Hechos 23

1Saymi juezkunata rikärir Pablo nirqan: <<Taytakuna, Tayta Dios rikaykämashqanta tantiyakur kananyaqlaqa manami imatapis lutanta rurashkäsu>>.

2Sayno niptinmi mas mandaq cüra Ananías nawpancho kaqkunata nirqan Pabluta shimicho laqyayänanpaq. 3Laqyasiptinmi Pablo nirqan: <<¡Ishkay cära runa!#Mat. 23.27. ¡Kikikitami Tayta Dios castigashunki! Ley nishqanno juzgamänaykipaq jamaraykarqa ¿imanirtaq leyta mana cäsuypa laqyasimanki?>>

4Sayno niptinmi Pablupa nawpancho kaykaq runakuna niyarqan: <<¿Imanirtaq Tayta Dios akrashqan mas mandaq cürata qayapanki?>>

5Saymi Pablo nirqan: <<Taytakuna, mandaq cüra kashqanta manami musyashkäsu. Musyarqa manami imatapis nïmansu karqan. Tayta Diospa palabranchöpis kaynömi qelqaraykan: <Markaykicho autoridäkunata ama maldicionayankisu#Éxo. 22.28.> >>.

6Pablo musyarqanmi say juezkuna wakin saduceo kayashqanta y wakin fariseo kayashqanta. Saymi sinchipa nirqan: <<¡Taytakuna! Noqa fariseumi kä.#Hech. 26.5; Fil. 3.5. Taytäpis fariseumi kash. Wanushkunata Tayta Dios kawarisimunanpaq kashqanta criyiptïmi juzgaykäyämanki>>.

7Sayno niptinmi fariseukunaqa Pablupa favornin sharkur saduceukunawan shimi shimi sarinakuyarqan. 8Saduceukuna yachasiyan wanushkuna manana kawariyämunanpaq kashqantami.#Mat. 22.23; Mar. 12.18; Luc. 20.27. Saynöpis yachasiyan angilpis ni runapa almanpis mana kashqantami. Fariseukunanami yachasiyan wanushkuna kawariyämunanpaq kashqanta, ángel kashqanta y almapis kashqanta. 9Sayno rimanakuyaptinmi ley yachasiq fariseukuna niyarqan: <<Kay runa manami imatapis mana alitaqa rurashsu. Paqtami ángel karpis o alma karpis parlapash kanqa. [Cuidätaq Tayta Diospa contran kaykäyankiman]>>.

10Apta aptarraq rimanakuyaptinmi comandanti mansarir nirqan: <<Capazchi Pabluta wanuykasiyanmanpis>>.

Saymi soldädukunata qayasimurqan Pabluta carcilman kutisiyänanpaq.

11Say sakaymi Pabluta yuriparkur Señor Jesucristo nirqan: <<Pablo, ama mansariysu. Jerusaléncho wilakuynïta wilakushqaykinömi Romachöpis wilakunki>>.

Pabluta wanusiyänanpaq wilanakuyashqan

12Autoridäkuna shuntakäyashqanpita waraynin junaqmi Pabluta wanusiyänanpaq wakin Israel runakuna jurar niyarqan: <<Pabluta manaraq wanusirqa ama imatapis mikushunsu ni upushunsu>>.

13Sayno wilanakuq runakuna kayarqan chusku chunkapita (40) masmi. 14Paykunami mandaq cürakunaman y Israel mayor runakunaman aywaykur niyarqan: <<Noqakuna jurayashkä Pabluta manaraq wanusirqa imatapis mana mikuyänäpaq ni upuyänäpaqmi. 15<Pablutami shumaq tapuyta munayä> niq tumpala comandantita niyay waray tuta Pabluta apasimunanpaq. Noqakuna kamarikushlami kaykäyäshaq apaykämuqlata wanusiyänäpaq>>.

16Sayno wilanakuyashqanta mayaykurmi Pablupa paninpa olqu wawan carcilman aywaykur Pabluta wilarqan. 17Wilaptinmi Pabluqa juk capitanta qayaykur nirqan: <<Kay maqtata comandantiman pushay. Paytami wilayta munaykan>>.

18Maqtata comandantiman pushaykurmi capitán nirqan: <<Prësu kaykaq Pablumi ruwakamash kay maqtata qamman pushamunäpaq. Paymi imata wiyashqantapis wilashunki>>.

19Saymi say maqtata janchash jukläman pushaykur comandanti tapurqan: <<¿Imataq kaykan wilamänaykipaq?>>

20Saymi maqta nirqan: <<Wakin Israel runakunami wilanakuyash Sanedrín juezkuna shuntakäyashqanman Pabluta waray tuta apasinaykipaq. Sayno manakuyäshunki Pabluta shumaq tapuyta munaq tumpalashi. 21Sayta ama criyiysu. Chusku chunkapita (40) masmi runakuna jurayash Pabluta manaraq wanusirqa imatapis mana mikuyänanpaq ni upuyänanpaqpis. Paykunami shuyaraykäyan Pabluta apaykäsilaptikina wanusiyänanpaq>>.

22Wilaykuptinnami say maqtata comandanti nirqan: <<Wilamashqaykita ama pitapis wilapankisu>>.

Sayno yäsirkurmi say maqtata despacharqan.

Cesarea markaman Pabluta apayashqan

23Sayta musyarkurmi comandanti ishkay capitankunata qayaykasir nirqan: <<Kanan kamarikuyay ishkay pachak (200) soldädukuna chakipa aywayänanpaq, qanchis chunka (70) soldädukuna cawallun loqash#23.23 Wakin runakunaqa muntash niyan. aywayänanpaq y ishkay pachak (200) soldädukuna lanzankunawan aywayänanpaq. Paykunami kanan sakay las nuëvi Cesarea markaman yarquyanqa. 24Pablo loqakunanpaqpis cawallukunata kamaripay. Gobernador Félixman Pabluta ali chäsiyäsun>>.

25Saynölami paykunawan apasinanpaq cartatapis qelqarqan. Say cartachömi nirqan:

26Gobernador Tayta Félix:

Noqa Claudio Lisiasmi qampaq salüdüta apasikamü. 27Israel runakunami kay runata sariykur wanusiyänanpaqna kaykäyash. Saymi Roma runa kashqanta musyashpä soldädükunawan aywaykur washämushkä. 28Nirkurnami imapita contran sharkuyashqantapis musyayta munar Sanedrín juezkuna shuntakäyashqanman apashkä. 29Saychönami contrankuna niyash leyninkunata mana cumplishqanta. Sayno niyaptinpis manami ima jusantapis tarishkäsu wanusish kananpaq ni carcilcho wichqaränanpaqpis. 30Israel runakuna payta wanusiyänanpaq wilanakuyashqanta musyaykurmi qamman apaykäsimü. Saynölami paykunatapis nishkä nawpaykichöraq arreglayänanpaq. Saylatami kanan qelqarkamü.

31Comandanti mandashqannölami soldädukuna say sakay Pabluta apayarqan Antípatris markayaq. 32Waraynin tutami cawallun loqash aywaqkunalana Cesareaman Pabluwan aywayarqan. Wakin soldädukunaqa cuartilninmannami kutikuyarqan. 33Cesareaman chaykurnami gobernador Félixta cartata qoykur Pablutapis entregaykuyarqan. 34Say cartata Félix liyirirnami Pabluta tapurqan maypita kashqantapis. Cilicia provinciapita kashqanta musyaykurmi 35nirqan: <<Contraykikuna chäyämuptinraqmi declaracionnikita wiyashaq>>.

Nirkurmi Pabluta wichqasirqan rey Herodes sharkasishqan despächuncho kaykaq carcilman.

Currently Selected:

Hechos 23: qvhB

Highlight

Copy