Génesis 18

Abrahamta Tayta Dios watukashqan

1Mamre runapa chakrancho encina jachakuna kaqcho taykaptinmi Abrahamta Tayta Dios yuriparqan. Say höra fuerti achaptinmi toldun punkucho Abraham lantukur jamaraykarqan. 2Saychömi Abraham elaqpita rikarqan kimsa runakuna ichiraykäyaqta. Saymi chaskikuq#Heb. 13.2. cörrila aywar nawpanman qonqurpakuykur 3nirqan: <<Taytakuna, päsakuyänaykipaqpis jamapärishunraq. Juklaqa ama aywakuyaysu. 4Yakukuq kachaskishaq chakikikunata maylakuyänaykipaq. Nirkur kay jacha chakilanchöpis jamapaskishun. 5Wamaqlanta chäkayämuynikita imalatapis yanukarasimushaq mikukurkur päsakuyankipaq>>.

Sayno niptinmi paykuna niyarqan: <<Alichir kanman, taytay>>.

6Saymi Abraham toldunman cörrila yaykur Sarata nirqan: <<Ishkay chunka (20) kïlu mas alinnin jarinapita rasla tantata ruraskamuy>>.

7Saypitanami wäkankuna kaqman Abraham jukla aywar werannin turïtuta apamurqan. Nirkurmi ashmayninta mandarqan jukla pishtar mikuyta ruramunanpaq. 8Nirkurnami mantequïllata, lichita y yanukasishqan aysata apar jacha chakincho jamaraykaq qorpankunata qararqan. Imatapis nistäyashqanta makyananpaqmi alcäbula kaykarqan.

9Mikuskirnami Abrahamta tapuyarqan: <<¿Maychötaq kaykan warmiki Sara?>> nir.

Saymi Abraham nirqan: <<Toldu rurinchömi kaykan>>.

10Sayno niptinmi juknin nirqan: <<Watan watukaq kutimuptï olqu wawayuqnami warmiki Sara kaykanqa>>.#Rom. 9.9.

Punku yaykunalacho jamararmi sayno nishqanta Sara wiyaykarqan. 11Abrahamwan Saraqa chachayashnami kayarqan. Chakwanna kaptin killa qeshyanpis unaynami takyashna karqan. 12Sayno parlashqanta wiyarmi Saraqa asikur shonqulancho nirqan: <<Kanan chakwanna kaykarqa y runäpis awkinna kaykaptinqa ¿imanöpanashi wawata tarïman?>>

13Saymi Abrahamta Tayta Dios nirqan: <<¿Imanirtaq Sara asikush? ¿Imanirtaq chakwanna kashpan wawata manana tarinanpaq kashqanta yarpaykan? 14¿Noqapaq imalaqa aja kansuraq? Watan watukaq kutimuptï olqu wawayuqnami Sara kaykanqa>>.#Jer. 32.27; Luc. 1.37; Rom. 9.9.

15Sayno nishqanta wiyaykurmi Sara fiyupa mansakashpan nirqan: <<Manami asikushkäsu>>.

Sayno niptinmi Tayta Dios nirqan: <<Noqa musyämi asikushqaykita>>.

Sodoma markapaq Tayta Diosta Abraham manakushqan

16Nirkurnami qorpankuna#18.16 Say kimsa qorpakunaqa manami runakunasu kayarqan, sinöqa ishkay angilkunawan Tayta Diosmi. Sayta musyanaykipaq liyinki Gén. 18.17; 19.1. Sodoma markapa päsakuyarqan. Abrahampis paykunata walkir karuyaqraqmi aywarqan. 17Aywaykäyashqanchömi Tayta Dios yarpaylancho nirqan: <<Imata ruranäpaq yarpaykashqätapis ¿manasuraq Abrahamta wiläman? 18Paypita miraqkunaqa jatun nacionmi kanqa. Saynöpis pay kayninpami kay pasacho lapan casta runakunapis bendicionnïta chaskiyanqa. 19Paymi surinta y paypita miraqkunatapis munashqäno imaypis kawayänanpaq yachasinqa. Saypaqmi payta akrashkä. Sayno ruraptinmi Abrahamta promitishqäkunata lapanta cumplishaq>>.

20Sayno yarpachakurirmi Abrahamta Tayta Dios nirqan: <<Sodomacho y Gomorracho taq runakunapaqmi maysay runakunapis parlayan pasaypa jusalikuq kayashqanta. 21Saymi kanan aywaykä runakuna niyashqanno rasunpaypa jusayuq kayashqanta o jusaynaq kayashqantapis musyanäpaq>>.

22 Tayta Dioswan Abraham parlashqanyaqmi ishkay kaq qorpankunaqa Sodomaman nawpakuyarqan. 23Nawpanman witiykushpanmi Tayta Diosta Abraham tapuparqan: <<Jusasapa runakunata ushakäsir ¿jusaynaq kaqkunatapis ushakäsinkisuraq? 24Say jatun markachöqa capazchir pisqa chunkalapis (50) jusaynaq runakuna kaykäyan. Pisqa chunka jusaynaq runakuna kaykaptinpis ¿mana kuyapaypasuraq say markata ushakaykasinki? 25Jusaynaq kaqtaqa jusasapa runakunatawan iwalqa ama ushakaykasilaysu ari, Taytay. Kay pasacho taq lapan runakunapa jueznin kaykarqa shumaq arreglaykuy ari>>.

26Abraham sayno ruwakuptinmi Tayta Dios nirqan: <<Sodoma markacho pisqa chunka jusaynaq runakunata tarirqa manami say markata ushakäsishaqsu>>.

27Saymi yapay Abraham nirqan: <<Yapay tapuptï ama rabyakuykulaysu, Taytay. Noqaqa polvu japuy y uchpa japuylami kä. 28Pisqa chunka jusaynaq runakuna kayänanpaq capazchir pisqalapis pishiykan. ¿Sayla pishiptinpis say markata ushakaykasinkisuraq?>>

Sayno ruwakuptinmi Tayta Dios nirqan: <<Chusku chunka pisqa (45) jusaynaq runakunata tarirqa manami ushakäsishaqsu>>.

29Yapaymi Abraham nirqan: <<Capazchir chusku chunkalapis (40) jusaynaq runakuna saycho kaykäyan>>.

Sayno niptinmi Tayta Dios nirqan: <<Chusku chunkalatapis jusaynaq runakunata tarirqa manami ushakäsishaqsu>>.

30Yapaymi Abraham ruwakurqan: <<Saynöla yaparir yaparir ruwakuptï ama rabyakuykulaysu ari, Taytay. Capazchir kimsa chunkalapis (30) jusaynaq runakuna kaykäyan>>.

Sayno niptinmi Tayta Dios nirqan: <<Kimsa chunkalatapis jusaynaq runakunata tarirqa manami say markata ushakäsishaqsu>>.

31Abraham yapaymi nirqan: <<Masta tapukuptï ama rabyaykulaysu, Taytay. Ishkay chunkalatapis (20) jusaynaq runakunata tarishpayki ¿ushakäsinkisuraq?>>

Sayno niptinmi Tayta Dios nirqan: <<Ishkay chunkalatapis jusaynaq runakunata tarirqa manami ushakäsishaqsu>>.

32Yapaypis Abraham tapurqan: <<Yaparir yaparir tapuptï ama rabyaykulaysu, Taytay. Kananlanami tapukushayki. Chunkalata jusaynaq runakunata tarir ¿imataraq ruranki?>>

Niptinmi Tayta Dios nirqan: <<Say markacho chunkalatapis jusaynaq runakunata tarirqa manami ushakäsishaqsu>>.

33Abrahamwan parlayta ushaskirmi Tayta Dios aywakurqan. Abrahamnami tashqan kaqman kutikurqan.

Currently Selected:

Génesis 18: qvhB

Highlight

Copy