Génesis 19

Sodomatawan Gomorrata Tayta Dios ushakäsishqan

1Pasa sakaykaptinnami Sodomaman chäyarqan nawpaq ishkan angilkuna. Lotnami jamaraykarqan markaman yaykuna sawan punkucho. Rikaskirmi paykunapa nawpanman urkuntapis pasaman töpasiypa Lot qonqurpakuykurqan. 2Saymi paykunata nirqan: <<Taytakuna, posädakuyänaykipaq aku wayïman aywashun. Saychömi chakikikunata maylakuyanki. Nirkur waray tutanachir aywaykäyashqaykipa päsakuyanki>>.

Sayno niptinmi paykuna niyarqan: <<Päkilä, taytay. Noqakuna pläzalachömi waräkuyäshaq>>.

3Sayno mana munaykäyaptinpis yaparir yaparir Lot ruwaptinmi wayinman posädakuq aywayarqan. Wayinman chaykasirnami levadüraynaq tantatawan ali mikuyta yanukuskir qorpankunata Lot qararqan.

4Lotpa wayincho mayqanpis manaraq punuyaptinmi lapan Sodoma runakuna maqtakunapita qalaykur awkin runakunayaq Lotpa wayinta juntapaykuyarqan. 5Nirkur Lotta qayakur niyarqan: <<¿Maytaq wayikiman posädakamuq runakuna? ¡Paykunata jukla qarqamuy violayänäpaq!>>

6Sayno niyaptinmi wayipita Lot yarqurir punkunta shumaq wichqarkur 7say runakunata nirqan: <<Qorpäkunata ama imatapis ruraykuyaysu, taytakuna. 8Paykunata imatapis rurayänaykipa trukanqa ishkay warmi surïkunata jorqapaykamushayki munayashqaykita rurayänaykipaq. Surïkunaqa manaraqmi pï runatapis reqiyanraqsu. Wayïman posädakamuq runakunataqa ama imatapis ruraykuyaysu>>.

9Sayno niptinpis runakuna niyarqan: <<¡Qam washata ayway! ¿Jäpa runa kaykarku noqakunata mandayämayta munaykanki? ¡Kananmi isanqa paykunata rurayänäpaq kashqanpita peor qamta rurayäshayki!>>

Sayno nirmi Lotta maki maki charkasir aywayarqan wayi punkuta amiyänanpaq.

10Saymi qorpankunaqa Lotta sutaypa wayi ruriman yaykaykasir punkuta trancakarkayämurqan. 11Nirkurnami waqtacho kaykaq runakunata qaprayäsiyarqan maqtakunapita qalaykur awkin runakunayaq. Saymi wayi punkuta ashiykäyashlancho utikäyarqanpis.

12Saypitanami qorpankuna Lotta niyarqan: <<¿Mas aylluykikuna kay markacho kanku? Aylluykikuna kaptinqa warmitapis, olqutapis, mashayki kayänanpaq kaq maqtakunatapis lapanta pushakurkur kay markapita aywakuyay. 13Askaqmi Tayta Diosman quejakuyash kay markacho runakuna jusalikuq kayashqanta. Sayno jusasapa kayaptinmi noqakunata kachayämash kay markata chipyaq ushakäsiyänäpaq>>.

14Sayno niptinmi mashan kananpaq kaq maqtakunaman aywar Lot nirqan: <<¡Kay markapita lapansi aywakushun! ¡Tayta Dios kay markata ushakäsinanpaqnami kaykan!>>

Sayno niptinpis Lot brömakuykashqanta yarparmi criyiyarqansu.

15Pasa waraykaptinnami Lotta angilkuna niyarqan: <<Kay markata ushakäsiptï mana wanunaykipaq warmikita y ishkan surikikunata pushakurkur jukla aywakuy>>.

16Jukla mana yarquptinmi angilkuna Lotta, warminta y surinkunatapis makipita jancharkur markapita jorquyarqan. Tayta Dios kuyapashpanmi mana ushakäyänanpaq sayno jorqurqan.#2Ped. 2.7. 17Markapita karucho kaykäyaptinnami juknin ángel nirqan: <<Mana wanuyänaykipaq qepaman mana tikraypa cörriyla qeshpikuyay. Pampacho mana ichiypa jirkayaq aywakuyay>>.

18Sayno niyaptinmi Lot nirqan: <<¡Ichiklata shuyaykuyayraq, taytakuna! 19Qamkunaqa ali runa karmi kuyapäyämashpayki mana wanuyänäpaq jorqayämashkanki. Markata jukla ushakäsiyaptikiqa jirkaman manaraqpis char lätaykachaykaqtachir ushayämanqa. 20Taqay taksha markalaman qeshpirkuyashqäyaq shuyaykuyay, taytakuna. Say takshala markataqa ama ushakaykasiyälaysu>>.

21Saymi ángel nirqan: <<Manakamashqaykino kasun. Taqay taksha markata manami ushakäsishaqsu. 22Sayno kaykaptinqa jukla say markaman qeshpikuyay. Sayman manaraq chäyaptikiqa ushakäsinäpaq kaq markata manaraqmi ushakäsishaqraqsu>>.

Saypita pasanami say markata jutisirqan Zoar#19.22 Zoar ninanqa takshala ninanmi. jutin kananpaq.

23Inti mashtaykaptinnami Zoarman Lot charqan. 24Chaykuptinnami Sodoma y Gomorra markakunaman azufrintin ninata Tayta Dios tamyasimurqan. 25Say markakuna kayashqan pampakunacho runakunata, uywakunata y lapan imaykatapis chipyaqmi nina usharqan.#Mat. 10.15; 11.23-24; Luc. 10.12; 17.29; 2Ped. 2.6; Jud. 7. 26Lotpa warminmi#Luc. 17.32. isanqa qeshpiykashqancho qepapa tikraykur kachi rumiman tikraskirqan.

27Saypita waraynin tutami Abraham aywarqan Tayta Dioswan parlashqan kaqman. 28Saypitami rikärirqan Sodoma y Gomorra markakunapita jornupitanöraq qoshtay sharkuykaqta. 29Saynömi Tayta Dios ushakäsirqan Lot tashqan pampacho kaq markakunata. Sayno ushakäsirpis Abraham manakush kaptinmi Lotta say markakunapita qeshpisirqan.

Lotpa warmi surinkuna imanöpa wawayuq rikakuyashqanpis

30Saypitami Zoarlacho tayta Lot fiyupa mansarirqan. Saymi ishkan warmi surinkunawan jalqaman aywakur machaylacho täyarqan. 31Saychömi shulka nananta jipash nirqan: <<Papäninsi awkinnami kaykan. Kaycho manami olqu runa kansu noqansiwan majasakänanpaq. 32Sayno kaykaptinqa papäninsita shinkaykasir paywan punushun noqansicho surin yuriptin ayllunsikuna mana ushakänanpaq>>.

33Saymi wilanakuyashqan sakay shinkashqanyaq papäninta vïnuta qarayarqan. Nirkurnami qechpa kaq jipash papäninwan punurqan. Papäninqa shinkash karmi mayarqansu imay höra surin yaykapashqanta ni yarqushqantapis.

34Waraynin junaqmi qechpa kaq jipash shulka nananta nirqan: <<Shipshi sakay papäninsiwanmi punushkä. Kanan sakay qampis paywan pununaykipaq yapay shinkäsishun. Saynöpami papäninsi ayllu ushakäyanqasu>>.

35Sayno nirmi say sakaypis papäninta yapay upyasiyarqan. Nirkurmi shulka kaq surinna papäninwan punurqan. Fiyupa shinkash karmi papäninqa mayarqansu imay höra surin yaykapashqanta ni yarqushqantapis.

36Saynöpami Lotpa ishkan surinkuna taytanpata qeshyaq rikakuyarqan. 37Mayor kaq wacharqan olquta. Say wamrapa jutinmi karqan Moab. Paypita miraqkunapitami moabita runakuna kaykäyan. 38Shulka kaqpis wacharqan olqutami. Say wamrapa jutinnami karqan Ben-ammi. Ben-ammipitanami amonita runakuna kaykäyan.

Currently Selected:

Génesis 19: qvhB

Highlight

Copy