaboke ole una Jerusalén ngnagu, Jesu jo chke unage muinga kada Marta kle toi ngwadi, Marta Jesu gau ngwange no mo ullage. 39Jesu jo chke gwa, Marta daballa kada María kle gwa, María toidu dba Jesu sera ngena Jesu gerua keruchuge, agwa Marta me dale. 40Marta kle lle boi tanre, kle tañachuge lle tanre giti boadale, ama chku Jesudi gerudu Jesu ole:

—Cha Chugagwalla, ¿ba me nga tallade cha giti? Lle tanre boadale, cha daballa kle cha chuge ngwadi lle boi gballa, gerule cha daballa ole ama cha chudaboi, ama kle toiba dba ngwale geru alin keruchuge. Jesu chke basale Martadi Maríadi

41Jesu gerudu Marta ole:

—Marta, ba kle tañachuge lle tanre giti, ba kle ta olire lle tanre kle boadale bage giti, lle e ulita ba me ta chugakalin ngwadi sugeti gire cha gerua keruchuge. 42Lle gdaitre alin allabi noare ba alin, e Chube gerua. Cha kle gerule Chube giti, María kle cha keruchuge, geru e be chege diali ama tale, kwian na mi ñage geru e jwennga ama ngeru.

Currently Selected:

Lucas 10: sab

Highlight

Copy