Hechos 21

Jerusalénman Pablo aywashqan

1Paykunapita despidikurirmi Cos islayaq büquiwan aywayarqä. Warayninnami Rodas islayaq aywayarqä y saypitana Pátara markayaq chäyarqä. 2Saychömi Feniciaman aywaq büquita tariyarqä. Say büquiwan aywarmi 3Chipre islata isuq kaqläpa päsayarqä. Saypita Siria provinciapa aywarmi Tiro markaman chäyarqä. Saychömi büquiwan apayashqan cargankunata kachariyarqan.

4Saycho discïpulukunata#21.4 Discïpulukunapaq parlarqa Jesucristuman yärakuqkunapaqmi parlaykan. tariykurmi qanchis junaqnintin paykunawan qoyäyarqä. Paykunami Espíritu Santu tantiyasiptin Pabluta niyarqan Jerusalénman mana aywananpaq. 5Say markapita aywakuyaptïnami wawqikuna warminkunawan y wamrankunawan lamar kuchunyaq churayämarqan. Saychömi qonqurpakuykur Tayta Diosta lapäkuna manakuyarqä. 6Saypita despidikuskirmi büquiman wisäyarqä. Paykunanami wayinkunapa kutikuyarqan.

7Tiro markapita aywakurnami Tolemaida markayaq chäyarqä. Saycho wawqi panikunawan tinkurmi paykunawan juk junaq qoyäyarqä. 8Waraynin junaq yarqurnami Cesareaman chaykur Tayta Diospa ali wilakuyninta wilakuq Felipipa wayincho posädakuyarqä. Paytami Jerusaléncho mikuyta aypunanpaq soqta wawqikunatawan nawpata akrash kayarqan.#Hech. 6.5; 8.5. 9Felipipa chusku jipash surinkunami Tayta Diospa profetïsankuna kayarqan.

10Saycho aska junaqna kaykäyaptïmi Judea provinciapita Agabo jutiyuq profëta chämurqan.#Hech. 11.28. 11Noqakuna kaykäyashqä kaqman shamurmi Pablupa wachkunta aptarkur makinta y chakintapis pankakurqan. Nirkurnami nirqan: <<Espíritu Santumi nin: <Kaynömi kay wachkupa duëñunta Israel runakuna Jerusaléncho pankaräsiyanqa. Nirkurmi mana Israel runakunaman entregayanqa> >>.

12Sayta wiyaykurmi lapan wawqi panikunawan Pabluta ruwayarqä Jerusalénman mana aywananpaq. 13Sayno ruwakuyaptïmi Pablo niyämarqan: <<¿Imanirtaq waqar lakikasiyämanki? Señor Jesucristupa jutincho wilakushqäpita manami pankaränaläpaqsu kaykä, sinöqa Jerusaléncho wanunäpaqpis listumi kaykä>>.

14Imanöpa niyaptïpis Pablo mana cäsuyämaptinmi mas ruwayarqänasu. Saypa trukanqa <<Tayta Dios munaptinqa jina saynöpis kanqachir>> niyarqä.

15Saypitanami Jerusalénman aywayänäpaq kamarikuyarqä. 16Cesareacho taq wakin discïpulukunami walkiyämashpan Mnasónpa wayinman pushayämarqan. Mnasón karqan Chipripitami. Payqa nawpapitanami Jesúspa discïpulun karqan. Paypa wayinchönami posädakuyarqä.

Santiaguta Pablo watukashqan

17Jerusalénman chaykuyaptïnami wawqi panikuna kushish chaskikayämarqan. 18Waraynin junaq Santiaguta watukaq Pabluwan aywarmi mayor wawqikunatapis shuntakash kaykäyaqta tariyarqä. 19Paykunata winchikuskirmi Pablo wilaparqan mana Israel runakuna kaqcho wilakuptin Tayta Dios imata rurashqantapis.#21.19 Sayno wilaparmi Pablo tantiyasirqan Jesucristuta chaskikuyänanpaq mana Israel runakunata Tayta Dios tantiyasishqanta, runakunata aliyäsishqanta y supaykunata qarqushqantapis.

20Sayta wiyaykurmi Tayta Diosta kushish agradëcikuyarqan. Nirkurmi Pabluta wilar niyarqan: <<Wawqi Pablo, musyankimi waranqanpa Israel runakunapis Jesucristuman yärakuykäyashqanta. Paykuna lapanpis nikäyan Moisés qelqashqan leykunata cäsukunansipaq kashqantami. 21Paykunatami runakuna nikäyan: <Pabluqa jäpa markacho taq Israel mayinsikunatami yachaykäsin Moiséspa leyninkunata mana cumpliyänanpaq. Manami munansu wamrankunata señalasiyänanta ni costumbrinsikunata cumpliyänantapis>. 22Kanan ¿imatataq rurashun? Chämushqaykita mayaykurqa [saysika runakunami shuntakäyanqa].

23<<Kanan yäsishayki imata ruranaykipaqpis. Kaychömi chusku runakuna Tayta Diosta promitiyashqanta cumpliykäyanna. 24Say runakunawan templuman aywar purificakuyay. Aqsankunata rutukuyänanpaq gastunkuna kamaripay.#Núm. 6.13-21. Saynöpami lapanpis tantiyayanqa contrayki parlaqkuna manakaqkunata parlaykäyashqanta. Saynölami tantiyayanqa qampis Moisés qelqashqan leykunata cumpliykashqaykita.

25<<Jesucristuman yärakuq mana Israel runakunamanqa maynami cartakushkansi. Say cartachömi nishkansi [say leykunata mana cumplirpis] ïdulukunapa jutincho pishtayashqan aysata, uywapa yawarninta y kikilan wanush uywakunapa aysanta mana mikuyänanpaq y fornicación jusata mana jusalikuyänanpaq>>.#Hech. 15.29.

26Saymi wilanakuyashqannöla waraynin tuta say chuskun wawqikunawan Pablo aywarqan. Waqtacho purificakuskirmi templuman yaykur cürakunata wilarqan ofrendankunata churar Tayta Diosta promitishqanta imay cumpliyänanpaq kashqantapis.

Pabluta prësu sariyashqan

27Qanchis junaqta cumpliykäyaptinnami Asia provinciapita shamuq Israel runakuna rikayarqan templucho Pablo kaykaqta. Saymi Pabluta saripakur 28sinchipa qayarar niyarqan: <<¡Israel mayikuna, yanapäyämay! ¡Kay runami maysay markakunapa purin contransi parlar! ¡Saynömi lutanta yachasir leyninsita y templunsitapis manakaqman churaykan! ¡Sagrädu templunsita mana respitashpanmi mana Israel runakunata yaykasimush!#Eze. 44.7-9.>>

29(Sayno niyarqan Trófimutawan Pabluta cällicho puriykäyaqta rikash karmi. Trófimuqa Éfeso markapita mana Israel runami karqan.)#Hech. 20.4.

30Sayno niyaptinmi lapan runakuna fiyupa rabyash cörrila shamur Pabluta waqta patiuman qarachaypa jorquyarqan. Nirkurmi templu ruri patiu punkunkunata wichqarkuyarqan. 31Saychömi Pabluta wanusiyta munar maqayarqan. Roma soldädukunapa comandantin sayta mayaskirmi 32capitankunata y soldädukunata pushakurkur cörriyla aywayarqan Pabluta maqaykäyashqan kaqman. Soldädunkunawan comandanti chaykäyaqta rikaskirmi Pabluta kachariykuyarqan. 33Comandantinami Pabluta prësu sarisir ishkay cadinawan watasirqan. Nirkurmi runakunata tapurqan: <<¿Pitaq kay runa? ¿Imatataq rurash?>> nir.

34Jukno jukno parlar büllata rurayaptinmi ima päsashqantapis mana musyar Pabluta cuartilman apasirqan. 35Qepanpa aywar runakuna maqayta munayaptinmi grädaman chaykasir soldädukuna Pabluta wintuypa cuartilman wisäsiyarqan. 36Paykunatami aska runakuna qatiräyarqan <<¡wanusun!>> niyashpan.

Runakunapa nawpancho Pablo wilakushqan

37Cuartilman yaykasiyänanpaq kaykaptinnami comandantita Pablo nirqan: <<Taytay, ¿parlarkushwanku?>>

Niptinmi Pabluta nirqan: <<¿Griego parlayta yachankiku? 38Qam Egipto runami kanki, ¿aw? ¿Manaku qam gobiernupa contran sharkuq kaykanki? ¿Manaku chusku waranqa (4,000) wanusikuq runakunata pushash sunyaq jirkapa puriq kaykanki?>>

39Saymi Pablo nirqan: <<Noqaqa Cilicia provinciapa capitalnin Tarso markacho yuriq Israel runami kä. Israel mayïkunawan rätula parlarkunäpaq ruwakuläshayki, taytay>>.

40Sayno ruwakuptinmi comandanti awnirqan. Saymi grädacho ichiykur runakunata upälakuyänanpaq makinwan Pablo sëñarqan. Lapanpis upälaskiyaptinmi hebreo idiömapa parlapar nirqan:

Currently Selected:

Hechos 21: qvhB

Highlight

Copy