Marcos 14

Jesure Tse̱añu'u, Cajë Yo'oye

(Mt 26.1-5; Lc 22.1-2; Jn 11.45-53)

1Israel pa̱i Egíptopi etajë pa'ise'ere cuasajë yo'oye, cui'ne o'sa peo pan a̱iñe caya mu'seña cara maca, Maija'quë huë'e ñacaicohua'i ëjaohua'ipi cui'ne cua̱ñese'e ye'yacohua'ipi merepa Jesure coa cosojë tse̱ani huani je̱ora'ye cajë. I̱ti yo'o ja̱'ñere co'ehuë. 2Careña, cui'ne pa̱i tsi'sini sihuajë yo'o maca huaiye pa̱ñu'u, co'aye pa̱ipi cuasa co̱'me huesëni sa̱ñope ai yo'ojë cama'cohua'ini, careña.

Huëo Së̱ñepi Jesure Tsoacaise'e

(Mt 26.6-13; Jn 12.1-8)

3Jesús Betania daripëre paquëña, Simón ja̱'ju dahuë hue'equë pa'isiquë huë'ere, mesare ñuquëña, Jesús. Ñu'ina, te'o nomio jai do'i huëo së̱ da'care quë̱na huëna ti̱mësiconi dani Jesús si̱opëna i̱ti da'capi dooña. Nardo da'case'e nesicopi, yequeje̱ co̱'mema'copi. 4I̱ti maca ñu'icohua'ipi pë̱ti huëoreña. Ja̱je pë̱ti huëojë careña:

“¿Me yo'oco huëo së̱ da'ca coa nejoco'ni? 5I̱opi yecohua'ina se i̱sico pani trecientos romano curiquë të̱'ña nera'o. Ja̱je yo'oni co'amaña peocohua'ire co̱catira'o.”

Ja̱je cajë i̱ote coejë pë̱ijë ñareña.

6Ja̱je ñajëna, Jesupi caëña:

“Coa ñajë'ë, i̱ose'e yo'oja̱'co. ¿Me yo'ojë jo̱sa caye'ni? Iye i̱o yë'ëre necaise'e cato de'o co'amaña'ë. 7Co'amaña peocohua'ire si'anë mësaru ñajë paja̱'cohua'i a'ë. Ja̱je pa'iquëta'are yë'ë cato mësaru ña hue̱'ñare si'anë pa'iye pa̱ja'quë a'ë. 8I̱o cuasaye ja'i maña ico cato de'hue yë'ë si̱opë huëo së̱ñe necaco'ë, du'runa yë'ëre ta̱ ja̱'ñere caco. 9Nuñerepa cayë, coa si'a hue̱'ña ico yo'ose'e quëaye pa'ija̱'coa, i̱o yo'ose'e hua̱nëyema'pë cuasa ja̱'ñere cajë, huaso coca quëa maca.”

Jesure Judas I̱sise'e

(Mt 26.14-16; Lc 22.3-6)

10Judas Iscariotepi sani Maija'quë huë'e ñacaicohua'i ëjaohua'i ja̱'re co̱ni coca caëña, Jesure tse̱ani i̱ohua'ina i̱si ja̱'ñere. Ja̱ë cato doce ye'yacohua'i aquë paji'i. 11Ja̱je caquëna, asani ai sihuareña. Ja̱je sihuajë curiquë i̱sireña. I̱sirena, Judaspi ¿Jesure merepa tse̱ani i̱sija̱'quë a'ni? caquë i̱ yo'o ja̱'ñere co'eiña.

Mai Ëjaë A̲ni Tëjise'e

(Mt 26.17-29; Lc 22.7-23; Jn 13.21-30; 1 Co 11.23-26)

12Egíptopi Israel pa̱i etajë pa'ise'ere cuasajë sihuajë pa̱i tsi'sini, tsoe yo'ojë pa'ise'eje̱ yo'o mu'se ti̱'aëña, o'sa co̱'me ma'a a̱o a̱i mu'se. Du'ru mu'serepa, cui'ne yëi ñamare huai mu'serepa ti̱'aëña. Ja̱je ti̱'aëna, Jesús ye'yacohua'ipi se̱teña:

“¿Egíptopi Israel pa̱i etajë pa'ise'ere cuasajë, a̱iñe jerona sani ne de'huarena a̱iñe yëquë'ni?”

13Cajëna, Jesupi cayaohua'ire i̱ ye'yacohua'ire jëjo saoquë caëña:

“Jai pa̱i daripëna sani oco yurupë saquëni ti̱'ani i̱ ja̱'re saijë̱'ë. 14Sani ja̱'re sa cacajë cajë̱'ë i̱te huë'e aquëre: ‘Ye'yaquëpi capi: ¿Jerore pa'ico'ni, tu'rihuë yë'ë ye'yacohua'i ja̱'re na'iquëna a̱ija'co, Egíptopi Israel pa̱i etase'ere cuasajë? cajë̱'ë.’ 15I̱pi mësarute i̱ñoja'quë api, jai tu'rihuëpi tsoe ne de'huasiconi. Ja̱rona yureta'a ñani ne de'huajë̱'ë, mai tse̱.”

16I̱ ye'yacohua'ipi sani ti̱'areña, jai daripë. Ti̱'ani ja̱re Jesús quëase'eje̱ si'aye ti̱'areña. Ti̱'ani na'iquëna, a̱i ja̱'ñe ne de'huareña, Egíptopi Israel pa̱i etase'ere cuasajë yo'oyere.

17Ñami de'osi maca Jesús i̱ doce ye'yacohua'i ja̱'re ti̱'aëña, i̱ti hue̱'ña. 18Ti̱'ani mesare ñu'i a̱iquëpi caëña, Jesús:

“Nuñerepa mësarute cayë. Mësaru aquëpi yë'ë ja̱'re te'ona a̱iquëpi i̱si yehuoja̱'quë api.”

19Ja̱je ca maca i̱ohua'ipi sa̱'ñe i̱ohua'ija̱'a se̱teña:

“¿Yë'ë pa'ija̱'quë a'ni?”

20Cajëna, Jesupi caëña:

“Doce aquëpi yo'oja̱'quë api, yë'ë ja̱'re te'e quë̱na de'huana a̱iquëpi. 21Ja̱je pa'itoje̱ de'oji. Pa̱i Mamaquë cato ja̱re i̱ti toyase'e pa'iyeje̱ saiji. Ja̱je pa'iquëta'are ¡Teayerepa yo'oja̱'quë api, i̱te i̱si yehuoquëta'a! I̱pi ai de'oye pa̱siquë pa'ito de'ora'pi, ja̱ëte.”

22Ja̱ yë'ta'a a̱ore a̱ijëna, Jesupi panpë i̱ni Maija'quëre de'oji caquë se̱ni i̱ ye'yacohua'ire a̱oquë caëña:

“A̲ijë'ë. Iye cato yë'ë ca̱pë a'ë.”

23Jeteyo'je u̱cu duruhuë i̱ni Maija'quëre de'oji, caquë se̱ni, i̱ ye'yacohua'ina i̱siña. I̱sina, si'aohua'i u̱cureña, i̱ote.

24U̲curena, caëña:

“Iye cato yë'ë tsie a'ë. Jai pa̱i de'oye pa'i ja̱'ñere caquë huajëye Maija'quë pa̱ire cayere quëaye a'ë. 25Ja̱je pa'ina, mësarute nuñerepa cayë cui'naëpi iye, cuiya'i o'sa co̱no u̱cuye pa̱ja'quë a'ë. Yequë mu'se Maija'quë cua̱ñe te̱'tena cuiya'i o'sa u̱cuñu'u.”

Pedro Cosose'e

(Mt 26.30-35; Lc 22.31-34; Jn 13.36-38)

26Jë̱jë tëjini Olivos cu̱tina sateña.

27Jesupi caëña, ja̱ohua'ire:

“Si'aohua'i mësaru yë'ëre je̱ocoja̱'cohua'i a'ë, iye ñami. Ja̱je pa'ina, toyase'e caji: ‘Huani je̱oja'quë a'ë, yëi ñamare ñacaiquëre. Ja̱ maca yëi ñamapi tiya huesëja̱'cohua'i a'ë.’ 28Ja̱je pa'iquëta'are ju̱'isiquëpi huëisi maca yë'ëpi du'ru saija̱'quë a'ë, Galileana, mësaru ja̱ yë'ta'a saima'pëna.”

29Ja̱je caquëna, Pedropi caëña:

“Ja̱je yecohua'i më'ëre je̱ocotoje̱ yë'ë cato më'ëre je̱oñe pa̱ñë.”

30Caquëna, Jesupi caëña:

“Nuñerepa më'ëre cayë. Iye ñami ja̱ yë'ta'a cura cayaye yë'ima'në më'ëpi toaso̱ñe cosoja̱'quë a'ë, i̱te ñama'quë a'ë caquë.”

31Ja̱je Jesús caquëna, i̱pi caëña:

“Yë'ë cato pa̱ñë, cosoye. Ju̱'iñe pa'itoje̱ më'ë ja̱'re ju̱'ija'quë a'ë.”

Caquëna, yecohua'ije̱ cui'ne careña.

Jesús Se̱se'e Getsemanína

(Mt 26.36-46; Lc 22.39-46)

32Getsemaní hue'e hue̱'ñana ti̱'ani Jesús caëña, i̱ ye'yacohua'ire:

“I̱ñore dujë pa'ijë̱'ë, yë'ëse'e Maija'quëre sani se̱si'i.”

33Cani coa Pedrore, Jacobore, cui'ne Juanre saëña. Ja̱ maca ai cuasaquë cui'ne ai yo'o huëouña. 34Ja̱je yo'oquë caëña, ja̱ohua'ire:

“Ai oi ëaye nëiji, yë'ë joyore papi ju̱ni huesëye pa'ina. I̱ñona mësaru cato pëani sëtasicohua'ipi pa'ijë̱'ë, ca̱ima'pë.”

35Cani Jesús i̱se'e se̱ña maca sani yejana do're ja'runi Maija'quëre de'hue neñe pa'ito, necaijë̱'ë, ai yo'oye pa̱si'i, i̱ti yo'o maca ti̱'aëna, caquë se̱quëña.

36Ja̱je se̱i caëña:

“Yë'ë ja'quë, më'ëre cato si'aye neñese'e pa'iji. Nejocaijë̱'ë, yë'ëre ai yo'oye ne ja̱'ñere. Yë'ë yëye peoja̱'quë, coa më'ë yëyepi yo'oye pa'ija̱'quë.”

37Ja̱je se̱ni tëjini i̱ ye'yacohua'i quë'rona sani ñaquëna, ca̱isicohua'ipi pateña. Pa'ijëna, Pedrore caëña:

“¿Simón ca̱iquë, më'ë? ¿Te'e hora macaje̱ sëtasiquëpi ña ti̱'añe pa̱ë, më'ë? 38Sëtasicohua'ipi pa'ijë Maija'quëre se̱jë'ë, co'ayena ta̱iñe pa̱ja'cohua'i. Nuñerepa joyo cato yo'oye yëji. Ja̱je pa'iquëta'are më'ë ca̱pëpi tutu peoji.”

39Ja̱je cani ti̱jupë sani ja̱'rë case'eje̱ pa'ye caquë se̱quëña. 40Ja̱ro cui'naëpi co'iquë cui'ne ca̱isicohua'ini ti̱'api i̱, ye'yacohua'ire. Airepa huëo ca̱'quëna ñaco naimopi jameina ca̱ë'ë, quëcoñu'u cajëta'a. Ja̱je pa'ina, i̱te sa̱ñope sehuo ti̱'añe peohuë. 41Toaso̱ñe acore saisiquëpi ti̱taquë caëña, ja̱ohua'ire:

“Yureta'a ca̱ni huajëjë̱'ë. Tsoe de'oji. Ja̱ ja'ye ca̱ijë'ë. Ti̱'api Pa̱i Mamaquëre co'aye yo'ocohua'i jë̱ñana i̱si maca. 42Huëijë̱'ë. Sañu'u. Yë'ëre i̱si yehuoja̱'quëpi daiji.”

Jesure Tse̱ase'e

(Mt 26.47-56; Lc 22.47-53; Jn 18.2-11)

43Ja̱ yë'ta'a Jesús cocare i̱ ye'yacohua'i ja̱'re caquëna, Judaspi tsoe ti̱taëña. Ja̱ë cato doce acohua'i aquë paji'i. I̱ ja̱'re co̱ni jai pa̱i hua'ti ca̱jicohua'ipi cui'ne tara ca̱jicohua'ipi dateña. Maija'quë huë'e ñacaicohua'i ëjaohua'ipi, cua̱ñese'e ye'yacohua'ipi cui'ne aiohua'ipi jëjo daocohua'ipi co̱ni daisicohua'i pateña. 44Judas i̱ti i̱si yehuoja̱'quëpi caëña, ja̱ohua'ire:

“Yë'ëpi i̱ni ti̱'ani sihuaja̱'quë a'ë. Sihuaquëna, ñani ja̱ëni tse̱ajë'ë. Tse̱ani de'oye sëani sajë̱'ë.”

45Ja̱je casiquëpi ti̱'ani Jesure tsioja̱ni caëña:

“Ye'yaquë, Ye'yaquë.”

Ja̱je caquë tsu̱'supi. 46Tsu̱'suquëna, ja̱ maca Jesure to̱me dani tse̱ani sareña, sëasiquëni.

47Ja̱je yo'o maca i̱ti maca pa'iquëpi hua'ti dutani Maija'quë huë'e ñacaicohua'i necaiquëni ca̱jorose'e tëto tëaëña. 48Ja̱ maca Jesuje̱ caëña, i̱te tse̱a pa̱ire:

“¿Tarapi hua̱'ñapi co̱ni date, yë'ëre tse̱añu'u cajë co'amaña yahue i̱maquëre yo'oyeje̱ pa'ye? 49Yë'ë si'a mu'seña Maija'quë huë'epi pa'i mësarute ye'yaquëna, mësarupi yë'ëre tse̱añe pa̱huë. Ja̱je pa'iquëta'are iye cato toyase'epi ti̱'aquëna, ja̱je yo'oye pa'iji.”

50Ja̱ maca i̱ ye'yacohua'ipi Jesuse'ere te'ire je̱oni cati sateña.

Po̱sëpi Catiye

51Ja̱je pa'iquëta'are te'i tsi̱ po̱së macapi jai ca̱pi deasiquëpi tuquëña, Jesure. Tuina, tse̱areña. 52Tse̱arena, jai ca̱se'e je̱oni peoyo catiña.

Jesure Ca Tëjicohua'i Quë'rona Sase'e

(Mt 26.57-68; Lc 22.54-55, 63-71; Jn 18.12-14, 19-24)

53Jesure ja̱ maca sareña, Maija'quë huë'e ñacaicohua'i ëjaërepa quë'rona. Ja̱rona Maija'quë huë'e ñacaicohua'i ëjaohua'i tsi'sireña, aiohua'i, cui'ne cua̱ñese'e ye'yacohua'i co̱ni. 54Ja̱je sajëna, Pedroje̱ so'o maca se ñaquë tuquëña, Maija'quë huë'e ñacaicohua'i ëjaërepa huë'e hue'se daripëre pana. Ja̱rona soldado pa̱i ja̱'re co̱ni pëani toare cu̱i ñuquëña. 55Maija'quë huë'e ñacaicohua'i ëjaohua'i cui'ne pa̱i yo'oye ca tëji ëjaohua'ire papi Jesure ja̱je yo'oquëre papi cayere co'ereña, asani huani je̱oñere cajë. Ja̱je co'ejëta'a ti̱'añe pa̱reña. 56Cui'ne jai pa̱i coa huëojë ti yo'o ma'ñere sa̱ñope Jesure careña, cosojë. Cui'ne i̱ohua'ija̱'a sa̱'ñe yo'ojë careña, te'e cayepi peoquëna. 57Yecohua'ipi co'arepa huëojë careña. 58Yëquëpi i̱ caye asasicohua'i a'ë, cajë yo'ojë careña:

“Ñeje caquë api, ‘yë'ëpi Maija'quë huë'e nejoja'quë a'ë, pa̱i de'huasi huë'e. Ja̱je yo'oni jeteyo'je tres mu'seña pa'i maca huajëcore neja'quë a'ë, pa̱ipi nema'core.’ Ja̱re asahuë.”

59Ja̱je canije nuñerepa te'eje̱ pa'ye caye pa̱reña.

60Ja̱ maca Maija'quë huë'e ñacaicohua'i ëjaëpi i̱ohua'i ca jopoja̱'a huëni nëcayepi Jesure se̱quëña:

“¿Asaquë më'ë, më'ëre sa̱ñope caye? ¿Me yo'oquë sa̱ñope sehuoye pa̱quë'ni?”

61Caquëna, Jesupi ai jerepa ti sehuoye pa̱ëña, i̱ caye. Ja̱je pa̱quëna, Maija'quë huë'e ñacaicohua'i ëjaëpi ti̱jupë Jesure se̱quëña, ñeje:

“¿Më'ë Cristo, Maija'quë de'oquërepa mamaquë a'ë?”

62Caquëna, ja̱ maca Jesupi sehuouña:

“Ja̱je pa'ijë̱'ë. Yë'ë a'ë. Cui'ne mësarupi Pa̱i Mamaquëre yë'ëre ñaja'cohua'i a'ë, Diusu tutu quë'irepa ëja te̱'tere ñu'ina. Cui'ne Ma'tëmopi sirija̱'a nëca meina, ñaja'cohua'i a'ë.”

63Ja̱je caquëna, asani Maija'quë huë'e ñacaicohua'i ëjaëpi i̱ ju'i ca̱re co'ye naë yeto saoquë caëña:

“¿I̱quere cajë jerepa pa̱ire quëaja̱'cohua'ire co'eye'ni, tsoe ti̱'api? 64Ja̱re mësarupi asahuë, i̱ yë'opopi Maija'quëre cue'cuequë caye. Ja̱je pa'ito ¿me caye'ni, mësaru?”

Ja̱je caëna, yureta'a si'a pa̱i careña:

“Huani je̱oñe pa'iji.”

65Casi maca je̱'nërepa yecohua'ipi copi tse'se huëoreña. Cui'ne yecohua'ipi tsiana ca̱ñapi tëto que̱oni të'cajë yo'ojë careña:

“¿Nepi të'care'ni? Se ca ñajë'ë.”

Cajëna, soldado pa̱ije yo'oreña, i̱te.

Pedro Cosose'e

(Mt 26.69-75; Lc 22.56-62; Jn 18.15-18, 25-29)

66Pedro cato huë'ehuëre paquëña, hue'se daripëre. Ja̱rote pa'ina, Maija'quë huë'e ñacaicohua'i ëjaëre necaicopi 67toare cu̱i ñu'ina, ñani i̱te caoña:

“I̱na, më'ëje Jesús Nazaret aquë ja̱'re pa'isiquë a'ë.”

68Cacona, Pedropi caquë cosouña:

“Ñama'quë a'ë, i̱te. ¿I̱quere ja̱je caco'ni? Huesëyë.”

Ja̱je cani eta sa'ro quë'rona etaëña. Eta maca curapi yëquëña. 69Maija'quë huë'e ñacaicohua'i ëjaëre necaicopi ñani cui'naopi ca huëo co̱ña, i̱ti maca pa'icohua'ina:

“Iquë cato Jesús ye'yacohua'i aquë api.”

70Ja̱je catoje̱ i̱je cui'naëpi coso co̱uña, ñama'quë a'ë caquë. A'ri maña tsoe maca pa'i maca Pedrore i̱ti maca pa'icohua'ipi careña:

“Më'ë Jesús ye'yacohua'i aquëre pa'ë. Më'ë cato Galilea aquë a'ë. Cui'ne më'ë coca cayeje̱ Jesús ye'yacohua'i caye a'ë.”

71Ja̱je caquëna, Pedropi yureta'a sa̱ñope co'aye caquë, cui'ne ñama'quë a'ë care payë caquë capi:

“¿I̱quere mësaru yo'ojë caye'ni? Ñama'quë a'ë, ja̱ëte.”

72Caquëna, cui'naëpi cura yëni co̱pi. Ja̱je cura yë'i maca yureta'a Pedro cuasa ñajaji'i, Jesús i̱te case'e. Jesús cato ca'a̱ji'i: “Ja̱ yë'ta'a cura cayaye yë'ima'ëna më'ëpi toaso̱ñe ñama'quë a'ë caquë cosoja̱'quë a'ë.” Ja̱je i̱ case'eje̱ ti̱'aëna, i̱tire cuasa ñajani ota huëoni ai oji'i.

Currently Selected:

Marcos 14: sey

Highlight

Copy