Hechos 11

Mana Israel runakunapis Jesústa chaskikuyashqanta Pedro wilashqan

1Mana Israel runakunapis Tayta Diospa wilakuyninta chaskikuyashqantami apostolkuna y Judea provinciacho wawqi panikunapis musyayarqan. 2Saymi Jerusalénman Pedro kutiykuptin señalash kaq wakin wawqikuna jamurar 3niyarqan: <<¡Imanirtaq mana Israel runakunapa wayinman yaykur paykunawan mikushkanki!>>

4Sayno niyaptinmi ima päsashqantapis qatinaylanpa wilapar Pedro nirqan: 5<<Jope markacho Tayta Diosta manakuykashqächömi jana pasapita chuskun puntanpa watash jatunkaray jaku niraq uraykämuqta revelacioncho rikarqä. 6Saycho shumaq tantiyaykunäpaqmi tukuy casta ashmana kaq y mana ashmana kaq uywakuna, lashtaypa puriqkuna y pajaqkunapis#11.6 Wakin runakunaqa vuelaqkunapis niyanmi. karqan. 7Sayta rikaraykaptïmi jana pasapita nimurqan: <Pedro, saykunata pishtaskir mikuy>.

8<<Sayno nimaptinmi nirqä: <Manami saykunata mikümansu, Taytay. Impüru uywakunataqa manami imaypis mikushkäsu>.

9<<Saymi jana pasapita yapay nimurqan: <Mikunaykipaq püru kashqanta Tayta Dios nikäshuptikiqa ama impüru kashqanta niysu>. 10Say revelacionta kimsa kuti rikaskasimarmi jakuta jana pasapa kutisikurqan.

11<<Say hörami Cesarea markapita kachamushqan kimsa runakuna ashiyämashpan päsaraykashqä wayiman chäyämurqan. 12Saymi Espíritu Santu nimarqan mana mansakuypa paykunawan aywayänäpaq. Sayno nimaptinmi kay soqta wawqikunawan aywar qayasimaq runapa wayinman yaykuyarqä. 13Saychömi wilayämarqan wayincho juk ángel yuriparkur kayno nishqanta: <Simón jutiyuq runata pushayämunanpaq Jope markaman kachakuy. Paypa jukaq jutinmi kaykan Pedro. 14Paymi tantiyasishunki qam y wayikicho taqkuna imanöpa salvakuyänaykipaqpis>.

15<<Saycho wilapar qalariykaptïmi noqansiman chämushqannöla paykunamanpis Espíritu Santu chash. 16Saychömi yarparkurqä Señor Jesucristo kayno nishqanta: <Juanqa yakulawanmi bautizarqan. Qamkunami isanqa Espíritu Santuwan bautizash kayanki>.#Hech. 1.5. 17Señor Jesucristuman yärakush Espíritu Santuta qaramashqansinömi paykunatapis Tayta Dios qarash. Sayno kaykaptinqa ¡noqa pitaq kä Tayta Diosta michänäpaq!>>

18Sayno wilapaptinmi Pedruta jamuräyänanpa trukanqa kushikuyashpan niyarqan: <<¡Mana Israel runakunatapis Tayta Dios tantiyaykäsinmi jusalikuykunata wanakur mana ushakaq kawayta tariyänanpaq!>>

Antioquíacho Jesucristuta chaskikuyashqan

19Estebanta wanuykasiyaptin Jerusalénpita qeshpikuqkuna Feniciaman, Chipriman y Antioquíamanpis#Hech. 8.1-4. chäyashpan Israel mayinkunalata ali wilakuyta wilapäyarqan. Mana Israel runakunataqa manami pitapis wilapäyarqansu. 20Chipripita y Cirenipita kaq wakin wawqikunami isanqa Antioquíaman chaykur mana Israel runakunatapis Señor Jesucristupa ali wilakuyninta wilapäyarqan. 21Sayno wilakuyänanpaq Tayta Dios yanapaptinmi Jesucristuta askaq chaskikuyarqan.

22Sayta wiyayashpanmi Jerusaléncho kaykaq wawqi panikuna Bernabéta Antioquíaman kachayarqan. 23Saycho mana Israel runakunatapis Tayta Dios kuyapashqanta rikarmi Bernabé fiyupa kushikurqan. Saymi paykunata shakyäsirqan shumaq cäsukur Tayta Diosman imaypis yärakuyänanpaq. 24Bernabéqa ali runami karqan. Saynöpis Tayta Diosman yärakur Espíritu Santupa munayninchömi imaypis kawaq. Saycho yachasiptinmi aska runakuna Señor Jesucristuta chaskikuyarqan.

25Saypitanami Bernabé Tarso markaman aywarqan Sauluta ashiq. 26Tariykurnami Antioquíaman kutir Sauluwan Bernabé juk wata wawqi panikunawan shuntakäyarqan. Say watami aska runakunata yachasiyarqan. Antioquíachöraqmi Jesúspa discïpulunkunata#11.26 Discïpulukunapaq parlarqa Jesucristuta chaskikuqkunapaqmi parlaykan. cristiänu niyta qalaykuyarqan.

27Say wisanmi Jerusalénpita Antioquíaman profëtakuna aywayarqan. 28Saychömi Espíritu Santu tantiyasiptin profëta Agabo#Hech. 21.10. wilakurqan maysaychöpis fiyupa muchuy kananpaq kashqanta. Wilakushqannölami muchuy karqan Romacho Claudio César mas mandaq kashqan wisan. 29Muchuy kananpaq wilakuptinmi discïpulukuna wilanakuyarqan imatapis kashqanpita shuntarkur Judeacho kaq wawqi panikunaman apasiyänanpaq. 30Wilanakuyashqanno shuntaykurnami Judeacho kaq mayor wawqikunaman Bernabéwan y Sauluwan apasiyarqan.

Currently Selected:

Hechos 11: qvhB

Highlight

Copy