Marcos 10
10
Jesús Ye'yase'e Nomiore Je̱ocoye Ayere
(Mt 19.1-12; Lc 16.18)
1Ye'ya tëjini Capernaum sani Jordán ña oca te̱'tena saquëña, Judea yejana. Ja̱rona jai pa̱i tsi'sireña, i̱ pa'i hue̱'ñana. Tsi'sirena, ye'yaëña, i̱ ye'yaye sëte. 2Fariseo pa̱ipi neñañu'u cajë se̱teña, ñeje:
“¿Nëjore je̱oñe deoquë?”
3Cajëna, i̱pi sehuouña:
“¿Moisés me cua̱ñei'ni, mësarute?”
4Caquëna, careña:
“Moiséspi cua̱ñepi pa̱i ëjaëpi nëjore je̱oco toya ja'o necaquëna, je̱ocoye pa'iji.”
5Cajëna, Jesupi caëña:
“Ja̱ cato Moisés cua̱ñepi mësaru joyopi de'oye cuasama' do'ire. 6Ja̱'a Maija'quë si'aye yeja pa'iye de'hua maca ë̱mëre cui'ne nomiore de'huapi. 7Ja̱ do'ire huejani pëca ja'quëre cui'ne pëca ja'core je̱oni nëjona tsioni pa'iye pa'iji. 8Ja̱ maca caya hua'i pa'iye pa̱ñë. Coa te'ije̱ pa'iohua'i pa'iyë. 9Ja̱ do'ire nëjore je̱oñe co'aji, Maija'quë de'oye ñacai tsiose'ere.”
10Huë'ena co'isi maca i̱ ye'yacohua'ipi Jesure cui'nare se̱ni co̱reña, nuñerepa asañu'u cajë. 11Cajëna, Jesupi caëña:
“Nëjore je̱oconi yecore huejaquë pani yeconi nomiore yo'oji, co'aye nëjore paquëta'a. 12Nomiopi ë̱jëre je̱ocosicopi yequëre huejaco pani ë̱mëre yo'oco, ë̱jëre pacota'a, ja̱oje co'aye yo'oco.”
Jesús Tsi̱re De'oyerepa Cacaiye
(Mt 19.13-15; Lc 18.15-17)
13Jesús quë'rona tsi̱re dareña, i̱pi papicaija̱'quë cajë. Ja̱je yo'ojëna, i̱ ye'yacohua'ipi tsi̱re dacohua'ire dama'pë Jesús quë'ro cajë ë̱sereña. 14Ja̱je ë̱sejëna, Jesupi ñani pë̱i caëña, ja̱ohua'ire:
“Coa ñajë'ë, tsi̱re i̱ohua'ise'e daija̱jë, ë̱sema'pë. Ma'tëmo cato ja̱ohua'ije̱ pa'iohua'i tse̱coa. 15Nuñerepa cayë, mësarute. Maija'quë cua̱ñe te̱'te cacaye peoji, tsi̱je pa'iohua'i pa'iye pa̱ni.”
16Cani tsi̱re su'cuani si̱opëna jëñapi patoquë de'oye pa'ijë̱'ë, cacaquëña.
Po̱sëpi Jaiye Co'amaña Paquëpi Jesure Case'e
(Mt 19.16-30; Lc 18.18-30)
17Ja̱je yo'o tëjini Jesús saina, te'i huë'huë to̱me dani do're ja'runi caëña:
“De'o ye'yaquë, ¿me neja'quë a'ni, ti pa'iyere ti̱'asi'i cani?”
18Caquëna, Jesupi caëña:
“¿Me yo'oquë yë'ëre de'oquë caquë'ni? Peoji, de'oquë. Coa Maija'quëse'e de'oquë pa'iji. 19Maija'quë cua̱ñese'e më'ëpi asayë, pa̱ire huani je̱oma'ë pa'ijë̱'ë. Yequë paconi yo'oma'ë pa'ijë̱'ë. Co'amaña ñama'ë pa'ijë̱'ë. Cosoma'ë pa'ijë̱'ë, yecohua'ire. Më'ë ja'quëre cui'ne më'ë ja'core de'oye oi necaijë̱'ë, co'aye cama'ë.”
20Caquëna, Jesure i̱pi caëña:
“Ye'yaquë, yë'ë cato tsihua'ë pa'inëna, iye cua̱ñese'e asani si'a mu'seña de'oye sehuohuë.”
21Caquëna, Jesupi i̱te oi ñani caëña:
“Ja̱ yë'ta'a te'o carapi. Sani si'aye më'ë co'amaña i̱sijë̱'ë. I̱sini ja̱ curire peocohua'ina coa i̱sijë̱'ë. Ja̱je yo'oni ma'tëmona jaiye paja̱'quë, i̱si tëjini daijë̱'ë, yë'ë ja̱'re co̱ni.”
22Ja̱je caquëna, po̱sëpi oi saquëña, jaiye co'amaña paquë sëte.
23Saquëna, Jesús ñani i̱te ye'yacohua'ire caëña:
“Jaiye co'amaña pacohua'ire ma'tëmo ma'a cacaye ai jëaji.”
24Caquëna, i̱te ye'yacohua'ipi ai cuasareña. Cuasajëna, Jesupi ca co̱uña:
“Huau dohuë, curiquëpi si'aye ti̱'añë cuasacohua'i ma'tëmo ma'a cacaye peoji. 25Ti̱'añe pa̱ji, camellore miu ñaca cojeja̱'a jua etoja̱iñe. Ja̱je pa'ina, jaiye co'amaña paquëre cato ai jerepa jëaji.”
26Ja̱je caquëna, asani ai cuasa co̱'me huesësicohua'i pa'ijë se̱teña:
“Ja̱je pa'ito ¿nepi huaso cua̱ñosicohua'i pa'ija̱'cohua'i a'ni?”
27Se̱jëna, Jesupi ja̱ohua'ire ñani caëña:
“Pa̱i cato ne ti̱'añe peoji. Ja̱je pa'iquëta'are Maija'quë cato ne ti̱'añe pa'iji. Maija'quëre cato si'aye ne ti̱'añese'e pa'iji.”
28Caquëna, Pedropi caëña:
“Ëjaë, yëquë co'amaña si'aye je̱oni më'ëre tuë'ë.”
29Cajëna, Jesupi caëña:
“Nuñerepa cayë, mësarute. Huë'ere, a'yëohua'ire, yo'jeohua'ire, ja'quëre, ja'core, nëjore, mamajëre, yejaña yë'ë do'ire cui'ne huaso coca do'ire je̱osicohua'i pani, 30iye yejana cien jerepa paja̱'cohua'i, huë'e, a'yëohua'ire, yo'jeohua'ire, ja'core, mamajëre, yejaña paja̱'cohua'i a'ë, cui'ne yecohua'ipi jo̱sa yo'oye cui'ne ma'tëmona ti pa'iyere ti̱'aja'cohua'i a'ë. 31Ja̱je pa'iquëta'are yure jerepa pa'iohua'i pa'isicohua'ipi jeteyo'jere, pa'ija̱'cohua'i a'ë, cui'ne yure jeteyo'jere pa'isicohua'ipi jerepa pa'iohua'i pa'ija̱'cohua'i a'ë.”
Jesupi I̱ Ju̱'i Ja̱'ñere Quëaye
(Mt 20.17-19; Lc 18.31-34)
32Jesupi du'ru saina, i̱ ye'yacohua'ipi jeteyo'je saë'ë, Jerusalénna tu̱maquëna. Saijëta'a merepa yo'oye pa'ija̱'coa'ni cuasajë quëquë huesësicohua'ipi saë'ë. Saijëna, ja̱ maca Jesupi i̱ohua'ise'ere soini i̱te yo'o ja̱'ñere, 33ñeje caëña:
“Ñañë, mai Jerusalénna saiye. Ja̱rona Pa̱i Mamaquëre Maija'quë huë'e ñacaicohua'i ëjaohua'ina cui'ne cua̱ñese'e ye'yacohua'ina tse̱ani i̱sija̱'cohua'i a'ë. I̱sirena, ja̱ohua'ipi yequë pa̱ina se i̱sija̱'cohua'i a'ë, huani je̱oja'quëre. 34I̱sirena, ja̱ohua'ipi yë'ëre cue'cuejë copi tse'seja̱'cohua'i a'ë. Jeteyo'je yë'ëre huani je̱oja'cohua'i a'ë. Huani je̱orena, toaso̱ mu'seña ta̱siquëpi huajëquë huëija̱'quë a'ë, yë'ë.”
Jacobo Cui'ne Juan Se̱se'e
(Mt 20.20-28)
35Ja̱ maca Zebedeo mamajëpi Jacobo cui'ne Juan Jesús quë̱no macana dani se̱teña:
“Ye'yaquë, yëquëre necaijë̱'ë.”
36Cajëna caëña:
“¿I̱quere necaiye'ni?”
37Caquëna, ja̱ohua'ipi careña:
“Më'ë cua̱ñe te̱'te de'o hue̱'ñare pana ëjaërepa de'oni ja'ru maca yëquëre më'ë ëja te̱'tena te'ire cui'ne më'ë ari te̱'tena te'ire ñojë'ë.”
38Se̱jëna, Jesupi caëña:
“Mësaru huesëjë coa se̱ñë. ¿De'hue mësaru yë'ë së̱je co̱no u̱cu ti̱'añe panita'a de'hue mësaru yë'ë do cua̱ñoñeje pa'ye pa'ito tëto sani ti̱'añe? Yë'ë cato ai yo'oja̱'quë a'ë.”
39Caquëna, sehuoreña, i̱te:
“Yëquëje̱ yo'o ti̱'aja'cohua'i a'ë.”
Cajëna, Jesús ja̱ohua'ire caëña:
“Ja̱je pa'ire paji. Yë'ë ai yo'ose'eje̱ mësaruje̱ ai yo'oja̱'cohua'i a'ë. Cui'ne yë'ë do cua̱ñose'eje̱ pa'ye mësaruje̱ do cua̱ñoja'cohua'i a'ë. 40Yë'ë ëja të'huina cui'ne yë'ë ari të'huina ñu'iñe i̱siye peoji. Ja̱ cato Maija'quëpi i̱si ja̱'ñe a'ë, i̱ caquë ne de'huasicohua'ina.”
41Ja̱re asani diez, i̱ ye'yacohua'ipi Juanre cui'ne Jacobore sa̱ñope pë̱ti huëoreña. 42Ja̱je sa̱'ñe pë̱ijëna, Jesupi ja̱ohua'ire soini caëña:
“Iye yeja cua̱ñe ëjaohua'i cato si'aye ëjaohua'irepa de'ocohua'i a'ë. Cui'ne i̱ohua'i meñe acohua'ipi ëjaohua'ire pa'ë, cuasajë i̱ohua'ini ca'rajëna, pa'icohua'i a'ë. 43Mësaru cato yeque yo'oye pa'iji. Pa̱i ëjaë pasi'i, cani yecohua'ini necaiquë pa'iye pa'iji. 44Cui'ne ai jerepa du'ru aquë pasi'i cani si'aohua'ire necaiquëpi jo'yaë pa'ijë̱'ë. 45Yë'ë Pa̱i Mamaquë daima'ë paë'ë, pa̱ipi necaija̱jë caquë. Yë'ëpi pa̱ini necasi'i caquë daë'ë. Yë'ë ju̱'i do'ipi si'aohua'ire huasoyere caquë daë'ë.”
Bartimeore Ñama'quëre Jujuse'e
(Mt 20.29-34; Lc 18.35-43)
46Jericó daripëna ti̱'asicohua'ipi i̱ti daripëpi etareña, Jesús cui'ne i̱ ye'yacohua'i cui'ne jai pa̱i co̱ni. Ja̱ro eta hue̱'ñare Bartimeo ñama'quëpi da saicohua'ini curiquë se̱i ñuquëña, Timeo mamaquëpi. 47Ñu'iquëpi Jesús Nazaret aquëpi daiji asani cui huëouña:
“¡Jesús David mamaquë, yë'ë macare co̱caijë̱'ë! ¡Ai yo'oyë!”
48Caquëna, pa̱ipi pë̱ijë i̱te careña:
“Cama'ë pa'ijë̱'ë.”
Cajëna, ai jerepa tutu ca co̱uña:
“¡David mamaquë yë'ëre oi necaijë̱'ë! ¡Ai yo'oyë!”
49Caquëna, asani Jesupi caëña:
“Daijë̱'ë cajë̱'ë, i̱te.”
Caëna, ñama'quëre careña:
“Ai pequë maca huëni saijë̱'ë, i̱ quë'rona. Më'ëre soiji, i̱pi.”
50Carena, esa i̱ ë̱mëje'e ju'icore se dutani Jesús quë'rona saquëña, tsoe nëiñe peoyerepa. 51Jesús quë'rona saquëna, caëña, i̱te:
“¿Me necaiyete yëquë'ni, më'ë?”
Caquëna, ñama'quëpi caëña, i̱te:
“Ëjaë, yë'ë de'oye ñañere yëyë.”
52Caquëna, Jesupi i̱te caëña:
“De'oji, de'hue jujuquë api cuasato jujucasi'i, më'ëre.”
Ca macarepa sëtani ñaëña. Ñani Jesús ja̱'re saquëña.
Currently Selected:
Marcos 10: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
