Mateo 19

Jesús Ye'yase'e Nomiore Je̱ocoye Ayere

(Mr 10.1-12; Lc 16.18)

1Jesús iye coca casi jeteyo'je Galileapi saji'i. Sai Judea quë'rona Jordán tsiaya quë'rona ë̱së mëi te̱'tena ti̱'api. 2Jai pa̱i i̱te pe'tehuë. Pe'terena, ja̱rona ju̱'icohua'ire jujupi. 3Ja̱ maca fariseohua'i Jesure tsioja̱ni se̱i'ë, tayo sehuouna, tse̱añu'u cajë ñeje:

“¿Nëjore je̱ocoye pa'iquë coa a'ri maña yequere yo'ona?”

4Cajëna, i̱pi ja̱ohua'ire sehuopi:

“¿Ñama'cohua'i a'ni, toyase'e caye si'aye du'ru pa'i huëose'e nesiquëpi ‘Nepi ë̱mëre cui'ne nomiore’? 5Cui'ne caji: ‘Ja̱je pa'ina, pëca ja'quëre cui'ne pëca ja'core je̱oni nëjona tsioni cayaohua'i pa'ima'pë coa te'ije̱ pa'iohua'i pa'ija̱'cohua'i a'ë.’ 6Ja̱je pa'ina, cayaohua'i pa'iye paja̱'cohua'i a'ë. Coa ai jerepa te'i pa'ija̱'cohua'i a'ë. Ja̱je pa'ina, ë̱mëpi nëjore je̱ocoye peoji, Maija'quë ñaquë tsiose'e.”

7Ja̱ maca i̱te se̱i'ë:

“¿Me yo'oquë Moisés nëjore je̱ocoye pa'iji, toya ja'huana je̱oco do'ire toyani cua̱ñei'ni?”

8Cajëna, Jesupi capi:

“Mësaru jëa joyo pa'i do'ire Moisés je̱ocoye de'oji, capi. Du'ru pa'i huëo maca cato ja̱je pa'iye pa̱pi. 9Ja̱je pa'ina, yë'ëpi cayë. Yequë ë̱mëohua'ire yo'oma'ona je̱oconi yequë nomiore huejaquë pani tsoe co'a de'opi, yecore yo'o do'ire. Cui'ne je̱ocosi nomioni po̱sëpi huejaquë panije cui'ne co'a de'oji, ë̱jëre paconi yo'oquë.”

10Ja̱ maca i̱ ye'yacohua'ipi cahuë:

“Ja̱je pa'iye sëte ë̱mëpi nomiore huejaye co'aji.”

11Cajëna, Jesupi capi:

“Si'aohua'i iye asaye peoji. Coa Maija'quë ta̱'ñe asaye i̱sisicohua'ise'e asaye pa'iji. 12Iye do'ire yecohua'i ë̱mëohua'i huejama'cohua'i pa'iyë. Tsi̱'nëna co'a de'osicohua'i ai de'oyë, pa̱ipi huejama'pë pa'ija̱jë cajë co'a de'huasicohua'i pa'iyë. Yecohua'ipi huejama'cohua'i pa'iyë, ma'tëmo ayere cajë. Iye yë'ë case'e yëquëpi ja̱je pasi'i cuasani ja̱je huejama'quë pa'ijë̱'ë. Pa̱i ñape ti̱ñe pa'i do'ire ë̱mëohua'i huejaye pa̱ñë. Yecohua'ipi hueja ti̱'añe pa'ija̱'cohua'ipi ai de'oyë. Pa̱ipi huejama'pë pa'ija̱'cohua'ire nesicohua'ipi pa̱ñë. Yecohua'ipi ma'tëmo pa'iyere cajë huejaye pa̱ñë. Ja̱je pasi'i cani ja̱je pa'ijë̱'ë, ai cuasaquëpi.”

Jesupi Tsi̱re De'oyerepa Cacaiye

(Mr 10.13-16; Lc 18.15-17)

13Ja̱ maca tsi̱re Jesús quë'rona dahuë, i̱pi jëñapi patoquë se̱cacaija̱quë cajë. Ja̱je yo'ojëna, i̱ ye'yacohua'ipi tsi̱re dacohua'ire dama'pë cajë ë̱sehuë. 14Ja̱je cajëna, Jesupi capi:

“Coa ñajë'ë, tsi̱ i̱ohua'ise'e yë'ë quë'rona daija̱jë. Ë̲sema'pë pa'ijë̱'ë. Ma'tëmo cato ja̱ohua'ije̱ pa'iohua'i tse̱coa.”

15Ja̱ maca tsi̱re i̱ jë̱ñapi patoquë yo'o tëjini saji'i, yequë hue̱'ñana.

Po̱sëpi Jaiye Co'amaña Paquëpi Jesure Case'e

(Mr 10.17-31; Lc 18.18-30)

16Po̱sëpi jaiye co'amaña paquëpi Jesure sani se̱ji'i:

“De'o ye'yaquë. ¿I̱que de'o co'amañare yo'oja̱'quë a'ni, ma'tëmo ti pani huesëye ti̱'asi'i cani?”

17Caquëna, Jesupi capi, i̱te:

“¿Me yo'oquë de'oquë caquë'ni, yë'ëre? Peoji, de'oquë. Coa te'i pa'iji, ja̱ë cato Diusupi. Ja̱je pa'iquëta'are më'ëpi ti pa'i hue̱'ña cacaye yëni sehuoye pa'iji, cua̱ñese'ere.”

18Caquëna, po̱sëpi i̱te capi:

“¿Je a'ni, i̱ti yë'ë sehuo ja̱'ñe?”

Caquëna, Jesupi capi, i̱te:

“Huani je̱oma'ë pa'ijë̱'ë, yequë. Nëjore yecore yo'oma'ë pa'ijë̱'ë. Co'amaña ñama'ë. Yecohua'ire cosoma'ë pa'ijë̱'ë. 19De'oye sehuojë̱'ë, më'ë ja'quëre cui'ne më ja'core. Cui'ne oijë̱'ë, më quë̱no maca pa'iquëre më'ëja'a co'ye oiyeje̱ pa'ye.”

20Po̱sëpi i̱te capi:

“Si'aye iye tsihua'ë pa'inëpi de'oye yo'osiquë a'ë. ¿Ja̱je pa'ito i̱quepi caraquë'ni, yë'ëre?”

21Caquëna, Jesupi sehuopi, i̱te:

“Më'ëpi de'oquërepa pasi'i cani sani më'ë payere i̱siquë curiquë nequë cui'ne peocohua'ini coa i̱sijë̱'ë. Ja̱ macata'a më'ë ma'tëmore jaiye co'amaña paye pa'iji. Ja̱ jeteyo'je dani tuijë̱'ë, yë'ëre.”

22Ja̱je caquëna, iyere po̱së asani ai oi saji'i, jaiye co'amaña paquë sëte.

23Ja̱ maca Jesupi i̱ ye'yacohua'ire capi:

“Nuñerepa cayë, mësarute. Ai jëaji, ma'tëmo jaiye co'amaña pacohua'ipi cacaye. 24Cayë, ti̱jupë mësarute. Camellore miu ñaca cojeja̱'a sa etoja̱iñe peoji. Ja̱je pa'ita'are ai jerepa jëaji, jaiye co'amaña pacohua'ipi ma'tëmo cacaye.”

25Ja̱re i̱ ye'yacohua'ipi asani ai cuasajë i̱ohua'ija̱'a sa̱'ñe se̱i'ë: “¿Ja̱je pa'ito nepi huasosicohua'i pa'iye pa'iquë'ni, cajë?”

26Jesupi ñani capi, ja̱ohua'ire:

“Pa̱ire cato caca ti̱'añe peoji. Ja̱je pa'iquëta'are Maija'quëre cato neñe pa'iji, si'aye.”

27Ja̱ maca Pedropi capi, i̱te:

“Ëjaë, yëquë si'aye yëquë co'amaña pase'e je̱oni më'ëre tuë'ë. ¿Ja̱je yo'osicohua'i i̱quere yëquë paja̱'cohua'i a'ni?”

28Cajëna, Jesupi sehuopi, ja̱ohua'ire:

“Nuñerepa cayë, mësarute. Ja̱ mu'se si'aye huajëye de'osi maca Pa̱i Mamaquëpi i̱ ñu'i saihuëna Ëjaërepa ja'rusi maca, mësaru yë'ëre tuisicohua'ije̱ ja'ruja̱'cohua'i a'ë, doce ñu'i saihuë̱ana, doce tsëcapë̱a Israel pa̱i yo'ose'e ña de'huaja̱'cohua'ipi. 29Huë'e pa̱nita'a a'yëre, a'yore, pa̱nita'a ja'quëre, pa̱nita'a ja'core, pa̱nita'a nëjore, pa̱nita'a mamajëre, pa̱nita'a yejare yë'ë do'ire je̱osicohua'i cato cien pa'ye jerepa paja̱'cohua'i a'ë, cui'ne ti pani huesëyere paja̱'cohua'i a'ë. 30Ja̱je pa'iquëta'are jai pa̱i yure du'ru pa'icohua'ipi tëjiohua'irepa pa'ija̱'cohua'i a'ë, cui'ne yure jeteyo'jerepa pa'isicohua'ipi du'ru acohua'i pa'ija̱'cohua'i a'ë.

Currently Selected:

Mateo 19: sey

Highlight

Copy