Génesis 30

1Raquelnami wawata mana tarir nanan Leata chikirqan. Saymi Jacobta nirqan: <<Wawata mana qomaptikiqa ¿imapaqnataq kawashaqpis?>>

2Sayno niptinmi Jacob fiyupa rabyakur Raquelta nirqan: <<Sayno nimänaykipaqqa ¿noqa Diosku imami kä? Paychir destinashushkanki qoluq kanaykipaqpis>>.

3Saymi Raquel nirqan: <<Ashmaynï Bilhawan punuy. Paycho suriki yurirqa kikï qeshyakushqänömi kanqa. Saynöpami wawayuq kashaq>>.

4Sayno nishpanmi ashmaynin Bilhawan punusirqan. 5Saymi Jacobpa surinta Bilha wacharqan. 6Saymi Raquel nirqan: <<Wawayuq kanäpaq manakushqäta Tayta Dios wiyamashqami. Saymi favorëcimaptin wawayuqna kaykä>>.

Sayno nirmi wamrata jutisirqan Dan#30.6 Dan ninanqa favorëcin ninanmi. jutin kananpaq.

7Saypita yapaymi Jacobpa surinta Bilha wacharqan. 8Saymi Raquel nirqan: <<Wawä mana kashqanpita nanäwan pasaypami chikinakuyashkä. Kananqa kikïpapis wawä kannami>>.

Sayno nirmi wamrata jutisirqan Neftalí#30.8 Neftalí ninanqa chikinakuy ninanmi. jutin kananpaq.

9Leapis wawata mana tarirnami ashmaynin Zilpata Jacobwan punusirqan. 10Saynöpami Zilpapis Jacobpa surinta wacharqan. 11Saymi Lea nirqan: <<Suertiyuqmi kaykushkä>>.

Sayno nirmi wamrata jutisirqan Gad#30.11 Gad ninanqa suerti ninanmi. jutin kananpaq.

12Saypita yapaymi Jacobpa surinta Zilpa wacharqan. 13Saymi Lea nirqan: <<Seqaypami kushikü. Kananpitaqa lapan warmikunapis seqaypa kushish kaykashqätami niyanqa>>.

Sayno nirmi wamrata jutisirqan Aser#30.13 Aser ninanqa kushish ninanmi. jutin kananpaq.

14Trïgu cosëcha wisan chakrapa Rubén aywarmi tarimurqan mandrágora nishqan jachapa wayuynin frütakunata.#30.14 Say wisanshi yarpäyarqan qoluq warmikuna mandrágora jachapa wayuyninta mikur wawata tariyänanpaq kashqanta. Say jachapa wayuyninkunatami maman Leapaq aparqan. Sayta Raquel rikaykurmi Leata nirqan: <<Wawayki apamushqan juk ishkay mandrägoraykita manakuläshayki>>.

15Sayno niptinmi Lea nirqan: <<¡Cäraykipis kanraqku! ¿Runäta qechurkamarpis wawä apamushqan mandrägorataraqku munaykanki?>>

Saymi Raquel nirqan: <<Wawayki apamushqan mandrägorata qaramaptikiqa kanan sakay qamwan pununanpaqmi Jacobta kachapäshayki>>.

16Say tardi chakrapita Jacob kutiykämuptin taripaykurmi Lea nirqan: <<Kanan sakay noqawan pununaykipaqmi wawäpa mandrägoranta pägakushkä>>.

Sayno niptinmi say sakay Leawan Jacob punurqan. 17Lea manakushqanta Tayta Dios wiyaptinmi Jacobpa surinta yapay wacharqan. Say wamrawanqa Leapa wawankuna pisqanami kayarqan. 18Saymi Lea nirqan: <<Ashmaynïwan runäta punusishqäpitami#Gén. 30.9-13. Tayta Dios kay premiuta qomash>>.

Sayno nirmi wamranta jutisirqan Isacar#30.18 Isacar ninanqa premiu ninanmi. jutin kananpaq.

19Saypitapis yapaymi Jacobpa surinta Lea wacharqan. Saywanqa soqtanami wawan karqan. 20Saymi Lea nirqan: <<Tayta Diosmi kay wamrata qaraykamash. Soqtatana surinta wachaykaptïqa noqatanami runä mas kuyamanqa>>.

Sayno nirmi wamrata jutisirqan Zabulón#30.20 Zabulón ninanqa qaray ninanmi. jutin kananpaq. 21Saypita warmi wamratapis Lea qeshyakurqanraqmi. Say wawantami jutisirqan Dina jutin kananpaq.

22Saynölami Raqueltapis Tayta Dios kuyaparqan. Saymi manakushqanta wiyar wawayuq kananpaq destinarqan. 23Qechpa kaq wawan yuriykuptinmi Raquel nirqan: <<Qoluq kashqäpita runakuna mana jamuräyämänanpaqmi Tayta Dios permitish wawata tarinäpaq. 24Tayta Dios munaykuläsun yapaypis wawata tarinäpaq>>.

Sayno nirmi say wamrata jutisirqan José#30.24 José ninanqa yapaypis Tayta Dios tarisimäsun ninanmi. jutin kananpaq.

Jacob rïcuyashqan

25Joséta Raquel wachaykuptinnami Labánta Jacob nirqan: <<Papä, kananqa markäman kutikuläshaqna. 26Rikashqaykinöpis lapan voluntänïwanmi surikikunapaq rayku arupashkä. Kananqa kutikunäpaq warmïkunata y surïkunatapis kachapaykalämayna>>.

27Sayno niptinmi Labán nirqan: <<¡Ama kutikuysu! Kaylacho täkushun, hïju. Qam arupämaptiki Tayta Dios bendicionninta qomashqantami tantiyakushkä. 28Aykata gänayta munashqaykitapis nimay. Manamashqaykitami pägashayki>>.

29Saymi Jacob nirqan: <<Qam musyankimi uywaykikunata imano rikashqätapis. 30Chämushqäpita pasami Tayta Dios bendicionninta churamush walkalapita uywaykikuna mirayänanpaq. Qamlapaq arurqa ¿imaynataq kikïkunapaq arukushaq?>>

31Sayno niptinpis Labán yapaymi nirqan: <<Aykata gänayta munashqaykitapis wilamay, ari>>.

Saymi Jacob nirqan: <<Ama imatapis pägamaysu. Uyshaykikunata y cabraykikunata misipänäta munarqa nishqäta awnimay. 32Uysha kunchaman yaykuykur kanan akramushaq shaqsha shaqshala uyshakunata, muru uyshakunata y yana malwakunatapis. Saynöpis akramushaq muru cabrakunata y alqash cabrakunata. Saykunalami noqapa pägü kanqa. 33Saynöpami akrashqä uywakunata imaypis rikaq shamur mana suwapashqäta musyankipaq. Uywäkuna kaykäyashqanchöqa alqashla y murulami cabrakuna kayanqa. Uyshäkunapis yanalami kayanqa. Suwapash kaptïqa juk colorkuna takuraykaqtami tarinki>>.

34Sayno niptinmi Labán nirqan: <<Nishqaykino kasun>>.

35Sayno awniykarpis say junaqlami Labán rakikurirqan yana uyshakunata y yuraqyuq chïvukunatawan cabrakunata. Saymi alqash chïvukunata, muru chïvukunata, alqash cabrakunata y muru cabrakunata rakikurirqan. Nirkurmi say uywakunata surinkunapa makinman churaykamurqan. 36Say rakishqan uywakunata qatikurkur Jacob taykashqan kaqpita kimsa junaq aywaytami aywakuyarqan. Jacobnami Labánpa wakin kaq uyshankunatawan cabrankunata misikur tarqan.

37Saypitanami Jacob palarqan álamupa, avellänupa y castäñupa lulu rämankunata. Nirkurnami say rämakunapa qarankunata shiptarqan räya räya rikakänanpaq. 38Sayno shiptashqan#30.38 Wakin runakunaqa pachqashqan o shiwtashqan niyan. rämakunatanami churaparqan uywakuna yakuta upukuyänanman. Saychömi yaku upuq yaykur shiptashqan rämakunapa nawpancho sarikuyaq. 39Say shiptashqan rämakunapa nawpancho sarikuyaptinmi malwakuna yuriyaq shuyupis, shaqsha shaqshalapis y muru murupis. 40Saykunatami kikinpaq Jacob rakirqan. Nirkurmi Labánpa uyshankuna yawayänanpaq say rakishqan uyshakunapa nawpanman qatipaq. Saynölami cabrakunatapis qatipaptin yuraqyuqta wachayaq. Uyshakunanami yanata wachayarqan. Saynöpami Jacobpa uyshankuna y cabrankuna mas mirayarqan.

41Saynöpis wera kaq uywakuna sarikuyashqan hörami yaku upukunanman shiptashqan rämakunata Jacob churapaq malwakuyaptin yawananpaq. 42Uyu kaq uywakuna malwakuyaptinmi isanqa shiptashqan rämakunata churapaqsu. Saynöpami uyu kaq uywakunapa wawan yanala yuraqla yurir Labánpaq karqan. Wera kaqkunapa wawannami shuyu, shaqsha shaqshala y muru muru yurir Jacobpaq karqan. 43Saynöpami uyshankuna cabrankuna askaman mirayaptin Jacob pasaypa rïcuyarqan. Camëllunkunapis ashnunkunapis saysikami karqan. Saynölami ashmayninkuna warmipis olqupis askaq kayarqan.

Currently Selected:

Génesis 30: qvhB

Highlight

Copy