Marcos 13

Jesús Quëase'e Maija'quë Huë'ere Nejo Ja̱'ñere

(Mt 24.1-2; Lc 21.5-6)

1Maija'quë huë'epi Jesús eta maca i̱ ye'yaquëpi caëña:

“¡Ye'yaquë, iye quë̱na pë̱are ñajë'ë, cui'ne jai huë̱'ñare!”

2Ja̱je caquëna, Jesupi sehuouña:

“¿Jai huë̱'ñare ñaquë caquë? Ja̱ më'ë ñase'e yequë mu'se, peo ja̱'ñe a'ë. Quë̱na pë̱api tu̱ñajë nese'e si'aye nejo ja̱'ñe a'ë.”

Ja̱ Yë'ta'a Yeja Caraja̱ima'ñë I̱ño Ja̱'ñe

(Mt 24.3-28; Lc 17.22-24; 21.7-24)

3Ja̱ maca Maija'quë huë'e je̱'ñere pare Olivos cu̱tihuë pa'icona sani Jesús ja'rusiquëpi ñu'ina, Pedro, Jacobo, Juan cui'ne Andrés co̱ni pa̱i asama'tona se̱teña:

4“Je yëhua ja̱je yo'o ja̱'ñere më'ë caë'ni, yëquëre quëajë̱'ë. ¿Me pa'ija̱'coa'ni, i̱ti yo'o i̱ño ja̱'ñe ja̱ yo'oye ti̱'a maca?”

5Cajëna, Jesupi sehuouña:

“De'huarepa ñajë pa'ijë̱'ë, mësarute coa cosojëna, sehuoye. 6Jai pa̱i yë'ë mamire cajë ‘yë'ë a'ë, Cristo’ caja̱'cohua'i a'ë. Ja̱je cajë coa cosojëna, sehuoja̱'cohua'i a'ë, jai pa̱i.

7Ja̱je pa'iquëta'are mësarupi huajo coca cui'ne uihuaye asacohua'i pani quëquëma'pë pa'ijë̱'ë. Ja̱ cato ja̱re ja̱je yo'oye pa'ina, yo'oji. Ja̱je yo'onije ja̱ yë'ta'a caraja̱iñe peosipi. 8Yequë pa̱i tsëcapëpi yequë tsëcapëre se uihuaja̱'cohua'i a'ë. Cui'ne yequë yeja pa̱ipi se uihuaja̱'cohua'i a'ë. Si'a hue̱'ña yeja ñu'cueye pa'ija̱'coa. Cui'ne a̱opi peoquëna, a̱i ëa ju̱'ija'cohua'i a'ë. Cui'ne ai yo'oyepi pasipi. Iye pasipi, du'ru macarepa ai yo'oye.

9De'hua mësaruja̱'a co'ye de'oye ñajë'ë. Mësarute cato pa̱ipi tse̱ani pa̱i ëjaohua'ina i̱sija̱'cohua'i a'ë. Ja̱ohua'ipi cua̱ñejëna, mësarute pa̱i tsi'si hue̱'ñana si'sejë yo'oja̱'cohua'i a'ë. Ja̱je yo'ojëna, mësarupi yë'ë do'ire i̱ñoja'cohua'i a'ë cua̱ñecohua'i cui'ne si'a pa̱i ëjaohua'i ña hue̱'ñana. 10Ja̱ yë'ta'a caraja̱ima'në de'o cocare quëaye pa'iji, si'a hue̱'ña. 11Mësaruni ëjaohua'i quë'rona sasicohua'i pa'ito ¿me caja̱'cohua'i a'ni? cuasama'pë pa'ijë̱'ë. Cajë̱'ë, Maija'quë i̱si cocapi, ja̱ maca cato. Ja̱je pa'ina, mësarupi caye pa̱ja'cohua'i a'ë, Maija'quë joyopi caja̱'quë api. 12Te'e tsëcapë acohua'ipi yo'jeire pa̱nita'a maja'yëre quëa yehuoja̱'cohua'i a'ë huani je̱ojë'ë, cajë. Pëca ja'quëohua'ipi mamajëre quëa yehuoja̱'cohua'i a'ë, cui'ne mamajëpi pëca ja'quëohua'ire sa̱ñope yo'ojë huani je̱oja'cohua'i a'ë. 13Si'a pa̱i mësarute coeja̱'cohua'i a'ë, yë'ë do'ire. Ja̱je pa'iquëta'are yo'o jujama'quëpi huaso cua̱ñoja'quë api nuñerepa yo'oquëpi.

14Maija'quëre quëacaiquë Daniel toyaquë pa'a̱ji'i, si'si nequëpi cui'ne coa nejoquëpi si'si pa'ima'tore pa'ina, ñani Maija'quë toya ja'o ñaquëpi asa ti̱'añe pa'iji. Ja̱ maca Judea pa'icohua'ipi ai cu̱tihuë̱ana catiye pa'iji. 15Ja̱ mu'se huë'e ë̱mëje'e totore pa'iquë pani cajeni cacani co'amañare sasi'i caquë yo'oma'ë. 16Tsiore pa'iquë pani co'ini ca̱ña sasi'i caquë yo'oma'ë pa'ijë̱'ë. 17Ja̱ mu'seña nomiohua'i tsi̱ ë̱tapë̱a pa'icohua'i cui'ne tsi̱ mañare pacohua'i ai yo'oja̱'cohua'i a'ë, teaye. 18Mësaru cato Maija'quëni se̱jë'ë, sësë mu'seña catiye peoja̱'core. 19Si'aye ai yo'oye tëto saise'erepa pa'ija̱'coa. Ja̱ mu'seña cato ai co'a mu'seña pasipi, yeja de'hua maca peopi. Cui'ne jeteyo'je peosipi, ja̱ jerepa ai yo'oye. 20Ja̱ mu'seña Ëjaëpi ja̱ yo'oye tëama'quë pa'ito te'ije̱ jëaye peo'ñe pa'io. Ja̱je pa'iquëta'are i̱ sahuasicohua'ini i̱ pa̱ini caquë ja̱ ai yo'oyere tëaquëna, yecohua'ije̱ co̱ni jëaja̱'cohua'i a'ë.

21Mësarute yecohua'ipi ‘i̱ñore pa'iji, Cristo ñajë'ë,’ cacohua'i pa'ito asama'pë pa'ijë̱'ë, pa̱nita'a ‘Jetore pa'iji.’ Catoje̱ sehuoma'pë pa'ijë̱'ë, i̱ohua'i caye. 22Coa cacohua'i daija̱'cohua'i a'ë. Yë'ë a'ë, Cristo cacohua'i, cui'ne Maija'quë cocare quëacohua'i a'ë cacohua'ije̱ daija̱'cohua'i a'ë. Ja̱ohua'ipi pa̱i yo'o ti̱'a ma'ñere yo'o i̱ñoja'cohua'i a'ë, coa cosoñu'u cajë. Ja̱je yo'ojëna, Maija'quërepa sahuasicohua'ique ja̱ohua'ire sehuoye ja'i maca yo'oja̱'cohua'i a'ë. 23Ja̱je pa'ina, mësarute du'ru quëa nëohuë de'oye ñajë pa'ijë̱'ë, caquë.

Pa̱i Mamaquë Dani Co̱ñe

(Mt 24.29-35, 42-44; Lc 21.25-36)

24Ja̱je ai yo'o mu'seña tëto saisi maca yureta'a, ë̱sëpi yaya huesëja̱'quë api. Ñañëje miañe pa̱ja'quë api. 25Ma'ñocoje̱ ma'tëmopi to̱meja'cohua'i a'ë. Ja̱je yo'o maca ma'tëmo tuture paque tsasija̱'coa. 26Ja̱ maca sirija̱'a tutu quë'ire papi cui'ne de'oquëre papi Pa̱i Mamaquë daija̱'quë api. 27Ja̱ jeteyo'je i̱ hui̱ñaohua'ire cua̱ñesipi, i̱ sahuasicohua'ire cajese'e tutu jupë̱api i̱ pa̱ire tsi'sojë̱'ë, caquë si'a hue̱'ña pa'icohua'ire.

28Higuera so̱quë yë yo'oye ayere ye'yejë̱'ë. Ja̱ so̱quë yë cato hui̱ña capë̱a pa'i maca je̱'nërepa ja'o eta huëocoa. Eta maca ñani cacohua'i a'ë, utëcahuë ti̱'aji. 29Ja̱ yo'oyeje̱ pa'ye mësarupi ñajëna, yë'ë case'epi ti̱'aquë tëto saina, ñajë je̱'në ja'yere eta sa'rore pa'iji cayë. 30Nuñerepa cayë, ja̱ yë'ta'a iye maca pa'icohua'i ju̱'ima'në tëto saija̱'coa, iye. 31Ma'tëmo cui'ne yeja pani jujani caraja̱i ja̱'ñe a'ë. Ja̱je pa'iquëta'are yë'ë coca cato yë'ë case'eje̱ ti pa'i ja̱'ñe a'ë.

32I̱ti mu'se cui'ne hora pa̱i huesëyë. Hui̱ñaohua'ije̱ cui'ne Maija'quë mamaquëje̱ huesëji. Si'aohua'i huesëyë. Coa ja'quëse'e asaji, i̱ti mu'se.

33Ja̱je pa'i do'ire, mësaru cato si'anë sëtasicohua'ije̱ pa'iohua'ipi ñajë se̱jë pa'ijë̱'ë, i̱ dai hora huesëye sëte. 34Yë'ë dai maca cato te'i so'ona sai huëoni ja̱ yë'ta'a huë'epi saima'në i̱ jo'yare pa̱i ñapere co'amaña yo'o ja̱'ñe i̱sini cui'ne eta sa'ro ñacaiquëre cua̱ñeni ñajë'ë cani saise'eje̱ pa'iye a'ë. 35Ja̱je pa'ina, mësaru cato sëtasicohua'ipi pa'ijë̱'ë, coa si'anëpi, i̱ti huë'e aquë ti̱tayere huesëye sëte. Na'i maca, ñami jopo, mu'se, cura yë'i maca, pa̱nita'a nea hue̱'ña daima'quëni cajë. 36Yo'ojëna, cuasama'topi ca̱isicohua'ini ti̱tama'quëni de'hua ñajë'ë. 37Iye mësarute caye cato si'a pa̱ire cayë: ‘Sëtasicohua'ipi pa'ijë̱'ë,’ caquë.”

Currently Selected:

Marcos 13: sey

Highlight

Copy